Z wudaća: štwórtk, 10 januara 2019

Berlin (dpa/SN). Frakcija SPD w zwjazkowym sejmje je dźensa dwudnjowsku klawsuru zahajiła. Na njej chcedźa zapósłancy hłowne temy přichodnych mě­sacow wobrěčeć. Zazběh ma rozprawa stronskeje předsydki Andreje Nahles być. Dalše temy su kubłanska a ratarska politika kaž tež přihoty wólbow Europskeho parlamenta. SPD chcyła lětsa sylnišo přećiwo chudobje dźěći postupować. To připowědźi Andrea Nahles dźensa w rańšim magacinje sćelaka ARD. Zo su tři miliony dźěći na socialnu pomoc stata pokazane, byrnjež Němska bohaty kraj był, je „njeakceptabelny staw“.

Washington (dpa/SN). W zwadźe wo planowanej muri na mjezy mjez USA a Mexikom skónči so wodźace zetkanje mjez prezidentom USA Donaldom Trumpom a zastupnikami opoziciskeje demokratiskeje strony z eklatom. Trump bě rozmołwu dočasnje wopušćił a ju pozdźišo „totalne brojenje časa“ mjenował. Wón bě so demokratiskeje předsydki Domu reprezentantow Nancy Pelosi prašał, hač by financowanju murje přihłosowała, hdyž wón blokadu knježerstwa skónči. Pelosi wotmołwi z „ně“, na čož Trump wuradźowanje wopušći, kaž sam twitterowaše. Podobnje zwurazni to demokratiski frakciski předsyda w senaće Chuck Schumer žurnalistam, doda pak: „Smy zaso raz złoby prezidenta dožiwili, dokelž njeje to dóstał, štož chcyše. Tuž je zetkanje wopušćił.“

Zwada wo muri, kotruž sej Trump žada, je mjeztym dźěło knježerstwa w dalokej měrje zlemiła. Krótko do hód dyrbjachu „shutdown“ wukazać. Tysacy sobudźěłaćerjow ministerstwa dyrbja bjezpłatnje doma wostać abo bjez mzdy dźěłać.

Zarjadowanje k 20. róčnicy saksko-pólskich stykow we Wrócławju

Drježdźany/Wrócław (SN). W jubilejnym lěće mjeztym 20 lět trajaceho regionalneho partnerstwa chce Swobodny stat Sakska dobre styki k swojim pólskim susodam, předewšěm k partnerskimaj kónčinomaj Delnja Šleska a Lubuskie dale zesylnić. Zazběh jubilejneho lěta 2019 bě wčerawše nowolětne přijeće z koncertom we Wrócławskej synagoze. Bě to mjeztym druhi nowolětny koncert Sakskeje na historiskim městnje. We Wrócławskim kontaktnym běrowje swobodneho stata přizamkny so přijeće.

Nowolětny koncert zahajiłoj běštaj statny minister a šef sakskeje statneje kenclije Oliver Schenk a społnomócnjeny maršala wojewódstwa Delnja Šleska za mjezynarodne naležnosće Krzysztof Bramorski.

Što słowjanska wzajomnosć dźensa wo­znamjenja? Zastupowacy wjesnjanosta gmejny Chrósćicy Jan Wjesela a nawoda tamnišeje zakładneje šule „Jurij Chěžka“ Měrko Šmit běštaj to generalnej konsulce Čěskeje republiki w Sakskej wčera na swoje wašnje zwurazniłoj. Něhdy njemějachu wobydlerjo NDR, tak tež Serbja, wjele składnosćow do dalokich krajow pućować. Ale do Čěskeje to móžachu. Tež Češa, kaž dr. Markéta Meissnerová powědaše, rady do NDR jězdźachu. Mnohe dopomnjenki wo wosobinskich zetkanjach mjez ludźimi wobeju narodow běchu słyšeć. Wažne pak tež bě zdobom na to pokazać, zo tale zhromadnosć dźensa často pobrachuje. Přičiny toho tča bjezdwěla w mjeztym wotewrjenym swěće. Słowjanske narody pak dyrbjeli so na to dopomnić, kak sylne wone zhromadnje su. To sej wuwědomić a tak słowjansku wzajomnosć wožiwić – za to budźe politika a diplomatija sylnišo trěbna. Milenka Rječcyna

Budyšin (CS/SN). Jara wulki zajim žnjał je přednošk Sebastiana Fritzy wot krajneho zarjadnistwa rěčnych zawěrow minjenu póndźelu we wobłuku Budyskeje akademije. Žurla studijneje akademije bě z wjace hač sto přihladowarjemi přepjelnjena. Referent rěčeše wo Budyskim spjatym jězoru a wo wodohospodarstwje Łužicy scyła. Přednošk bě pjelnjeny z faktami w formje tabulkow. Wosebity zajim zbudźi předstajenje noweje technologie, z kotrejž chcedźa w spjatym jězoru přećiwo módrym algam postupować. Projekt mjenuje so „epilimniske wubranje“. Kaž Sebastian Fritze rjekny, běchu wšitko do toho z pomocu kompjuterow na­podobnili, prjedy hač móžachu za to pjenjezy nałožić. Dotal su zymnu wodu wotpušćili, nětko wotpušćeja ćopłu powjeršnu wodu, z čimž algi sobu wotsrěbaja. Dalša lěpšina je, zo ryby w delnim dźělu Sprjewje tak wjace ćopłeje wody dóstawaja. Woduwotsrěbanski nastroj, z drjewom wobdata woclowa konstruk­cija, płaćeše 750 000 eurow.

Koncertny mišter Karl-Heinrich Starke po 42lětnym skutkowanju wuměnkar

Prěnje předstajenje programa „Zymski čas – Hody pola nas“ w aktualnej hrajnej dobje Serbskeho ludoweho ansambla bě loni 11. hodownika zdobom posledni dźěłowy dźeń za Karla-Heinricha Starkeho. Husler, wjelelětny koncertny mišter a nawoda zawodneje rady SLA je so po 42 lětach z publikumom roz­žohnował. „Lochko mi to njebě. Byrnjež kročel wočakujomna była, njemóžu rjec, zo sym so runjewon wjeselił. Přiwšěm je pola nas tak, zo dźěłowe zrěčenje z docpěćom starobneje hranicy wuběži. A je tež w porjadku tak, je načasu, zo wotežku młódšemu hudźbnikej abo młódšej hudźbnicy wotedam. Ale trochu so mi nětko hižo styska – nazhonići rent­na­rjo su mi powědali, zo tomu něhdźe­ lěto tak wostanje“, Starke swoje tuchwilne wosobinske žiwjenske połoženje zjima.

Wot Kocora k Mětškej

Tabulka koparskeho dorosta

młodźina A, koparska wokrjesna liga

HZ Kubšicy/Bukecy 12 86 : 11 36

HZ Ottendorf-O./Hermsd. 13 74 : 22 30

HZ Radwor/Wulka Dubr. 13 39 : 17 29

HZ Horni kraj Sprjewja/Hnašecy-Dobruša

 11 38 : 17 25

Póst Germania Budyšin 12 45 : 34 19

HZ Němske Pazlicy/Běła/Cunnersdorf 

 13 39 : 51 19

TSV Wachau 13 51 : 60 18

HZ Jednota Kamjenc/Kinspork/Łužnica 

 12 29 : 38 16

HZ Großnaund./Lomnitz 13 29 : 31 15

 HZ Ramnow/Bretnig-Hausw./Porchow 

 13 32 : 44 15

HZ Ćisk/Hory/HZ Łaz/Běły Chołmc

 13 31 : 39 11

HZ Rakecy/Njeswačidło 13 27 : 56 10

SJ Chrósćicy 11 21 : 30 8

HZ Bart/Budissa Budyšink/Malešecy

 12 4 : 95 0

Wuhotowar, zarjadowar a organizator šeste­ho haloweho koparskeho turněra Kulow-cup w zymje bě znowa mustwo Kulowminatijow. Wšako bě wone turněr loni dobyło. A zakitowar steješe tónraz zaso na prěnim městnje, po załoženju w lěće 2014 nětko hižo pjaty raz. Dokelž běchu Kulowminatije loni tež lěćnu ediciju dobyli, dyrbja woni lětsa a klětu spočatk lěta wobaj turněraj přewjesć.

W Kulowskej wjacezaměrowej hali hra­­ješe 5. januara wosom cyłkow na 6. zymskim Kulow-cupje w dwěmaj skupinomaj w předkole. Prěnje połfinale mjez Zelenej gardu a WD-40 skónči so 1:2, druhe mjez Dołhej gardu a Kulow­mina­ti­jemi 3:4.

W finalu běchu potom Kulowminatije přećiwo WD-40 z 5:0 wuspěšni.

Kónčny staw 6. Kulow-cupa w zymje:

1. Kulowminatije, 2. WD-40, 3. Dołha garda, 4. Zelena garda, 5. Gut Kickerz, 6. Söffnerojo, 7. Company of Kulow, 8. Wjesni hłupacy Werner Müller

Krótko do hód namakachu Pančičanscy wolejbulisća w swojich halowych črijach wosebitu překwapjenku: nowe trikoty. To bě tež trjeba, wšako maja dosć nowačkow, kotřiž dyrbjachu dotal w požčenych abo staršich dresach hrać. Nowe shirty maja toho­runja na rukawje serbske lipowe łopješko. Wosebity dźak słuša předewzaćelej Měrćinej Kralej (nalěwo) z Pančic-Kukowa. Jeho firma GartenArt je hrajerjam jako nowy sponsor tutón hodowny dar zmóžniła. Foto: Metod Šołta

Staršiska přirada zakładneje Šule Ćišinskeho w Pančicach-Kukowje wojuje wot lěta 2017 wo to, zo měła so spěšnosć wobchada na statnej Dróze Ćišinskeho blisko kubłanišća na 30 km/h wobmjezować. Wčera připołdnju bu to wotpokazane.