Z wudaća: pjatk, 07 junija 2019

Zakónča projekt

Budyšin. We wobłuku wuměłstwoweho projekta „Swětło pozbudźa“ zaklinči jutře, sobotu, w 17.15 hodź. na hudźbnym nyšporje w Budyskej tachantskej cyr­­kwi kantata Johannesa Sebastiana Bacha „Ow, wěčny wohenjo, ow, žórło lu­­bo­sće“. Twórbu zanjese ewangelski tachantski chór ze solistami a hudźbnikami na historiskich instrumentach. Cyłkowny nawod změje Michael Vetter. K zakónčenju projekta „Swětło pozbudźa“ swjatkowničku, 9. junija, we 18 hodź. su wšitcy na ekumenisku Božu słužbu do tachantskeje cyrkwje prošeni. Prědować budźe Ludger Hinse. Cyrkwinskaj hudźbnaj direktoraj Friedemann Böhme a Michael Vetter hrajetaj na pišćelach.

Šwedojo přińdu

Wodorunje: 3 jusk, 5 powabna, 6 zelenišćo, 7 wobzorosměr, 10 drasta jurista-sudnika, 13 wašnje pisanja, twara, 14 satelit, 15 grat za wótřenje kosy

Padorunje: 1 přirodny zjaw w zymje, 2 ryba, 3 serbski kěrlušer (1721–1794), 4 Schleife (drasta) serbsce, 8 spisar, 9 zběrka zemjepisnych kartow, 11 12 měsacow, 12 forma nastupa

K swjatkam so Budyšin z čerstwymi barbami pisani. Sobudźěłaćerjo města su rabaty na wjacorych městnach z dohromady 20 000 kwětkami zwosadźeli. We wulkich sudobjach na Hošic hasy, na Bohatej, na Rathenauskim naměsće a druhdźe sadźichu samo rostliny, kotrychž płody móža sej wobydlerjo a hosćo wotšćipnyć. Foto: Diana Liebsch

Młyny najwšelakorišeho razu wotbłyšćuja, kak je čłowjek něhdy přirodnu móc wětřika a wody za sebje produktiwnje wužiwał. Swjatkownu póndźelu budu młyny zaso přistupne.

Bart (SN/MWj). Mjeztym hižo 26. raz wotměje so swjatki póndźelu po wšěm kraju dźeń młynow. Nimale 1 000 wětrnikow, wódnych młynow a dalšich budźe tón dźeń přistupne. Zaměr wot lěta 1994 stajnje póndźelu po swjatkach wotměwaceho so dnja młynow je, wusměrić kedźbnosć a zajim zjawnosće na tele techniske pomniki, kotrež su zdźěla starše hač 2 000 lět.

Tež w dwurěčnych kónčinach su někotre młyny přistupne, kaž wódny młyn Heika Vogela w Barće. Dokelž so wón jenož kóžde druhe lěto wobdźěla, budźe ćim zajimawše widźeć, što je tam zašły čas noweho nastało. Wopytowarjam chcedźa mjez druhim demonstrować, kak žito mjatu. Wo ćělne derjeměće so cyły dźeń z jědźemi a napojemi staraja, popołdnju poskića kofej a tykanc.

Wojerecy (SN). Wot tohole měsaca skupinu dweju wobydlerskeju policistow we Wojerecach dalši kolega zesylnja. Je to 42lětny policajski hłowny mišter André Kober, kiž je dotal při kontrolach na pućach w Kamjenskim a Wojerowskim rewěrje słužbu wukonjał. André Kober je nětko za wobłuk Wojerowskeho noweho města a za Ćisk přisłušny. Předewšěm we wjesnych dźělach Wojerec budźe jemu jeho serbska maćeršćina pomhać. Na kóždy pad so wón na swoje nowe nadawki wjeseli. Wobydlerjo móža so na njeho we Wojerowskim policajskim rewěrje wobroćić. Dohromady maja z nim nětko třoch wobydlerskich policistow w měsće, dweju muži a jednu žonu.

Wažne rozsudy na poslednim posedźenju gmejnskich radźićelow

Dźěwin (AK/SN). Poslednje posedźenje Dźěwinskich gmejnskich radźićelow we wólbnej dobje 2014–2019 bě wčera wšo druhe hač snano zabawne zakónčace zetkanje radźićelow. Město toho mějachu parlamentownicy wjacore do přichoda sahace wobzamknjenja na dnjowym porjedźe.

Tak woni z jednym napřećiwnym a jednym wzdatym hłosom wobzamknychu, zo maja popłatki za pohrjebnišćo w Brězowce znowa kalkulować. Wotpowědny nadawk dósta předewzaće za komunalne poradźowanje we vogtlandskim Reichenbachu. Po móžnosći hač do kónca lěta ma kalkulacija předležeć. Wobličenje płaći potom za Brězowske po­hrjebnišćo runje tak kaž za te w Dźěwinje. Po móžnosći wot klětušeho ma nowa kalkulacija płaćić. Reichenbachske předewzaće je tež hižo za Trjebinsku a za Slepjansku gmejnu popłatki za pohrjebnišća kalkulowała.

Dowolowe bydlenje njezapłaćił

Załom. Wotsrjedź zašłeho tydźenja bě 67lětny muž w Załomju swoje dowolowe bydlenje šěsć dnjow młodemu mužej přewostajił. Při tym wón z toho wuchadźeše, zo hósć posledni dźeń za přenocowanje w apartmenće zapłaći. Předwčerawšim pak sej přenajer bydlenja mysleše, zo prawje njewidźi. Njeznaty młody muž bě so rano zahe zhubił, bjeztoho zo by zapłaćił. Přewšo rozhorjeny 67lětny policiju zazwoni. Kriminalisća so po by­dlenju rozhladowachu a spytachu kmane slědy zawěsćić. Kaž policajska direkcija zdźěli, wučinja nastata škoda něhdźe 150 eurow. Pad nětko dale přepytuja.

Wojerecy. Nad pjenježnej podpěru 1 000 eurow smě so Wojerowska wódna straža wjeselić. Wotpowědny šek přepoda jej wutoru po swjatkach załožba Town& Country, podpěraca po cyłym kraju kóžde lěto 500 towarstwow a zarjadnišćow, kotrež so za dźěći a młodostnych zasadźeja. Wódna straža stara so wo wukubłanje młodych wuchowanskich płuwarjow z rozdźělnymi socialnymi wuměnjenjemi. W lěću zaručeja woni kupanje w jězorach a kupjelach kaž tež sanitetnu słužba na zarjadowanjach.

Countdown za wubědźowanje

Miłoćicy. Hišće hač do 12. junija móža dźěći w starobje pjeć do dwanaće lět swoje rysowanki a mólby za molowanske wubědźowanje składnostnje lětušeho klóšterskeho a swójbneho swjedźenja 23. junija w klóštrje Marijinej hwězdźe zapodać. Twórby z mjenom, adresu a starobu njech pósćelu zajimcy Křesćan­skosocialnemu kubłanskemu skutkej w 01920 Miłoćicach, Krótki puć 8. Jury najrjeńše dźěła wuzwoli a za nje 23. ju­nija atraktiwne myta přepoda.

Ponowja dróhu

Hory (UH/SN). 13. cyłoněmske zetkanje městow w gmejnow z mjenom Hory minjeny podlěšeny kónc tydźenja na Horach pola Wojerec słuša mjeztym k stawiznam. Dopomnjenki na tónle po­dawk pak njewostanu jenož we wutrobach wobdźělnikow, ale su takrjec do kamjenja zadypane. Dokelž słušeja Horjenjo k tym, kotřiž su tradiciske zetkanje hižo druhi raz organizowali, je sej wjesna rada z oficialnym poswjećenjom pomjatneho kamjenja něšto wosebite wumysliła. Wulki błudźenk z lodoweje doby, sponserowany wot Wojerowskich zastaranskich zawodow, steji blisko gratownje wohnjoweje wobory. Z wosom woponami dotalnych stajnych wobdźělnikow swědči wón na wšě časy wo wutrobnych zetkanjach w lěće 2019. Připrawić chcedźa hišće tak mjenowany QR-code, z kotrehož pomocu móžeš so internetnje wo wobdźělenych komunach informować. Přichodne zetkanje budźe za dwě lěće w porynsko-pfalcskim Bergenje.

 SERBSKE NOWINY – KÓNCTYDŹENSKA PŘIŁOHA
Pjatk, 7. junija 2019

Njeje za­­wěr­no lochko sudnik abo sudnica być. Štóž z was kopańcu hraje, wě wo tym zawěsće spěw spěwać. Podobne nazho­njenje mějachu minjenu sobotu Katja (Serbscy skawća „Alojs Andricki“), Feliks (mło­dźinski klub Wotrow), Marie-Luise (młodźinski klub Njebjelčicy) a Stanij (Serbski folklorny ansambl Wudwor). Woni two­rjachu jako čłonojo młodźinskeje přirady (su to zastupjerjo młodźinskich klubow a cyłkow) mału, ale přeswědčiwu jury za wubědźo­wanje „Přimaj so gratu!“. Cyłkownje štyri młodźinske skupiny běchu namołwu sćěhowali a požadachu so ze swojimi zajimawymi projektami wo přiražku z hornca partner­stwa za demokratiju, kotryž wobsahowaše tež lětsa zaso tysac eurow za serbski sydlenski rum.