Z wudaća: srjeda, 09 januara 2019

Wjelk do awta skočił

Ralbicy. Wšo druhe hač měrnu jězbu na dźěło měješe wodźerka wosoboweho awta wčera rano w Delanach. Jako bě z Ralbic do směra na Nowoslicy po puću, jej něhdźe w 7.30 hodź. runje na poł puća wjelk do awta skoči. Žona sej lědma z awta zwěri a zazwoni policiju. Zastojnicy su pad sobudźěłaćerjam wjelčeho běrowa dale dali. Na nich pak dyrbjachu něhdźe połdra hodźiny čakać. Woni za­hinjeneho wjelka skónčnje sobu wzachu, zo móhli zwěsćić, hač pochadźa wón z Róžeń­čanskeje abo druheje črjódy.

Budyšin (SN). Ze symboliskim přepo­daćom kluča je Budyska měšćanska hala „Króna“ wčera cyle oficialnje do wobsydstwa města Budyšina přešła. Jednaćelski towaršnik Berlinskeje předewzaćelskeje skupiny Onnasch Alexander Kindermann bě do sprjewineho města přijěł, zo by jednaćelce Budyskeje bydlenjotwarskeje towaršnosće (BWB) Kirsten Schönherr symboliski kluč přepodał. Tak sćahnychu poslednju smužku pod dwě lěće trajace diskusije wo „Krónu“.

Loni 29. awgusta bě Budyska měšćanska rada wobzamknyła, areal mjez Kamjentnej a Hornčerskej hasu kupić. „Njemóžemy a nochcemy přihladować, kak priwatni inwestorojo na płoninje wo­srjedź města twarske hrěchi skućeja“, wyši měšćanosta Alexander Ahrens (SPD) argumentowaše. 20. septembra 2018 pod­pisachu kupne zrěčenje, a wčerawše přepodaće kluča bě posledni symboliski krok.

Rozmołwa ze starostu Serbskeho Sokoła Milanom Funku

Lěta 1920 w Budyšinje załoženy Łužiskoserbski Sokołski zwjazk bě hač do swojeho rozpušćenja na ćišć nacionalsocialistow 1933 wuspěšnje na dobro serbskeho ludu skutkował. Za čas NDR njeje so poradźiło jón wozrodźić. Po politiskim přewróće je 28. decembra 1993 skupina ludźi w Hórkach Serbski Sokoł znowa załožiła. Składnostnje 25lětneho wobstaća towarstwa je dźensniši starosta Milan Funka bywšich sobuzałožerjow a někotrych jeho aktiwnych čłonow nětko na jubilejnu swjatočnosć do Kozarc­ přeprosył. Alfons Wićaz je so z nim rozmołwjał.

Hdy sće so započał za Serbski Sokoł horić?

M. Funka: Hižo jako šuler hrajach wolejbul w mustwje Rotacija Budyšin, pozdźišo pola Słowjana a Sokoła Budyšin, kotremuž nětko tež předsteju. Zastupich po znowazałoženju 1994 do Serbskeho Sokoła. Wot lěta 2015 sym jeho starosta.

Sće so hižo do přistupa k Serbskemu Sokołej ze stawiznami Łužiskoserbskeho Sokołskeho zwjazka zaběrał?

Na jubilejnym swjedźenju Serbskeho Sokoła je so Alfons Wićaz někotrych staršich a młódšich čłonow prašał, što jim­ sportowe zjednoćenstwo wozna­mjenja.

Jan Macka: Jako bu zwjazk před 25 lětami znowa załoženy, njemějach wo nim žane prawe předstawy. Tehdy njebě hišće wšitko tak, zo móžach rjec, zo podamy so nětko do dźěła. To so hakle pozdźišo wuwiwaše. Spóznach, zo su rozdźělne zajimy w sporće, jedyn hori so za tu, dalši za tamnu družinu. Běch wot młodych lět zahority kopar. Sym so potom wosebje na serbske wubranki zwažił. Běchmy wjele lět stara garda w Sokole. W lětomaj 2014 a 2015 smy nawod Sokoła do młódšich rukow dali. To bě jara derje. Po wjacorych lětach zwěsćam, zo je so wšitko skrućiło a dale womłodźiło. Starosta Milan­ Funka je dobry nawoda a zamóže dźěło spomóžnje dale wjesć.

Měšćanosta Wojerec za socialne naležnosće Thomas Delling je tam prěnju njedźelu noweho lěta 40. nowolětny běh startował. 166 běharkow a běharjow, 47 wjac hač loni, poda so na wšelako dołhe čary. Mjez nimi bě 33 wólnočasnych atletow na čarje 2 km. 33 walkowarjow a 100 ludźi (33 žonow a 67 muži) wobdźěli so na pokalnym běhu 6 kilometrow. Najstarši starter bě na čarje 2 km 90lětny Karl-Heinz Noack z Wojerec. Wón je mjeztym hižo wjele lět pódla na sportowskim zazběhu noweho lěta. Najebać starobu pak je přeco hišće aktiwny. Zhromadnje na čaru poda so z Karlom-Heinzom Noackom najstarša žona, a to 73lětna Hella Helm z Jitka pola Rakec. Najmłódši wobdźělnik pokalneho běha bě wosomlětny Johann Drosa wot LARG Wojerecy a najstarši starter na hłownym běhu 6 km 79lětny Hans Zosel. Jako najstarša běharka na pokalnym běhu bě 66lětna Hannelore Nippel zapisana. Hižo bjezposrědnje po starće wubědźowanja so načolni atleća wotsadźichu.