110nica najstarša narodninarka

srjeda, 15. apryla 2015 spisane wot:

NAJSTARŠA wobydlerka Čěskeje je tele dny žohnowane 110. narodniny dožiwiła – Plzenjanka Marie Behenská. Zawěrno přewšo žadny jubilej woswjeći staruška doma w kruhu syły swójbnych a přiwuznych, ma dźě jako mać syna a dźowki horstku wnučkow, tři prawnučki a samo hižo dwaj praprawnučkaj. Hdyž wnučka Jindřiška Jicovovcá narodninarce přispomni, „wowka, swjećiš dźensa 110ćiny“, wopraša so ju ta zadźiwana „kak da je tole móžno?“. Z posměwkom dósta na to wotmołwu, „maš dobre geny“, piše nowina Mladá fronta dnes. Gratulować přišłoj běštaj tež starosta měšćanskeho dźěla Plzeň-Slovany a senator Lumír Aschenbrenner. Wšěch je jubilarka w přijomnym křesle sedźo witała. Rědku starobu docpěwši drje Marie Behenská hižo njewidźi, špatnje tež słyši a mało powěda. Njetrjeba pak łožo pasć a móže so z pomocu zepěry w bydlenju sama pohibować. Dźakowano swójbnym móže wona trajnje doma přebywać. Při jeje zastaranju podpěruje swójbnych hladarka z měšćanskeho zarjada socialnych słužbow. Kedźbyhódne wšak je, zo njewužiwa knjeni Behenská hač do dźensnišeho dnja žane lěki.

Strowše jědźe na postupje

štwórtk, 09. apryla 2015 spisane wot:

KNEDLIKI ze swinjacej pječenju a kisy­ka­łom – abo „vepřo-knedlo-zelo“, kaž Češa swojej daloko a šěroko drje najznaćišej a přisamom narodnej jědźi rěkaja – njejsu hižo čisło 1 na jědźnej karće. W zašłych pjeć lětach je dóšło k bjeze wšeho spomóžnej změnje do toho směra, zo požiwaja ludźo zaměrnišo lóše a strowše žiwidła. Tak jědźa husćišo rybu abo běłe mjaso a k tomu čerstwu zeleninu. Tež wo běrny hižo tak jara njerodźa kaž hišće před poł lětdźesatkom a faworizuja nětkole­ bóle łušćinowe płody chiba rajs. Časćišo zajimuja so tohorunja wo to, hač su so za jědźe kwalitne a čerstwe surowizny wužiwali. Tole wujewi so po medijach z programa FOOD, organizowaneho wot Europskeje unije. Za to su w Čěskej w přibližnje 700 hosćencach dopóznaća zběrali a na wšěch 8 500 ludźi so prašeli. W jědźernjach a hosćencach wobjeduje bjezmała 66 procentow wšěch čěskich dźěławych wobydlerjow. To je europski rekord, dźiwajo na to, zo wučinja tónle podźěl w druhich statach jeničce 40 procentow. Najebać to pak Češa wjace swinjaceho mjasa a mjenje zeleniny hač zapadni Europjenjo jědźa.

Na wopyćewe Vatikanje

srjeda, 08. apryla 2015 spisane wot:

Bratislava (SŽ/K). Prezident Słowakskeje republiki Andrej Kiska přebywa dźensa a jutře w Romje na oficialnym wopyće Vatikana. Zaměr jeho wizity swjateho města je pohódnoćić aktualny staw zhro­mad­neho dźěła, hladać za nowymi móžnosćemi dalšeho rozwića wzajomnosćow a wuměnić sej nahlady wo aktual­nych politiskich podawkach a namóc­nych konfliktach na swěće, piše k tomu dźenik SME. Předwidźane bě, zo bamž Franciskus hłowu słowakskeho stata w japoštołskim palasće w priwatnej awdiency přijmje. Zetkać chcyše so po tym tež ze statnym sekretarom we Vatikanje, kardinalom Pietrom Parolinom.

Za čas jeho dwudnjowskeho přebytka w italskej stolicy dóńdźe tohorunja k zetkanju načolneho słowakskeho politikarja z prezidentom Italskeje republiki Ser­gijom Mattarellu. Z nim chce Kiska wo aktualn­ych temach europskeje agendy kaž tež wo wutworjenju energetiskeje unije jednać. Nic naposledk póńdźe wo pozicije nastupajo krizu Ukrainy dla a podawki na Bliskim wuchodźe.

Euro wobstatk wólbneho boja

štwórtk, 02. apryla 2015 spisane wot:

Pólska opozicija wužiwa strach ludźi před europskej měnu

Waršawa (JBR/SN). W Pólskej rěči so tele tydźenje často a wjele wo europskej měnje euru, po tym zo bě debata wo nim minjene lěta tak derje kaž womjelkła. Znowa wudyriła je diskusija přihotow na prezidentske wólby 10. meje dla. Mjez cyłkownje jědnaće kandidatami, kotřiž chcedźa nastupić, ma tuchwilny prezident Bronisław Komorowski najwjetše šansy. Po aktualnych woprašowanjach by jeho 53 procentow Polakow woliło.

nawěšk

  • 21. jolka-swjedźeń w Nuknicy je nimo. Štož zwostanje su dopomnjenki na rjany žortny a zabawny wječor w Nukničanskej Brězanec bróžni. Někotre impresije serbskeho wječora w Nuknicy, kotrež je naša fotografowka-wolontarka Hanka Šěnec zhotowiła, wam tule
  • Serbske Nowiny-LND-Tuchmacherstr. 27 02625 Bautzen: Jolka 12.01.2019
  • Serbske Nowiny-LND-Tuchmacherstr. 27 02625 Bautzen: Jolka 12.01.2019

nowostki LND