Tak smy zaso hornjoserbske słowo lěta namakali. Tute hłosowanje so mi jara lubi, to je wašnje, ludźi z rěču zwjazować. Njeznaju pak dołhodobne wuslědki: Kóžde lěto namakaja so dwanaće słowow, ale wužiwaja je ludźo woprawdźe? Dopomina so hišće něchtó na sobukandidatow šmóratka? Ja nic. A wužiwa so šmóratko aktiwnje w rěči? W nowinach to widźu, w swojej generaciji štyrcećilětnych to słyšu, ale ći młódši to – kaž je mi přećel z tamneje generacije wujasnił – njepraja. Ale o.k., šmóratko je nowe słowo za nowu realitu. Dobyćer 2021 běchu běrneple, štož je jenož žort wostał. Nó haj, to wšo lěpje znajeće hač ja. Ale zašłej dwě lěće stej za mnje-Čecha hižo zajimawšej:

Waršawa (dpa/SN). Policija je w Pólskej dweju wot sudnistwa zasudźeneju zapósłancow a něhdyšeju čłonow wotwoleneho knježerstwa PiS zajała. Wobaj běštaj sej do toho do prezidentskeho palasta wućeknyłoj. Policija je wobeju w palasće zajała. Prezident Andrzej Duda, kiž pochadźa z rjadow PiS, bě dopołdnja bywšeho nutřkowneho ministra Mariusza Kaminskeho a toho statneho sekretara Macieja Wasika w prezidentskim palasće přijał, ­jako chcyše policija jeju do jastwa dowjezć. Waršawske sudnistwo bě wobeju w decembru znjewužiwanja zastojnstwa dla k jastwu dweju lět zasudźiło. Nětko měještaj swoje chłostanje nastupić.

Ministerski prezident Donald Tusk statnemu prezidentej Andrzejej Dudźe wumjetuje, zo je zajeće politikarjow haćić spytał. „Apeluju na Was, knježe prezidento, skónčće tutón spektakl, kotryž móže nas do strašneje situacije wjesć“, rjekny Tusk we Waršawje. Wón warno­waše Dudu a předsydu PiS Jarosława ­Kaczyńskeho, zo změjetaj so za swoje zadźerženje zamołwić. Duda porno tomu je sej wěsty, zo jemu zastojnstwo dowola, wusud sudnistwa ignorować.

Marek Krawc rozprawja wo aktualnje rozjimanych temach w Čěskej

Praha. Češa měli w referendumje wo zawjedźenju eura wothłosować, dokelž je to demokratiski srědk, kotryž wobkedźbuje měnjenja ludźi, přeje sej Alena Schillerová, bywša financna ministerka ze strony ANO. Politikarka skedźbni na naprašowanje Centruma slědźenja za měnjenjemi z lońšeho junija, w kotrymž běchu so tři štwórćiny wobydlerjow přećiwo nowej měnje wuprajili. „Euro njeje tema w našej stronje. Budźemy wojować za čěsku krónu, dokelž je sylna měna“, je sej Schillerová wěsta. Zdobom podšmórny, zo maja někotre kraje europasma rozdźělny hospodarski a płaćenski niwow a zo su bóle zadołžene hač Čěska.

Waršawa (dpa/SN). Naležna próstwa zwěrjatownje w Pólskej wo pomoc hladajo na bližacu so žołmu šćipateje zymy je 120 psam nachwilnje nowe doma wu­njesła. Pomocnicy su wot wuspěcha ­„Akcije zyma“ přemóženi, sćelak TVN24 njedźelu rozprawješe. Hodźiny dołho ­běchu ludźo kónc tydźenja před zwěrjatownju w Krakowje w dołhich rynkach čakali, zo bychu sej psa wotewzali. Wšitke psy su ćopły přebytk namakali, rjekny zastupowaca nawodnica zwěrjatownje Małgorzata Paletko sćelakej.

Juh Pólskeje bědźi so tuchwilu ze žołmu zymy. W nocy móža temperatury z městnami hač na minus 16 stopnjow spadnyć. Hižo minjeny pjatk bě dom zwěrjatow KTOZ w Krakowje w socialnych medijach wo pomoc prosył. „Dokelž bydla někotre z našich zwěrjatow we wotewrjenych klětkach, dyrbimy je nuznje w ćopłych rumnosćach zaměstnić. Móžnosće zwěrjatownje pak su wokomiknje wučerpane“, zamołwići informowachu. Njedźelu wječor zdźělichu, zo su wšitke psy pola ludźi priwatnje zaměstnić móhli. „Smy njesměrnje dźakowni a hnući“, zwěrjatownja piše.