Z wudaća: pjatk, 09 awgusta 2019

Zeleni z ludźimi diskutowali

Budyšin. Předsydka frakcije w Bayerskim krajnym sejmje Katharina Schulze a zapósłanča Sakskeho krajneho sejma Franziska Schubert (wobě Zwjazk 90/Zeleni) stej wčera w Budyskim Serbskim domje pod hesłom „Zmužiće přichod tworić“ z wobydlerjemi diskutowałoj. Ně­hdźe dwaceći zajimcow je na přeprošenje Budyskich Zelenych přišło.

Widejowe dohladowanje zahajili

Zhorjelc. Z pomocu widejoweho dohladowanja chcedźa přećiwo kri­mina­liće w Zhorjelskim starym měsće bóle zakro­čić. Na mosće přez Nysu su dźensa prěnju kameru policije zaswěćili. Po słowach sakskeho nutřkowneho ministerstwa je to po cyłym Zwjazku jónkrótny projekt. W Zhorjelcu maja so štyri městnosće dohladować, hdźež su w zašłosći wjele přeńdźenjow registrowali.

Towaršnosć zašo wutworja

Neurologiska stacija Wojerowskeho klinikuma najwjace hłosow dóstała

Wojerecy (SN/mwe). Po přewšo napjatym wothłosowanju je nětko jasne: Najwoblubowaniši profijowy strowotniski personal Sakskeje maja we Wojerecach. Hladarjo chorych neurologiskeje stacije tamnišeho klinikuma Łužiska jězorina dóstachu we wothłosowanju „Najwoblubowaniši po­wołanscy hladarjo Němskeje“ mjez sakskimi wobdźělnikami najwjace hłosow. Nowinska rěčnica chorownje Juliane Kirfe Serbskim Nowinam zdźěli, zo bě šeflě­kar Wojerowskeje kliniki za neurologiju dr. Andreas Linsa mustwo hladarjow za onlinowe wothłosowanje nominował. To dźě je wuměnjenje, zo smě kóždy na wothłosowanju zajimowany nominowanym w starobje nad 16 lětami, bydlacym w Něm­skej a z wotzamknjenym hladanskim powołanjom abo w hladanju so wukubłacym we wěstym času we wotpowědnym internetnym portalu swój hłós dać.

Axel Arlt

„Wažny kriterij jenož za nadawk we Waliziskej: Znajomosće walizišćiny su trěbne, kandidaća bjez tajkich, kotřiž wšak su zwólniwi so zawjazać walizisku rěč wu­knyć, pak budu wobkedźbowani.“ Takle rěka we wulkim nawěšku, z kotrymž su britiskej wobchadnej instituciji a waliziske knježerstwo dźěłowej městnje społnomócnjeneho za transport za Walizisku a za sewjerozapadne regiony Jendźelskeje kónc julija w nowinje Metro wupisali.

Tajku informaciju z łužiskeje pers­pektiwy čitać – to tyje. Tamniše wašnje aktiwneho spěchowanja mjeńšinoweje rěče ani w Sakskej ani w Braniborskej ani w Zwjazku njeje. Wob­knježenje tu zakótwjeneje serbšćiny za kóždežkuli zastojnstwo w zjawnym sektorje ma wuměnjenje a narok rěčneje akceptancy być.

Póndźelu budźe konstituowace pose­dźenje 26. meje wuzwoleneho noweho sejmika Budyskeho wokrjesa. Krajny rada Michael Harig (CDU) potom wu­zwolenych wokrjesnych radźićelow spřisaha. Hłowny zaměr posedźenja je wu­měnjenja tworić, zo by gremij dźěłokmanosć docpěł.

Budyšin (SN/at). Nowy Budyski wokrjesny sejmik zestaja so z 98 wokrjesnych radźićelow a krajneho rady Michaela Hariga jako předsydy komunalneho par­lamenta. W nim dźěła sydom frakcijow. Bjezfrakcijnych radźićelow po zestawje we wobydlerskim informaciskim syste­mje wokrjesa w interneće žanych njeje. Po 29 čłonach najsylnišej frakciji stej AfD a CDU. Sćěhuja Swobodni wolerjo (11), Lěwica (10), SPD (8), FDP (6) a Zwjazk 90/Zeleni (5).

Radźićel Serbskeho wolerskeho zjednoćenstwa Jan Budar je so – kaž hižo jeho předchadnikaj Stefan Rjeda a Dawid Statnik – frakciji Swobodnych wolerjow přizamknył. Ta ma nimo frakcije CDU dweju čłonow, kotrajž skutkowaštaj w mi­njenym wo­krjesnym parlamenće w hinašej frakciji, Roland Dantz za Lěwicu a Veit Großmann za SPD/Zelenych.

Drježdźany (RŠ/SN). Nowu wustajeńcu Maje Nageloweje „komorne kruchi“ su wčera wječor w rumnosćach Drježdźanskeje krajneje lěkarskeje komory wote­wrěli. Něhdźe 90 ludźi, mjez nimi wjacori Serbja, bě přeprošenje sćěhowało.

Hudźbnik a komponist Wolfgang Heisig­ wobrubi wernisažu na swojej fonoli, 110lětnym, z pomocu papjerjaneje róle „samohrajacym“ klawěrje. Wobšěrne tworićelske dźěło Maje Nageloweje hódnoćeše Jörg Sperling, wěcywustojny kustos Zběrki tworjaceho wuměłstwa Choćebuskeho wuměłstwoweho muzeja Dieselowa fabrika. Dokelž pak njemóžeše sam přitomny być, předčita lawdaciju stawiznar wuměłstwa John Hinnerk Pahl. „Mjez sobu splećene – tak wuwiwa so tworjenje wuměłče Maje Nageloweje z dźiwapołnej mnohotnosću najwšelako­rišich wuměłskich technikow a w bohatych formach wuraza. Kaž čerwjena nitka ćahnu so rysy zwobraznjenych figurow přez jeje twórby. Njenućene pokazuja so w ­žiwej splećenosći mjez wšědnym a swět wopřijacym“, lawdator wuzběhny.

Berlin (dpa/SN). Zwjazkowy zličbowanski zarjad je po rozprawje medijow naćisk zakonja zwjazkoweho financneho ministra Olafa Scholza (SPD) kritizował, kiž chce přichodnje dawkowe spěcho­wanje slědźenskich předewzaćow zmóžnić. Zličbowanski zarjad dwěluje na tym, zo hodźi so zakoń efektiwnje a eficientnje zwoprawdźić, zdźěleja dźensa nowiny medijoweje skupiny Funke. Hospodarstwo pak sej hižo dlěje žada, slědźenske wudawki dawkowje spěchować.

Přećiwo Höckemu protestowali

Döbeln (dpa/SN). Sta ludźi su wčera přeći­wo wustupej durinskeho politikarja strony AfD w Döbelnje protestowali. Zało­žer prawicarskonacionalneho křidła w AfD Björn Höcke chcyše tam za pod­pěru kandidatow za Sakski krajny sejm wabić. Protest organizował bě zwjazk Dö­beln­ je pisany, kiž dósta prominentnu podpěru spěwarja skupiny Prinzen Sebastiana Krumbiegela. Wón je swój nowy spěw „Demokratija je žónska“ předstajił. zo by signal ze Sakskeje wusyłał.

Njesmětaj Turkowsku wopušćić

Naoe Nakasone a jeje dźowka Karin z Nago w južnej Japanskej stej dźensa, na dnju 74. róčnicy nadpada USA z atomowej bombu na město Nagasaki, wosebite rjećazki, wobstejace ze sfałdowanych papjerjanych žorawjow, poskićałoj. Žoraw je w Japanskej symbol nadźije. Foto: pa/ Kyodo

Rom (dpa/SN). Italski nutřkowny minister a šef strony Lega Matteo Salvini je populistiske knježerstwo w Romje do hłubokeje krizy wjedł. Wón je wotum Hibanja pjeć hwězdow w senaće wo žele­zniskim projekće za přičinu brał, koaliciju Lega a hibanja do prašenja stajić. Njestronski šef knježerstwa Giuseppe Conte Salvinijej wumjetuje, zo chce z postu­po­wanja profitować. Tuchwilu dźě žněje w ludnosći wulke připóznaće. Při nowych wólbach móhł so tuž ze šefom knježerstwa stać. Wo wólbach pak ma parlament rozsudźić. Tam chce so Conte prašenju dowěry stajić. Hdy so komorje zeńdźetej, hišće jasne njeje. Wšako su so politikarjo hakle do lěćneje přestawki rozžohnowali.

Hólcaj w starobje 12 a 13 lět je policija w Bonnje štwórtk rano w třoch lepiła, jako z awtom na parkowanišću tam a sem jězdźeštaj. Swědka bě zastojnikow na to skedźbniła. Kaž 13lětny policistomaj rozjasni, chcyštaj w awće jenož hudźbu słyšeć­, ale naraz bě so ručne borzdźidło pušćiło. Tak staj awto jenož zaso prawje zaparkować chcyłoj. Stawizničce hólčeca wšak policija cyle njewěrješe a dowjeze wobeju k maćerjomaj. Najskerje běštaj pachołaj wostudu pasłoj ...

Dwanaće lět stary pućowanski bus je policija wčera na awtodróze pola Berlina zadźeržała, dokelž měješe naboku wulku dźěru w nuzniku. Dno busa bě tak zerzawe, zo móhło so lochce přełamać. Nimo toho zwěsćichu zastojnicy dalše 14 njedostatkow. Na přikład zhubješe jězdźidło wolij, sydła běchu defektne a wěstotne pasy wjace njefungowachu.

Berlin/Waršawa (dpa/SN). Krótko do pla­nowanych jězbow po Europje prezident USA Donald Trump hrozy, swoje wojerske jednotki w Němskej dźělnje wotćahnyć. Wón ma za „njesprawne, zo woby­dlerjo USA ze swojimi dawkami ameriskich wojakow w Němskej płaća a Němska swój wikowanski nadbytk jeno za swoju domiznu wužiwa“, měni pósłanc­ USA w Němskej Richard Grenell. Do toho je pósłanča USA w Pólskej George­tte Mosbacher na socialnej syći Twitter rozpra­wjała, zo Pólska dwaj procentaj nutřko­krajneho bruttoprodukta zwjazkej NATO­ płaći, štož Němska nje­čini. Hižo w juniju bě Trump hrozył, w Němskej zaměst­njene wojerske jednot­ki USA do Pól­skeje přepołožić. Grenell Trumpej kaž tež Mosbacher přihłosuje.