Z wudaća: srjeda, 13 februara 2019

Tarifowe jednanja

Zhorjelc. Tuchwilne stawki wučerjow potrjechja posrědnje tež Zhorjelsku wo­krjesnu hudźbnu šulu. Tamniši kubłarjo žadaja sej domjacy tarif, kiž so na tym zjawneje słužby orientuje. Dołhož jednanja mjez krajnoradnym zarjadom a dźě­łarnistwom­ ver.di běža, stej so wobě stronje na to dojednałoj, zo stawk njebudźe.

Dźiwadło serbsce wita

Drježdźany. Do Dźiwadła młodeje generacije w Drježdźanach při zachodźe nětko tež w serbskej rěči witaja. Wo tym informuje dźensa Serbski rozhłós. Připrawjene je witanje za předwidźanu swójbnu njedźelu spočatk měrca, kotruž Budyske NSLDź a Drježdźanske towarstwo Stup dale zhromadnje wuhotujetej. NSLDź předstaji klankohru „Kito husličkar“ a AG serbšćina w krajnej stolicy hru „Módry banćik“.

Pjenjezy za sakske komuny

W Hamorskim přistawje su wčera prěnje dźěła za přistawnišćo wukonjeli. Wšako ma pasažěrska łódź bórze po Bjerwałdskim jězoru jězdźić. Najprjedy pak dyrbja nimale­ 5 000 kubiknych metrow zemje z jeho dna wotstronić, dokelž trjeba łódź za wobroćenje­ štyri metry hłuboku wodu. W nadawku LMBV dźěła tu firma Holgera Roocka z Mecklenburgsko-Předmorskeje. Foto: Joachim Rjela

Při Kwětanečanskim spjatym jězorje budu twarić

Kwětanecy (SN/BŠe). Spjaty jězor pola Kwětanec (Quitzdorf) budźe lětsa wobšěrnje ponowjeny. To je nuznje trjeba, wšako dotal nimale 50 lět bjez přestawki dźěła. Hižo loni zwěsćichu fachowcy we wo­błuku analyzy wulke škody na stronje twara, hdźež wodu ze zawěry bjeru. Zo móhli sej dokładny wobraz wo škodach tworić, dyrbja tež delni dźěl zawěry přepytować. Najebać lońšu suchotu, kotrejež dla je staw wody w kumštnym spjatym jězoru spadnył, njemóžachu wobjim doskónčnje rozjasnić. Woda spjateho jězo­ra budźe lětsa tuž dospołnje wotpušćena. To je wobšěrna, ale nuznje trěbna naprawa, kaž Sakske krajne zarjadnistwo za rěčne zawěry zdźěla.

Drježdźany (SN/at). Ideje ciwilneje towaršnosće maja pomhać strukturnu změnu we łužiskim a srjedźoněmskim brunicowym rewěrje zmištrować. Za to je sakske knježerstwo „fonds sobučinjenja“ ze 6,4 milionami eurow zarjadowało, kaž šef statneje kenclije Oliver Schenk (CDU) wčera w Drježdźanach wozjewi. „Trjebamy nimo inwesticijow do infrastruktury a wutworjenja dźěłowych městnow wot wšeho spočatka zwólniwosć ludźi na městnje, změnu aktiwnje sobu wuhotować“, wón podšmórny.

Budyšin (SN). Kaž k wólbam Budyskeje měšćanskeje rady tak nastupi tudyši wokrjesny zwjazk Zwjazka 90/Zelenych tež k wólbam wokrjesneho sejmika 26. meje z dwěmaj serbskimaj kandidatomaj. Wobdźělnicy wčerawšeje nominowanskeje zhromadźizny w młodowni sprjewineho města wobkrućichu za wólbny wokrjes 3 (Šěrachow-Korzym, Budestecy, Hornja Hórka, Kumwałd, Kubšicy, Bukecy) tuchwilneho wokrjesneho radźićela dr. Pětša-M. Jahna-Brězana z Debsec. We wólb­nym wokrjesu 12 (Chrósćicy, Njebjelčicy, Pančicy-Kukow, Worklecy, Ralbicy-Róžant, Halštrow, Łaz, Kulow) kandiduje Budyšan Julian Nyča, kiž změje tam ze stron CDU Dawida Statnika za konkurenta. Dohromady su Zeleni wčera 28 kandidatow nominowali.

Z kubłanskej tematiku zaběrachu so čłonojo Serbskeho sejma na posedźenju minjenu sobotu w Ćisku. Woni rozjimachu a wobzamknychu tři žadanja sakskemu a braniborskemu knježerstwu nastupajo wožiwjenje serbšćiny.

Kóžde lěto štyri razy wotměwaja w Delnim Wujězdźe – w nowembru, januaru, februaru a měrcu – „čitansku zymu“. To je slěd zarjadowanjow, na kotrež přeproša sej Delnjowujězdźanske domizniske towarstwo njedźelu popołdnju regionalnych spisowaćelow a dalšich hosći do radnicy na čitanje. Na 18. čitanskej zymje lětsa w januaru bě to spisowaćel Jurij Koch. „Wothłós bě zaso jara dobry, na čitanje dźě přeco hač do 40 wjesnjanow přichwata“, Johanna Gruner wuzběhnje.

Hižo wot časa załoženja domizni­ske­ho towarstwa 1998 Johanna Gruner jeho předsydstwu přisłuša. 62lětna předrentnarka, kotraž bě w lutowarni dźěłała, so jara za 65 čłonow wopřijacy cyłk anga­žuje. A wosebje jeje zasłužba je, zo běchu w lěće 2001 z „čitanskej zymu“ započeli. Wěnowali su so tehdy spisowaćelej a do­mizniskemu basnikej Gottfriedej Unterdörferej. Powědančka, basnje a dźenik 9. septembra 1992 w Delnim Wujězdźe zemrěteho bě njeboh dr. Frank Stübner w swojim nakładnistwje Lusatia wudał. Tež dalšich serbskich spisowaćelow, kaž Křesćana­ Krawca z Hrubjelčic a basnicu Róžu Domašcynu z Budyšina,­ su hižo na „čitansku zymu“ witali.

Chrósćicy (SN/bn). Na njezjawnym posedźenju přihotowanskeho wuběrka za lětuši 13. mjezynarodny folklorny festiwal „Łužica“ su čłonojo wčera w Chrósćicach wjacore konkretne wuhibki stajili.

Za dźěćacy program je so cyłkownje jědnaće dorostowych skupin – telko kaž hišće ženje – z Hornjeje a srjedźneje Łužicy kaž tež z Drježdźan přizjewiło. Sobotu, 6. julija, chcedźa zarjadowarjo pod hesłom „W raju wjesołych dźěći“ pisany a wotměnjawy program z rejemi, spěwom a hudźbu wuhotować. Prěni raz wobdźěla so dźěći Drježdźanskeho towarstwa Stup dale a dorostowa rejwanska skupina z Brětnje.

Wěste mjeztym tež je, kotre serbske kulturne cyłki so we wobłuku festiwala předstaja. Mjez druhim chcedźa so wo­spjet Smjerdźečanska rejwanska skupina, Serbski folklorny ansambl Wudwor a Serbski ludowy ansambl w Budyšinje, Hochozy a Chrósćicach prezentować.

Kaž w minjenych lětach liči festiwal zarjadowacy třěšny zwjazk serbskich towarstwow Domowina z dohromady ně-hdźe 700 sobuskutkowacymi ludowymi wuměłcami z cyłeho swěta.

Berlin (dpa/SN). Předsyda srjedźnostawskeho zwjazka CDU Carsten Linnemann warnuje před nowymi njesprawnosćemi, dyrbjała-li so wot SPD namjetowana nowa zakładna renta zwoprawdźić, bjeztoho zo potrěbnosć potrjecheneje wosoby scyła pruwuja. Linnemann je nimo toho přeswědčeny, zo njeje zakładna renta financujomna. Po jeho wobličenjach by projekt kóžde lěto sydom do wosom miliardow eurow płaćił.

Wita měrowu konferencu

Berlin (dpa/SN). Wonkowny politikar CDU Norbert Röttgen wita zwólniwosć zwjazkoweho knježerstwa, w Němskej měrowu konferencu za Afghanistan zarjadować a na nju tež radikalnoislamskich talibanow přeprosyć. Zdobom warnuje wón NATO, wojerske zasadźenje w Afghanistanje dočasnje skónčić abo raznje pomjeńšić. To njebychu jednanja z talibanami žadyn zmysł wjace měli. Zwjazkowe knježerstwo chcyše dźensa wo podlěšenju mandata Zwjazkoweje wobory w Afghanistanje rozsudźić.

Prěni króć w nowej zestawje

Składnostnje róčnicy zničenja Drježdźan 13. februara 1945 přepoda Christopher Cocks-worth (nalěwo), biskop jendźelskeho města Coventry, wčera w Drježdźanach wyšemu krajnemu cyrkwinskemu radźe Haraldej Bretschneiderej (naprawo) z hozdźow kowany swjaty křiž Coventryskeje katedrale. Křiž je znamjo wujednanja a wobsteji z hozdźow, kotrež běchu w rozwalinach 1940 wot němskich bombowcow zničeneje Coventryskeje katedrale namakali. Foto: dpa/Sebastian Kahnert