Berlin (dpa/SN). Zastupnicy klimoškitneho hibanja šulerjow „Fridays for future“ su póndźelu w Berlinskim přirodowědnym muzeju katalog konkretnych žadanjow politikarjam přepodali. Zdobom woni připowědźichu, zo chcedźa ze swojim „šulskim stawkom“ stajnje pjatk tak dołho pokročować, doniž so „něšto njehiba“.
Za přetwar běrowoweho twarjenja zarjadniskeho zwjazka Při Klóšterskej wodźe su nětko takrjec w horcej fazy přihotow. Tam ma samo krajny kriminalny zarjad wažne słowčko sobu rěčeć.
Pančicy-Kukow (SN/MWj). Hač do 15. apryla ma tak mjenowany naćiskowy twarski plan za přetwar běrowoweho twarjenja zarjadniskeho zwjazka Při Klóšterskej wodźe w Pančicach-Kukowje hotowy być. Potom slěduje hač do spočatka meje wukonjenski plan. 10. meje ma prěni zapis jednotliwych dźěłow předležeć, štož chcedźa něšto dnjow pozdźišo wozjewić. 22. julija móhli z poprawnymi twarskimi dźěłami započeć. Tónle časowy wotběh předstaji planowar Stanisław Statnik na wčerawšim posedźenju zastupjerjow pjeć zwjazkej přisłušacych gmejnow.
Slepo (JoS/SN). Dobra nalada knježeše minjeny kónc tydźenja mjez wopytowarjemi 22. Slepjanskich jutrownych wikow runje tak kaž mjez 35 jejkadebjerjemi a něhdźe 50 wikowarjemi z Łužicy a wot druhdźe. Nalěćo je so ze swojeje najrjeńšeje strony pokazało a mnohich ludźi do Serbskeho kulturneho centruma přiwabiło. Woni wužiwachu mjez druhim składnosć, wobhladać sej wosebitu wustajeńcu, přehladku debjenych jejkow ze zašłych wjace hač 20 lět. Najmjeńši wopytowarjo zajimowachu so skerje za ćipki, kotrež běchu so hakle krótko do toho wulahnyli.
Na žurli Serbskeho kulturneho centruma móžachu wopytowarjo debjerjam při jich filigranym dźěle přihladować a samo dožiwić, kak woni jeja štrusow abo emuwow pisanjeja. Wosebitosć stejnišća Roßbachec swójby z Choćebuza bě, zo sy tam wšitke debjenske techniki wobdźiwać móhł. Dagmar Roßbach wěnuje so wužrawanju a škrabanju, mandźelski Wolfgang a wnučk Bruno wobknježitaj wóskowanje a wnučka Emma bosěrowanje. Najstarša wobdźělnica bě Uta Čižankowa z Horow, najstarši wobdźělnik Kurt Pluta z Běłeje Wody.
Worklecy (aha/SN). Zo móža dźěći w starobje sydom do jědnaće lět hłowni akterojo w cirkusu być, dopokazaja jutře a pjatk wuknjacy Serbskeje zakładneje šule „Michał Hórnik“ Worklecy. K nim přijěł je cirkus Rolandos z Herzberga, kotryž bu 1986 załoženy a mjeztym hižo nimale dwaceći lět šulerjow za dźěło w maneži pod cirkusowej kuplu zahorja.
Minjenu sobotu je cyłk swójbneho cirkusoweho předewzaća pod nawodom Rolanda Krämera a z podpěru staršich na Worklečanskim šulskim sportnišću wulki stan natwarił. Póndźelu přirjadowachu dźěći jednotliwym skupinam, kaž kuzłarjam, klawnam, artistam a dalšim.
Njeswačidło (JK/SN). Wulka ličba čłonow Njeswačanskeho Towarstwa přećelow domizny a kultury pokaza na wčerawšim posedźenju gmejnskeje rady na to, zo maja něšto na wutrobje. Předsyda Dieter Petschel předstaji koncepciju iniciatiwneje skupiny, zdźeržeć dom kata na Lišej horje. „Je najwjetši čas, dom zachować a rozmyslować, jón na nowe městno přestajić“, Petschel rjekny, złožujo so tež na wuprajenje a posudk fachowcow. Čłon załožby za tykowane domy ze stołom Arnd Matthes prócowanja towarstwa, zdźeržeć jónkrótnu chěžu wobkrući. Wona je najstarša swojeho razu w Sakskej a hódna, zo ju zachowaja.
Budyšin. Štwórtk, 11. apryla, w 19.30 hodź. předstaji so w Budyskej Smolerjec kniharni literarny dorost. Awtorki a awtorojo Paternostra čo. 8 su Annamaria Hadankec, Judith Handrikec, Božena Hojerec, Kira Hrjehorjec, Cecilija Neterec, Halina Pohončec, Julia Šnajderec, Luiza Šubertec, Clemens Bobka, Fabian Brycka, Michał Donat, Damian Dyrlich a Pětr Dźisławk.
Zaběraja so z biowudźěłkami
Njebjelčicy. Marketingowe strategije, sebjepomocne koncepty a móžnosće direktneho zwičnjenja ratarskich biowudźěłkow steja w srjedźišću informaciskeho zarjadowanja jutře, štwórtk, w 19 hodź. w Njebjelčanskim gmejnskim centrumje. Mjez iniciatorami wječora staj ratarski poradźowar Jens Gülde a předewzaćelski poradźowar Hubert F. Lange. Zajimcy su wutrobnje witani.