Peter Čačko rozprawja z Bratislavy za SN
Serbske pomjenowanje wosmeho měsaca lěta „žnjenc“ so mi jako nastork za moju kolumnu derje hodźi. Hdyž su naši ratarjo pola jednotliwych družin žita poměrnje dobre wunoški měli, da je Słowakska hospodarsce w awgusće zawěrno wurjadny wuslědk nažnjała. Njenadźicy zamó wona indiskeho mějićela britiskeje awtomobilownje Jaguar Land Rover za to zdobyć, swoju nowu fabriku natwarić pola nas a nic w Čěskej, Pólskej abo Madźarskej. Mjeztym štwórta twornja awtow pod Tatrami nastanje pola Nitry, za čož nałoži předewzaće hobersku sumu pjenjez, 1,4 miliardy eurow. 5 000 ludźi změje tam dźěło a budźe počasu lětnje hač do 300 000 luksusowych wozydłow zhotowjeć.
Na polu sporta my tohorunja dospołnje njenadźicy wulki wuspěch žnjeli. Na swětowych mišterstwach w lochkoatletice w Pekingu doby w disciplinje 50 kilometrow chodźenje słowakski reprezentant Matej Tóth złotu medalju. Po lětach njepřitomnosće w medaljowym špihelu je Słowakska w nim tuž derje zastupjena, ze samsnym zaměstnjenjom kaž bratrowska Čěska.