Rozhlad změje nowe wobličo

pjatk, 02. decembera 2016 spisane wot:

Budyšin (SN/CoR). Lěto po tym zo je linguistka Sara Mičkec redakciju Rozhlada přewzała, chce wona wot klětušeho wuhotowanje serbskeho kulturneho časopisa změnić.

„Njeńdźe wo to, zwučene wobličo dospołnje na hłowu stajić a čitarjow wottrašić. Sym z wuhotowarku Aileen Burkhart, kotraž bě so hižo wo nowy layout Serbskich Nowin starała, wuradźowała. Zwěsćichmoj někotre dostatki, kotrež je wona z nowym naćiskom wurunała“, powěda šefredaktorka Rozhlada. Konkretnje potrjechja změny na přikład družinu a wulkosć pisma, rozrjadowanje stron kaž tež zasadźenje wobrazow.

Z nowym layoutom su zdobom techniske wuměnjenja za to date, zo hodźi so časopis přichodnje tež jako e-paper internetnje abonować. Na te wašnje budu wšitke přinoški inkluziwnje wobrazowy material tež online čitajomne. „Wobličo Rozhlada so jenož njewomłodźi, ale wotpowědujemy tež zwučenosćam tych, kotřiž medije radšo w digitalnej formje wužiwaja“, praji Sara Mičkec.

Płomjo so tež we Wojerecach pali

wutora, 29. nowembera 2016 spisane wot:
Redaktor Płomjenjom Pětr Šołta je so dźensa rano z Budyskeho Rěčneho centruma WITAJ na puć do Wojerec podał, zo by šulerjam 5. lětnika tamnišeho Lessingoweho gymnazija dźěćacy časopis zbližił. Na Wojerowskim kubłanišću podawaja w 5. a 6. lětniku serbšćinu jako druhu rěč; a wučerka Lubina Kühnowa so wjeseli, zo móže zhromadnje z holcami a hólcami jónu wob lěto redaktora witać, kiž jim dalši dohlad do žiweje serbšćiny posrědkuje. Foto: Gernot Menzel

Našim čitarjam

štwórtk, 13. oktobera 2016 spisane wot:
Mnohim abonentam je tuchwilna njespokojaca ćišćerska kwalita našeho wječornika nadpadnyła. Tole tež w naprašowanjach LND zwuraznichu. Kaž z Budyskeje Łužiskeje ćišćernje zhonichmy, su přičiny za to personalne wuskosće. Redakcija je ćišć wospjet reklaměrowała, ćišćernja dźěła na polěpšenju. Redakcija SN

Pilotowy projekt MDR šulerska akademija wotměje so tutón tydźeń prěni raz ze serbskimi šulerjemi. W kooperaciji z Budyskim Sakskim wukubłanskim a wupruwowanskim kanalom wuknje nimo Leje Šefrichec (srjedźa) a Antonije Wjeselic štyrnaće dalšich holcow a hólcow pod nawodom Andreje Chěžcyneje a Michała Cyža teoriju a praksu rozhłosoweho, telewizneho a online-žurnalizma. Woni chcedźa za radijo Satkula a telewizny magacin Wuhladko přinoški produkować. Foto: SN/Maćij Bulank

Gratulacije k jubilejej přijał

póndźela, 26. septembera 2016 spisane wot:
Dobre přeća je dźensa dopołdnja we Wětrowje serbski žurnalist Manfred Laduš (srjedźa) k jubilejnym­ 75. narodninam přijał. Nimo Ludoweho nakładnistwa Domowina­ a redakcije Serbskich Nowin, hdźež bě wón wjacore lětdźesatki skutkował, gratu­lowachu jemu bywši kolegojo, mjez druhim Alfons Wićaz (naprawo), a zastu­pjerjo serbskich towarstwow, mjez nimi Borbora Felberowa (2. wotlěwa) za Domowinu­, prof. dr. Dietrich Šołta (2. wotprawa) a Jurij Łušćanski (nalěwo) za Maćicu­ Serbsku. Foto: SN/Maćij Bulank

SN znowa dobyli

póndźela, 26. septembera 2016 spisane wot:

Berlin/Budyšin (SN). Serbske Nowiny su tež lětuše wubědźowanje Zwjazka žurnalistow Němskeje (DJV) „Fotografojo maja mjeno“ dobyli. Kaž piše DJV w nowinskej zdźělence, zdoby sej naš wječornik ze 100 procentami dokładnje podatych mjenow fotografow 1. městno a tak „dotal njeznaty rekord po cyłej Němskej“. Na dalšich městnach slědowaštej, to­horunja z dobrymi wuslědkami, BILD (wudaće Lipsk) z 90 procentami a Neues Deutschland z 88 procentami prawych podaćow. Wuhódnoćił bě kruh fotowych žurnalistow DJV wudaće dźenikow w Němskej z 8. septembra 2016.

Po lońšim dobyću zamóchu Serbske Nowiny swój wukon samo wo šěsć procentnych dypkow stopnjować, kaž bě to šefredaktor SN Janek Wowčer na mytowanju lětsa w měrcu připowědźił. „Dobry přikład Serbskich Nowin dopokazuje, zo je wobkedźbowanje prawow mjenow fotografow móžne a zwoprawdźomne“, po­twjerdźi zwjazkowy předsyda DJV Frank Überall. „Namołwjamy tuž znowa wšitkich wudawaćelow a šefredakcije, korektne podawanje mjenow fotografow w swojich agendach cyle horjeka zaměstnić.“

„Serbski Oertel“ z knižku počesćeny

wutora, 20. septembera 2016 spisane wot:

Wjelelětneho serbskeho sportoweho žurnalista a rozhłosownika Měrćina Štrawbu su wčera w Radworju składnostnje 73. narodnin z wosebitej knižku wo jeho žiwjenju a skutkowanju počesćili­.

Radwor (SN/MkWj). Kak hódnoćiš žiwjenski skutk čłowjeka, kiž bě w Serbach swojeho dźěła, ale tež swojeho hibićiweho a wotewrjeneho wašnja znaty a připóznaty kaž lědma štó druhi? Něhdźe pjatnaće přećelow a něhdyšich kolegow je wčera do Radworskeho Słodeńka přišło, zo bychu Měrćinej Štrawbje k 73ćinam gratulowali a jemu brošurku z titulom „Serbski Oertel“ přepodali. W njej su swoje dopomnjenki na narodninarja znosyli, kotremuž bě němski sportowy reporter Heinz Florian Oertel stajnje z wulkim přikładom. Mjez awtorami su mjez druhim Jan Macka, Mikławš Krawc, Jurij Nuk, Józef Šwon a dr. Beno Wałda.

Pisać a prajić, što je

štwórtk, 15. septembera 2016 spisane wot:
Wosebje, hdyž so w njepo­srěd­njej bliskosći něšto stawa, štož so do našeho swěto­nahlada njehodźi, njeje dźěło žurnalistow lochke. Tole wujewi wčerawši medijowy diskusijny forum w Budyšinje. Je derje sej w tajkich situacijach wuwědomić, što je poprawny nadawk žurnalista: mjenujcy pisać a prajić, što je. To tež spytam, bjez toho zo bych neutralnosć, wěcownosć a objektiwnosć w na­ležnosći zhubił. Zwjetša so to radźi. Dru­hdy pak móličke słowo rozsudźi, hač njezawinuju lawinu hrózby. Dokładnosć je tuž najwažniši srědk. Čas, fakty pruwować, je drje často krótki, přiwšěm pak mam tule winowatosć a dyrbju dru­hdy wočaknyć. Dowěra čitarjow je mi a našemu wječornikej wažna. Runje tak wažne je, zo naše dźěło kritisce sćěhuja a praja, što so jim lubi abo njelubi. Za to je rubrika Za­pósłane. Pisajće nam tuž! Waše měnjenje je nam wažne! Janek Wowčer

24. julija 2016 zemrě w Budyšinje Zala Bušic. Zrudźaca to powěsć a njewočakowana za přiwuznych, přećelow a znatych, za bywše koleginy a bywšich kolegow, wosebje pak za słucharki a słucharjow serbskeho rozhłosa. Předewšěm za dźensnišu staršu generaciju bě Zala lětdźesatki(!) jako rěčnica z jónkrótnym, ćopłym hłosom takrjec „hłós serbskeho rozhłosa“.

Wjele zboža

póndźela, 27. junija 2016 spisane wot:
Budyšin (SN/JaW). Po poslednjej hrě Serbskeje koparskeje wubranki muži pjatk w Sankt Johannje su SN a Serbski rozhłós dobyćerjow zhromadneje akcije k europeadźe zwěsćili. Dobyła je trikot a bul z podpismami hrajerkow a hrajerjow Odette Kriegel ze Sepic. Jako jenička bě wona prawje tipowała, zo serbske koparki połfinale njedocpěja. Z dalšich dopisow zwěsći kapitanka žónskeje wubranki Janika Bětnarjec Pětra Lebzu z Róžanta jako dobyćerja trikota a bula. Wutrobnu gratulaciju!

nawěšk

  • Jara awtentiske běchu poskićenja ansambla Zabava z Ruskeje.
  • Na zahajenju festiwala štwórtk w Budyskim NSLDź počesćichu přitomni Juraja Kubánku (3. wotprawa) z trójnej serbskej sławu.
  • Hosćo z Peruwa zbudźichu ze swojimi přewšo pisanymi kostimami tójšto zajima.
  • Pólski cyłk z Bolesławieca na štwórtkownym swjedźenskim ćahu k zahajenju festiwala "Łužica 2019" po Budyšinje
  • Algeričenjo na jewišću NSLDź
  • Rejwarjo z Boliwiskeje
  • XIII. mjezynarodny folklorny festiwal "Łužica 2019" je zahajeny. Tule namakaće impresije z prěnich wustupow wobdźělenych skupin. Tule předstajichu skupiny štwórtk dopołdnja w Němsko-Serbskim ludowym dźiwadle hižo raz dźěćom swoje poskićenja, na wobra
  • Rejwarki a rejwarjo Serbskeho folklorneho ansambla Wudowor su zdobom hosćićeljo festiwala.
  • Rejwarki a rejwarjo z pólskeho Bolesławieca
  • Zajim zbudźi tež skupina ze Sewjerneje Makedonskeje
  • Dalši hosćićeljo łužiskeho mjezynarodneho festiwala: Serbska rejwanska skupina Smjerdźaca z hudźbnikami folklorneje skupiny Sprjewjan
  • Překwapjenka běchu mnohim wuměłcy z Peruwa.
  • Prěni raz spožčichu lětsa zarjadowarjo mjezynarodneho folklorneho festiwala wosebite myto a diplom za wurjadny wuměłski wukon. Jón dósta słowakski ansambl Bobańovci za swoju přirodnosć, awtentiskosć a originalitu.
  • Rejwarjo algeriskeho cyłka Couleurs d‘ Algerie
  • Boliwiscy rejwarjo a rejwarki w kostimach na jewišću
  • Boliwičenjo "in action"
  • Sobotu wječor běchu po Chrósćicach mnozy nadróžni muzikanća po puću.
  • Pólski młodźinski orchester z Leśnicy zahaji sobotny wječor na farskim dworje.
  • Tójšto ludźi zhromadźi so na programy na jewišću při gmejnskim zarjedźe ...
  • ... a wobhlada sej poskićenja skupin.
  • Na Koklic statoku předstajichu so tež čłonojo skupiny Wotała. Wšitcy z nich su bywši rejwarjo Smjerdźečanskeje rejwanskeje skupiny.
  • Smjerdźečanscy rewjarjo na jewišću pola Koklic
  • Pohlad z jewišća na dwór Wjeselic statoka
  • Na Zahrodnikec-Grutekc statoku pokaza mjez druhim tež Slepjanski folklorny ansambl dźěle swojeho programa.
  • Tež Slepjanscy wuměłcy hižo zahe na dorost mysla.
  • Wšitcy sobuskutkowacy słowakskeho ansambla Bobańovci zamóža znajmjeńša jedyn instrument piskać, spěwać a rejwać.
  • Na Kralec statoku knježeše čiła atmosfera.
  • Schow před krótkim dešćom pytachu sej tež hosćo na Kilankec statoku pod wulkimi předešćnikami.
  • Pólscy hosćo z pokazku ze swojeho programa na Kilankec statoku
  • Wo tym, zo bě sej na lětuši festiwal sobotu a njedźelu do Chrósćic wjac hosći dojěło hač hewak, swědčachu kopate połne parkowanišća.
  • Kultura zwjazuje, kaž tule Smjerdźečanskej rejwarce a algeriskeho rejwarja.
  • Sčasami nimale přepjelnjeny bě Koklic statok.
  • Wudworscy při poslednich přihotach na sobotny wustup na farskim dworje.
  • Wudworscy na farskim dworje
  • Jewišćo při gmejnje bě stajnje derje wopytane.
  • Rjanolinki-rejwarki Smjerdźečanskeje rejwanskeje skupiny
  • Serbska reja je jewišću při gmejnje tójšto pasantow do rejki prosyła.
  • Lóze hólcy wječor na jewišću Zahrodnikec-Grutkec statoka
  • Kabaretna skupina Lózy hólcy pokazachu přitomnym we wobłuku programa "Chróšćan special" na Zahrodnikec-Grutkec statoku, zo njejsu w běhu lět ničo zabyli
  • Na Wjeselic statoku zahudźi skupina NIMO ...
  • ... band wokoło Brězanec bratrow Józefa a Jana.
  • Tež němska skupina Slapstickers pokaza, što zamóže.

nowostki LND