Z wudaća: pjatk, 07 junija 2019

pjatk, 07 junija 2019 14:00

Harig žada sej nowozapočatk w CDU

Budyšin (SN). Michael Harig (CDU), Budyski krajny rada, je so z naležnym listom na zwjazkowu předsydku CDU Annegret Kramp-Karrenbauer wobroćił. „Wuslědki europskich a komunalnych wólbow su pokazali, zo smy jako unija wjele dowěry přisadźili“, Harig piše. Wosebje starosći so Harig wo połoženje zwjazkoweje CDU, wo zhromadne dźěło we wulkej koaliciji na zwjazkowej runinje a wo politisku stabilitu kraja. „Wólbne wuslědki jasnje pokazuja, zo je so system hódnotow w Němskej zasadnje změnił. To potrjechi wšitke runiny, wot komunow přez kraje hač k Zwjazkej. Nimo toho su po wšej Europje podobne tendency spóznajomne.“ Zjawy rozpušćenja SPD a prócowanja, wulku koaliciju na kóždy pad zachować, starosće ludźi zesylnjeja, w lisće Hariga rěka. Najebać jeje zasadźenje kaž tež zasłužby zwjazkoweje kanclerki Angele Merkel wón Kramp-Karrenbauer prosy, so z Friedrichom Merzom na nowozapočatk nastupajo kanclersku kandidaturu zwažić.

wozjewjene w: Kraj a swět
pjatk, 07 junija 2019 14:00

Róčnicu wšelako swjećili

Pólska prěnje zdźěla swobodne wólby w juniju 1989 wopominała

Waršawa. Pólska swjećeše minjenu wutoru 30. róčnicu politiskeho podawka, kotryž je kraj a skónčnje wšu Europu změnił.

Dnja 4. junija 1989 běchu w Pólskej prěnje, znajmjeńša zdźěla swobodne wólby parlamenta, z kotrychž wuńdźe Tadeusz Mazowiecki jako prěni njekomunistiski ministerski prezident kraja. Do toho bě „Wobydlerski komitej Solidarność“ z Lechom Wałęsu na čole dwaj měsacaj w Gdańšćanskej łódźnicy z knježerstwom za kulojtym blidom jednał. Hladajo na sylnu Solidarność z mjeztym dźesać milionami čłonow a na přiběracu njespokojnosć w kraju njewidźachu komunisća žanu druhu móžnosć, hač jednanjam z opoziciju přizwolić. Přiwšěm sej woni wuwojowachu, zo wobchowaja sej njewotwisnje wot wólbneho wuslědka 65 procentow mandatow w parlamenće. Opozicija docpě 35 procentow. Na­jebać to mějachu Polacy wólby za swobodne. Lěto pozdźišo sta so Lech Wałęsa z prezidentom Pólskeje.

wozjewjene w: Słowjanski wukraj
pjatk, 07 junija 2019 14:00

Přećiwo „dale tak“

Dopominam so hišće derje na september 2017, jako zwjazkowa kanclerka Angela Merkel po wólbach zwjazkoweho sejma před mikrofony stupi. Jeje CDU bě runje bolostne straty poćerpjeła, přiwšěm pak najsylniša móc w kraju wostała. Jeje słowa „Njewěm, što dyrbjeli hinak činić“ běchu runjewon typiske za kanclerku Merkel a za politiku scyła: Činimy dale tak kaž dotal! Najpozdźišo po wólbach Europskeho parlamenta je jasne, zo móže tajke nastajenje politisce smjertne być. List Budyskeho krajneho rady Michaela Hariga předsydce CDU Annegret Kramp-Karrenbauer je najlěpši dopokaz, zo knježi mjeztym tež na bazy CDU panika. Harig sej cyle wote­wrjenje žada Friedricha Merza za kanclerskeho kandidata nominować, a to nic hakle 2021. Prawdźepodobnje wón tež Kramp-Karrenbauer njepřicpěwa, jasny signal přećiwo wonemu „Činimy dale tak“ wusyłać. Hač to Friedrich Merz móže, dyrbimy wočaknyć. Marko Wjeńka

wozjewjene w: Kraj a swět
pjatk, 07 junija 2019 14:00

Pellegrini w Ruskej

Pětrohród/Bratislava (SŽ/K/SN). Słowakski ministerski prezident Peter Pellegrini je wot srjedy hač do kónca tydźenja na wopyće w Ruskej. Premiera přewodźeja rjad ministrow ze šefom diplomatije Miroslavom Lajčákom na čole kaž tež zastupnicy hospodarstwa. Pobywši prěni dźeń wizity w Moskwje přebywachu štwórtk w Pětrohrodźe. W Konstantinowskim palasće Kongresoweho kompleksa ruski prezident Wladimir Putin hosći oficialnje přija. Na jednanjach mjez hłowu ruskeho stata, wonkownym ministrom Sergejom Lawrowom a dalšimi na jednej a premierom Pellegrinijom, wonkownym ministrom Lajčákom a hospodarskim ministrom Peterom Žigu na tamnej stronje dźěše přede­wšěm wo strategiske a hospodarske naležnosće. Tak jednachu wo transiće płuna dźiwajo na nastawacu pipelinu Nord Stream 2 kaž tež wo přewostajenje paliwa za słowakske atomowe milinarnje. Peter Pellegrini je Wladimira Putina přeprosył na swjedźeń 75. róčnicy Słowakskeho narodneho zběžka přećiwo hitlerskej Wehrmachće, kotryž wotměje so nazymu w Banskej Bystricy.

wozjewjene w: Słowjanski wukraj
pjatk, 07 junija 2019 14:00

Zapósłane (07.06.19)

Nastupajo wabjenje w Budyšinje za folklorny festiwal „Łužica“ so Lucian­ Kaulfürst z Budyšina pjera jima:

W Budyšinje zahaji so 4. julija we 18 hodź. XIII. mjezynarodny folklorny festiwal. A tysacy Budyšanow a jich hosćo budu zaso při dróhach wot Póstoweho naměsta přez Žitne wiki, podłu Bohateje hač na Hłowne torhošćo stać. Wšitcy ći tón dźeń jenož do města přichwataja, zo bychu sej zahajenski ćah wjace hač 300 sobuskutkowacych z cyłeho swěta wobhladali a so na nim zawjeselili. Po swjedźenskim ćahu poda so wulki dźěl přitomnych sobu na Hród abo kaž lětsa, do Němsko-Serbskeho ludoweho dźiwadła, zo bychu tam krasny galaprogram dožiwili.

Tak daloko moja snano tróšku přehnata wizija, kotraž wšak we woprawdźitosći tróšku hinaša wupada, a to ma wšelake přičiny.

wozjewjene w: Zapósłane
Łobjo je bjezdwěla jedne z najwažnišich łódźnych zwiskow Europy. Podłu rěki wjedźe zdobom kolesowanska šćežka, wjeduca přez rjane města, kaž tule Drježdźany. Wjedrarjo wěšća, zo změjemy swjatki rjane wjedro za kolesowanje. Dalše móžnosće sport wukonjeć, zhonja zajimcy w brošurce „Němsku z kolesom sej wotkryć“. Foto: Sylvio Dittrich/ADFC

wozjewjene w: Serwis
pjatk, 07 junija 2019 14:00

Wo knihach a kniharni (07.06.19)

Srjedź meje je w Zarěčanskej Konsumowej galeriji jednaćelka Sakskeje literarneje rady­ dr. Sibille Tröml lětuši „Sakski knižny kófer“ předstajiła.

Wot lěta 2013 hižo wudawa wony Lipšćanski gremij wabjenske łopjeno, z kotrymž dwójce wob lěto na dźesać nowostkow ze Sakskeje skedźbnja. Su to knihi awtorow a přełožerjow, kotřiž ze Sakskeje pochadźeja abo tu bydla. Po tym, kajki poskitk runje je, su tam lyrika runje tak kaž proza, přełožki abo wěcne edicije zastu­pjene kaž tež knihi za dźěći a młodostnych. Wabjenske łopjeno w formje leporela pak nima jako „bestseller-lisćina“ fungować. Ma być skerje kompas, kotryž w mnóstwje nowowudaćow mału orientaciju skići a čitarjow wćipnych čini na bohatu literaturu awtorow a přełožerjow „wottud“. Ke kóždemu wudaću słuša tež ze wšěmi dźesać publikacijemi spakowany „realny“ kófer. Tón steji potom něhdźe dźesać tydźenjow w jednej z priwatnych kniharnjow abo na městnosćach, hdźež tež zarjadowanja přewjeduja.

wozjewjene w: Wo knihach a kniharni
pjatk, 07 junija 2019 14:00

Protyka (07.06.19)

Hač do 9.6.   25. mjezynarodne swjatkowne zetkanje VWjow na Lětońskim lětanišću

Pjatk 7.6. 18:00 Dźěłarnička k projektej „Lawski areal“ na žurli Budy­skeho Serbskeho domu

Sobotu 8. do 10.6.   Wjesny a swjatkowny swjedźeń w Pěskecach

   Błótowske bajowe nocy SLA pod Bórkowskej Bismar­ckowej wěžu

Sobotu 8.6. 10:00 Měšniska swjećizna Pětra Mróza w Drježdźanskej Dwórskej cyrkwi

  20:00 Koncert z Rolandom Kaiserom na Kamjenskej Pastwi­nej horje

Njedźelu 9. a 10.6.   Wjesny swjedźeń w Brěžkach

Njedźelu 9.6. 9:00 Primica Pětra Mróza w Kulowskej cyrkwi

  20:00 Koncert z Rolandom Kaiserom na Kamjenskej Pastwi­nej horje

Póndźelu 10.6.   Swjedźeń při młynje na kózłach (Bock­wind­mühle) we Łuze

  9:00 Putniska Boža mša serbskich wosadow na Róžeńčanskej putniskej łuce

  10:00 Tradicionalny koncert dujerskeje hudźby při hosćen­cu na Kamjenskej Pastwinej horje

  10:00 Młynski dźeń w Čornochołmčanskim Krabatowym młynje

  17:00 Předstajenje młodźinskeho dźiwadła „Přewrót w rjadowniskej stwě“ w Slepjanskej cyrkwi

Wutoru 11.6. 18:00 Koncert Maastrichtskeje a Wienskeje šole w cyrkwi­ klóštra Marijineje hwězdy w Pančicach-Kukowje

wozjewjene w: Protyka
pjatk, 07 junija 2019 14:00

Rozhłós (07.06.19)

njedźelu hornjoserbsce

11:00 Łužica tutón tydźeń, mjez druhim z powěsćemi tydźenja

11:20 Portret Pětra Mróza

11:45 Jakub a Matej so wubědźujetaj

12:00 Nabožne wusyłanje

 (Christoph Rummel)

po tym zbožopřeća

delnjoserbsce

12:30 Aktualny magacin

13:00 Błótowska železnica

13:40 Nabožne wusyłanje

 (Manfred Hermaš)

po tym zbožopřeća

póndźelu hornjoserbsce

9:00 Putniske kemše z Róžanta

11:00 Swjatkowny swjedźeń w Pěskecach, dźeń młynow a beachtura Radija Satkula

12:00 Wo błótowskich bajowych nocach

delnjoserbsce

12:30– Swójbny program z nabožnym    14:00 wusyłanjom (Ingolf Kśenka)  a wo křćiznach a konfirmaciji    w žiwjenju křesćana

wozjewjene w: Rozhłós
pjatk, 07 junija 2019 14:00

Sport (07.06.19)

Swjatkowna kopańca

Sportowe towarstwo Pěskecy přeprošuje lětsa prěni raz swjatki sobotu, wot 18 hodź. na kickerowy turněr z woprawdźitymi koparjemi a swjatki póndźelu, wot 13 hodź. na turněr wjesnych koparskich cyłkow.

Sport w Němskich Pazlicach

Towarstwo Natwar Němske Pazlicy přeproša sportowcow a přihladowarjow na nětko hižo 34. ludosportowu swjatkownu njedźelu, kotruž přewjedźe w tamnišim sportowym centrumje. Wot 10 hodź. chce tam 16 koparskich a sydom wolejbulowych mustwow mocy měrić. Mytowanje je za 17.30 hodź. planowane.

Běhaja wokoło jězora

wozjewjene w: Sport

Serbska debata

nowostki LND