Pačić, šćěpića rozkoćować

pjatk, 25. awgusta 2023 spisane wot:
Bosćan Nawka

Pačenje. Kajke to wulke słowo za fenomen, kotryž so tele dny po wšěm zdaću přiběrajcy wšudźe, haj samo w serbskej Łužicy jewi. Pačenski potencial přicpěwachu a přicpěwaja na nadal njerozrisanemu konfliktej Domowiny a Serbskeho sejma, hdyž nic hižo wutworjenju parlamenta samoho. Film wo tradiciji/nałožku/nyšporje jutrowneho jěchanja, kotrež žony wuzamkuje, je runje tak horce diskusije wuskutkował kaž rozmyslowanje wo „změnje“ serbskeje hymny. A hakle tele dźenderowanje! A je da z připadom, zo móžetej „pačić“ a „šćěpić“ samsnu činitosć wopisować? Najnowše šerjenje je pječa sakrosanktna serbska narodna drasta – štož tola trochu zadźiwa, wšako buchu nowe designy mjez druhim Wurlawow abo Serbskeho konsuma dotal skerje witane dyžli zatamane. Kaž woprawnjeny strach wěsteho rozkoćenja snano był: Wjetšinje ludźi su tajkele debaty prosće: smorže. To płaći za Łužicu runje tak kaž za Němsku a za wulki dźěl Europy. Čim wótřišo někajka skupinka swoje často wšo druhe hač wěcowne měnjenje do swěta trubi, ćim mjeńša wona husto je.

Z chatbotom do dowola?

pjatk, 18. awgusta 2023 spisane wot:
Bianka Šeferowa

Zahubne lěsne wohenje, powodźenja a julij, kiž bě globalnje z wotstawkom najhorcyši dotal měrjeny měsac. Klimowi fachowcy su mnohe aktualne wuwića wěsćili, tola nětko su přiwšěm wot jednotliwych podawkow překwapjeni. Minjeny pražnik bě po podaćach EU-programa za wobkedźbowanje zemje Copernicus w globalnym přerězku 16,95 stopnjow ćopły a z tym něhdźe 0,33 stopjeń horcyši hač julij 2019 (16,63 stopjenjow). Tuž je to nowy rekord. Zawěsće sće w zašłym dowolu tohorunja tón abo tamny wjedrowy ekstrem dožiwili.

Dopóznaća drje nowe njebudu

pjatk, 11. awgusta 2023 spisane wot:
Axel Arlt

Serbski sejm pyta wuměnu nazhonjenjow nastupajo kulturnu a kubłansku awtonomiju we wuchodnej Belgiskej. Kónc septembra chcedźa sej sejmarjo na přeprošenje Załožby Slavonic Europe hromadźe z dalšimi łužiskimi zajimcami tam dojěć. Wupruwowanaj rozmołwnaj partneraj nastupajo samozarjadnistwo etniskeje mjeńšiny budźetaj znowa Němskorěčna zhromadnosć a Oliver Paasch, jeje ministerski prezident, w Eupenje.

Mjeno Olivera Paascha někotrym Serbam njeje njeznate. W septembrje 2008 wužichu čłonojo Zwjazkoweho předsydstwa Domowiny a sobudźěłaćerjo jeje zarjada – hromadźe z dźěłarnikami a zastupjerjomaj Budyskeho wokrjesa – składnosć, na přeprošenje Němskeho zwjazka dźěłarnistwow (DGB) Sakskeje so wo połoženju Němcow we Waloniskej wobhonić. Paasch běše skupinu tehdy z předsydu Domowiny Janom Nukom, Budyskim krajnym radu Michaelom Harigom a šefom DGB Sakskeje Hanjom Lucassenom na čole jako minister Němskorěčneho zhromadźenstwa za wučbu a wědomostne slědźenje witał.

Direktor něhdy prawje wěšćił

pjatk, 04. awgusta 2023 spisane wot:
Marian Wjeńka

Młodźi ludźo, kotřiž chcedźa powołanje nawuknyć, su w tutym tydźenju swoje wukubłanje zahajili. Po rjanym šulskim času rěka za nich nětko wšědnje na dźěło chodźić respektiwnje powołansku šulu wopytować. Zwjetša móžachu sej woni swoje powołanje, kotrež chcedźa rady nawuknyć, wupytać, runje tak kaž wukubłanski zawod. W tym nastupanju su woni w jara zbožownym połoženju. To bě před lětami hišće cyle hinak. Dopomnju so derje na nowinarske rozmołwy na Budyskim dźěłowym zarjedźe kónc 1990tych lět. Tehdyši direktor dr. Günter Irmscher lěto wob lěto ličby wozjewješe, kelko młodostnych žane wukubłanske městno njeměješe, dokelž bě prosće přewjele ludźi za přemało městnow. Runočasnje wón wěšćeše, zo so to za 20 lět změni a zo budźe potom nawopak, mjenujcy zo budźe přemało zajimcow za poskićene městna. Tak prawje předstajić sej to tehdy lědma štó móžeše. Dźensa je ­tale situacija realita. Wšudźe pytaja wukubłanych fachowcow runje tak kaž ­wučomnikow.

Prózdniny su tež dobry čas za rěč

pjatk, 28. julija 2023 spisane wot:
Marcel Brauman

Rěč wutroby mojeje wowki z nanoweje strony běše platt. We wysokej starobje pak hižo nikoho njeměješe, z kotrymž by platt bjesadować móhła. Ja běch jedyn z poslednich, kotrymž móžeše wona znajmjeńša platt powědać, wšako wšo rozumjach – dźakowano prawidłownym lětnim prózdninam jako dźěćo pola přiwuznych we westfalskej wjesce, hdźež bě moja wowka wotrostła. Jich rěč so mi najprjedy jako měšeńca z nižozemšćiny a jendźelšćiny zdawaše. Woni drje twjerdźachu, zo so prócuja, z tym Hamburgskim hólcom „ryzy němsce“ rěčeć, ale tajki jazyk ze sewjeroněmskeje metropole njeznajach.

Swjate su mi twoje žorty

pjatk, 21. julija 2023 spisane wot:
Marko Wjeńka

Zbóžny tón, kiž móže so swojim słabosćam sam smjeć. Tole nazhonjamy stajnje zaso, hdyž sej Serbja na swjedźenjach ze spěwom „Ty sy tajka wikotata, ja pak tajki njejsym“ ze swojim ludowym humorom tak porjadnje sami nadawaja a so k tomu wutrobnje směja. Před lětami přewjedźene zhromadne młodźinske sportowe wubědźowanje delnich a hornich Serbow bě znamjo, zo móžemy tež na rozdźěle mjez Hornjej a Delnjej Łužicy bjeze wšeho z humorom zhladować, hłowna wěc, zo so w zasadnych prašenjach zaso znjesemy.

Kak pak so nam dźe, hdyž nas druzy na runje samsne wašnje wusměšuja, hdyž je rozestajenje mjez Serbami dźěl inscenacije, na kotruž ludźo takrjec wot wonka zhladuja – a so nam wošćěraja.

Wažny hłós za serbske zajimy

pjatk, 14. julija 2023 spisane wot:
Axel Arlt

Znajmjeńša za Braniborsku płaći wuprajenje, zo su społnomócnjeni za serbske naležnosće na krajnej a wokrjesnej runinje wažny hłós, dźe-li wo naležnosće našeho ludu. Na to je knježerstwowy społnomócnjeny, statny sekretar Tobias Dünow tydźenja na konferency z kolegowkami z wokrjesow a bjezwokrjesneho města Choćebuza w Złym Komorowje wuraznje skedźbnił.

Gremij je list Budyskemu krajnemu radźe Udej Wićazej schwalił, kotryž poćahuje so na tehdy aktualne połoženje nastupajo přikrótšenje personalneho městna tudyšeje społnomócnjeneje. Mějićelku zastojnstwa z jenož poł městnom, to w Delnjej Łužicy hišće dosć derje znaja. A tohodla njeje wopisowanje swójskich (braniborskich) nazhonjenjow žane mudrowanje wo tym, štož w Budyskim wo­krjesu snano klaca. Zakonsce zakótwjene rjadowanje, zastojnstwo serbskich społnomócnjenych z połnym městnom we wokrjesach Sprjewja-Nysa, Hornje Błóta-Łužica, Dubja-Blóta a w měsće Choćebuzu wutworić, je jich skutkowanje kwalitatiwnje a kwantitatiwnje njesměrnje polěpšiło. Tež to z lista jasnje wuchadźa.

Widźomnosć swjećić

pjatk, 07. julija 2023 spisane wot:
Milan PawlikŠto by so dźensa jako tema za tutón stołpik lěpje hodźało, hač rozmyslowanje wo słowje folklora? Wčera dźě je so wón zahajił: naš „kulturny wjeršk lěta“ – Mjezynarodny folklorny festiwal Łužica! Dotalne rekordy, štož ličbu wopytowarjow nastupa, buchu hižo w předpředani zastupnych lisćikow přetrjechene. Dobre to znamjo – ničo njeje sobuskutkowacym wjetše myto, hač wulka ličba wopytowarjow! Po definiciji je zapřijeće „folklora“ kumštne słowo z časa romantiki a zestaja so z dweju jendźelskeju słowow: „folk“ = lud a „lore“ = sposrědkowanje abo wěda. Wone wopisuje imaterielne kulturne herbstwo wěsteho ludu abo nabožneje skupiny. Cyle w zmysle tuteje definicije smy z nahladnej ličbu našich swjedźenjow a nałožkow zapisk do němskeje lisćiny imaterielneho kulturneho herbstwa UNESCO docpěli. Wot lěta 2003 spěchuje UNESCO „widźomnosć a wuwiwanje žiweho narodneho herbstwa.“ XIV.

Dyrbimy sej dowol zasłužić?

pjatk, 30. junija 2023 spisane wot:
Bianka Šeferowa

Lědma bywaja dny zaso dlěše a rjeńše, sej ludźo tójšto předewzaja. Štož w chłódnych měsacach móžno njebě, chcemy po móžnosći předewšěm w lěću nachwatać. Tola, štóž je po wječorach stajnje wuknihowany, tón je skerje wučerpany. A nětko su bórze prózdniny. Čas před tym je za swójby přidatnje zwjetša jara hektiski a połny terminow. W šuli dźěći hišće raz z połnej paru dźěłaja, tohorunja ma so do dowola hišće něšto zrjadować. Rozžohnowanske swjedźenje w pěstowarni. Planować, organizować, nakupować, kófry pakować – zasadnje je kóždy jednotliwy dypk rjany, tola přewjele naraz strowoće njetyje. Trochu stresa wšak derje čini, wón nas samo pohonja, tola to njeměł trajny staw być. Dyrbjeli tuž wuwaženy poměr mjez měrom a stresom docpěć a snano tež raz něčemu „ně“ prajić.

Wušparanja ze swójskej milinu

pjatk, 23. junija 2023 spisane wot:
Marian Wjeńka

Sće sej minjene dny rjane lětnje wjedro z wjele słóncom prawje lubić dali? Ja so tak prawje přez nje wjeselić njemóžach, haj poprawom je mi při telko słóncu wutroba bolała. Přičina je solarna připrawa, kotruž mjeztym dobry měsac na třěše našeho domu mamy. Sym na tymle městnje hižo raz wo tym pisał, zo smy so za tajku připrawu rozsudźili. Mjeztym ju mamy – ale wužiwać ju njemóžemy, hačrunjež wona bjezporočnje funguje, kaž bě při prěnim pospyće widźeć. Čakamy mjenujcy na digitalny milinowy ličak, kiž na jednym boku zwěsća, kelko miliny ze syče bjerjemy a na tamnym boku kelko miliny ze solarnych platow do syče dawamy. Mjeztym wjacorych znaju, kotrymž so runje tak dźe.

Dalši problem je naš stary analogny milinowy ličak. Při prěnim tesće solarneje připrawy zwěsćichmy, zo so ličak wróćo wjerći, dokelž w nim žana zawěra za­twarjena njeje. To pak w Němskej dowolene njeje. Hewak móhł znajmjeńša swoju milinu w domje sam přetrjebać a tamny dźěl takrjec do syče darić. Ale ně, dyrbju dale čakać, připrawa na třěše je hasnjena a milinowy ličak so pěknje dale wjerći – doprědka wězo.

Serbska debata

nowostki LND