Z wudaća: póndźela, 08 julija 2019

Awtor dźensa

Jan Hrjehor

„Nam je zakazane z liftom jěć“, powěda namaj Mo Krüger w schodźišću krajneho sćelaka MDR w Lipsku, jako běžimoj z njej ze štwórteho poschoda do přizemja centrale MDR. Tam maja nimo drastoweho fundusa a maski na přikład tež telewizijne studija, z kotrychž wusyłaja. We wobłuku dwutydźenskeho šulerskeho praktikuma mojeho syna­ smědźachmoj w sportowej redakciji MDR Aktuell hospitować, tam zamołwitym přez ramjo hladać a wotběhi dnja sćěhować.

Druhi raz chcychu wuknjacy Serbskeje wyšeje šule Budyšin na kóncu šulskeho lěta swój běh sponsorow přewjesć, z kotrymž zběraja pjenjezy za wšelake šulske projekty, počesćenja, mytowanja a zarjadowanja. Lětsa pak bě tak horco, zo dyrbjachu zamołwići sportowi wučerjo běh wotprajić. W nuzy zeschadźa jim myslička – z běha sponsorow sčinichu płuwanje sponsorow. A tak podachu so holcy a hólcy předposledni dźeń šulskeho lěta 2018/2019 do Budyskeje Sprje­wineje kupjele. Kóžda rjadownja měješe tam dźesać mjeńšin chwile koła po 50metrowskej čarje płuwać. Štóž płuwać nochcyše abo njemóžeše, tón je w chłódku wulkich štomow telko kołow běhał, kaž so jemu chcyše. Z nuzy nasta tak rjane sportowe wubědźowanje. Jan Hrjehor

Při poměrnje znjesliwych tempera­turach su kónc junija w Běłej (Biehla) za Ka­mjencom mjeztym hižo 16. nócny žabjacy běh přewjedli.

Lětsa je cyłkownje 999 atletow, mjez ni­mi­ 99 lubowarjow walkinga, do cila do­bě­žało. Šwarna ličba­ serbskich sportowčow a sportowcow bě zaso pódla. Sportowe wurisanje je tež zwjazane z wotpowědnymi kulturnymi a zabawnymi poskitkami na běhanskim arealu. Atleća běchu z wjacorych zwjazkowych krajow Němskeje, hłownje ze Sakskeje, z Braniborskeje a Berlina. Woni wubědźowachu so starobje wotpowědnje wot šulskich dźěći hač k 85lětnemu wuměnkarjej na 2,0 km abo 9,6 km. W skupinje pod dźesać lětami (U 10) wuwojowaštaj sej serbskaj šu­lerjej Jarek Schade z Budyšina prěnje­ (8:14 min) a Lisamaria Domanic z Wojerec dru­he městno (9:32 min).

Regensburg (B/SN). Pomocnej organi­zaciji Sea Eye a Sea Watch stej iniciatiwu „Cyrkej wuchowuje“ załožiłoj. Wonej chcetej so tak němskej cyrkwi za podpěru při wuchowanju ćěkancow na morju dźakować a angažement widźomny činić. Cyłkownje je Sea Eye lětsa 190 000 eurow wot cyrkwje dóstała. „Bjez njeje njebychu žane wuchowanske akcije móžne byli“, wuzběhny předsyda organizacije Gorden Isler. Bychu-li europske knježerstwa čłowjeske prawa runje tak chutnje brali kaž cyrkej poselstwo biblije, njebychmy trěbni byli.“ Křesćanske cyrkwje w Němskej su wažny partner pomocnymaj organizacijomaj. Ewangelska cyrkej na přikład je pytanske lětadło „Moonbird“ ze 100 000 eurami podpěrała.

Žada sej posłušnosć

Vatikan (B/SN). Bamž žada sej wot swojich diplomatow loyalnosć. Woni nimaja jeho zachribjetnje kritizować, so w blogach zwuraznić abo so do skupin zwjazać, kotrež so cyrkwi spřećiwjeja. To rje­kny swjaty wótc na posedźenju z nawodami pósłanstwow a stajnym wobkedźbowarjam Swjateho stoła.

Křesćenjo Nigera w straše