To a tamne (28.03.24)

štwórtk, 28. měrca 2024 spisane wot:

Po dwanaće dnjach zaso namakali su psycu Famke, po tym zo bě wona z wulětniskeje łódźe do rěki Mosel skočiła. Wopytowarjo stanowanišća wuhladachu zwěrjo na kupje wosrjedź rěki. Wohnjowa wobora je Famke wuchowała. 15 lět stary cocker-spaniel je w poměrnje dobrym strowotnym stawje, zdawa so po dožiwjenju pak jara strachoćiwy być.

Agresiwnym wopicam so lěpje wobarać chcedźa w Thailandskej wotnětka z wosebitej policajskej jednotku. W prowincy Lop Buri maja wosebje wulku populaciju makakow. Zwěrjata ludźi přiběrajcy wobćežuja a wobkradnu. Dotalne pospyty, wopicy popadnyć, njejsu wočakowany wuspěch wunjesli. Nětko su zastojnikam katapulty sobu dali, z kotrymiž maja agresiwne zwěrjata disciplinować. Po najnowšim ličenju maja w potrjechenej prowincy wjace hač 5 700 makakow.

To a tamne (27.03.24)

srjeda, 27. měrca 2024 spisane wot:

Z čestnym rjadom wuznamjenił je georgiski knježerstwowy šef Irakli Kobachidse hrajerjow narodneho koparskeho mustwa po prěnjej kwalifikaciji za europske koparske mišterstwo. „To je wulke zbožo, kotrež nas jednoći. Naši hólcy su rjekojo“, rjekny wón na Naměsće republiki w georgiskej stolicy Tiflisu, hdźež mustwo z fanami swjećeše. Do toho běchu so Georgičanjow w napjatym třělenju jědnatkow 4:2 přećiwo Grjekskej přesadźili.

Cannabis na Oktoberskim swjedźenju? Tute prašenje zamołwitych najwjetšeho ludoweho swjedźenja swěta zaběra, po tym zo su konop wot 1. apryla dźělnje legalizowali. Wobchadźenje z tutym wopojnym jědom chcedźa we wosebitym wukazu rjadować, hospodarski referat bayerskeje stolicy zdźěla. Hižo nětko strowotniske ministerstwo před tym warnuje, cannabis a alkohol měšeć.

To a tamne (26.03.24)

wutora, 26. měrca 2024 spisane wot:

Po wozjawnjenju, zo je britiska princesna Kate na rak schorjeła, registruja pomocne organizacije za na rak schorjenych w kraju widźomny rozrost ličby zajimowanych. Tak je ličba kontaktow ludźi na internetnych stronach tutych organizacijow na 50 000 wob dźeń rozrostła. Kate bě minjeny pjatk w jara wosobinskim widejowym poselstwje zdźěliła, zo je na rak schorjeła. Lěkarjo běchu tole při njedawnej operaciji zwěsćili. Mjeztym je princesna chemoterapiju zahajiła.

Ze sputanymaj rukomaj je jaty Augsburgskeho jastwa wčera ćeknył. Policija dźensa dale za nim pytaše. 47lětny je ­pěši na ćěkancy. Dokal je běžał, njebě spočatnje jasne. Rěčnik jastwa njemó­žeše rjec, kak je so jatemu poradźiło, na lěkarskim terminje z jastwa twochnyć. Policija wobydlerjow prosy, podhladne wobkedźbowanja hnydom přizjewić.

To a tamne (25.03.24)

póndźela, 25. měrca 2024 spisane wot:

Ze spektakularnej pućowanskej šćežku po swětoznatych skałach Blue Mountains zapadnje Sydneyja chcedźa dalšich turistow do tuteje kónčiny Awstralskeje nawabić. Nowy „Grand Cliff Top Walk“ je 19 kilometrow dołhi a je dźesać milionow awstralskich dolarow (šěsć milionow eurow) płaćił. Šćežka skići wopy­towarjam „nowu a na dyrdomdejach ­bohatu składnosć, so z přirodu zwjazać“, zamołwići za turizm zdźěleja.

Kradnjene cholowy woblečeny je so paduch do wobchoda w Bayerskim Coburgu nawróćił, w kotrymž bě cholowy hodźiny do toho spakosćił. Předawar muža spóznawši, jeho zadźerža a zawoła policiju. Hodźinu do toho bě 31lětny dwoje cholowy w kabinje wuspytał ale so z jenož z jednymi zaso nawróćił. Jeansowe cholowy za 140 eurow tykny wón do tity a so z nimi z wobchoda zminy.

To a tamne (22.03.24)

pjatk, 22. měrca 2024 spisane wot:

„Hysteriske škrěčenje“ při kompjuterowej hrě je w Bornheimje pola Bonna zasadźenje policije zawinowało. Žona na chódniku bě hary w bydlenju dla tak znjeměrnjena, zo zastojnikow wołaše. Jako tući při bydlenju klinkachu, so wukopa, zo bě 14lětny syn kompjuterowu hru hrał a podležał. Hněwny na to wón zasakle protestowaše. Staršej přilubištaj, zo podawk ze synom wuhódnoćitaj.

Na wšěch 48 000 eurow přisadźiła je žona w Drježdźanach na jebakow. 55lětna bě srjedu tak mjenowany šokowy tele­fonat dóstała. Skućićeljo wudawachu so jako policisća a statny rěčnik. Woni rozprawjachu, zo je dźowka žony smjertne wobchadne njezbožo zawinowała a zo trjeba nuznje kawciju 48 000 eurow, zo by so jastwu wuwinyła. Žona pjenjezy posołej přepoda. Hakle pozdźišo bu jej wědome, zo su ju wobšudźili.

To a tamne (21.03.24)

štwórtk, 21. měrca 2024 spisane wot:

Wćipne dźiwje swinjo wosrjedź Mainza je njeměr zbudźiło – a je tam tež swój kónc namakało. Hladajo na strachi za ludźi a nadróžny wobchad je hajnik zwěrjo dźensa rano na mosće Theodora Heussa nad Rynom zatřělił, policija zdźěli. Swinjo běchu mjez druhim při hrodźe, krajnym sejmje a jednym z luksusowych ­hotelow wobkedźbowali. Ze zawěrami policija spytaše, wobchadnym njezbožam w stolicy Porynsko-Pfalcy zadźěwać.

Z internetnym naprašnikom zamołwići w Amsterdamje spytaja, turistam wujasnić, kak maja so zadźeržeć a – što je tam mjeztym zakazane. Štóž chcył so w měsće wopić, drogi kupować abo so po štwórći bordelow wodźić dać, budźe přesłapjeny. Korčmy zawru po połnocy, drogi w zjawnosći su zakazane a bordele tam tež wjace měć nochcedźa. Pokiwy měrja so wosebje na njewoblubowanych Britow.

To a tamne (20.03.24)

srjeda, 20. měrca 2024 spisane wot:

Ratarske zawody w Sakskej su přerěznje wjetše hač w druhich zwjazkowych krajach. Tole je Statistiski krajny zarjad w Kamjencu zwěsćił. Přerězna płonina zawodow w Sakskej wučinja 138 hektarow. W cyłoněmskim přerězku maja ratarske zawody 65 hektarow płoniny. Nadpřerězna wulkosć zawodow w Sakskej a druhich wuchodnych krajach móhła z kolektiwizowanjom ratarjow za čas NDR zwisować, statistikarjo tukaja.

Z rowa maćerje kradnjene kwětki zaso namakała je žona w sewjerorynsko-westfalskim Heiligenhausu. Dokelž běchu kwěćele prawidłownje preč, je 62lětna sćelak GPS mjez kwětki schowała a policiju informowała, po tym zo bě kwěćel zaso kradnjeny. Signal sćelaka wjedźeše zastojnikow k bydlenju 80lětneje wobydlerki města. Kwětki stejachu na balkonje staruški, policija zdźěla.

To a tamne (19.03.24)

wutora, 19. měrca 2024 spisane wot:

19 tonow šinki su na awtodróze 45 w Sauerlandskej z powaleneho nakładneho awta překładować dyrbjeli. Ze šunku nakładowane awto bě wčera rano z njeznatych přičin z jězdnje zajěło, do betonoweje murje zrazyło a so powaliło. Šofer so zrani. Dokelž awto wobě čarje do směra na Frankfurt blokowaše, pósłachu sobudźěłaćerjow zawoda k městnu njezboža, w kotrymž na šinku čakachu. Awtodróha bě wjacore hodźiny blokowana. Hač móžachu šinku hišće wužiwać, njeje znate.

Wjace hač štyri miliony krokusow je minjeny kónc tydźenja w schleswigsko-holsteinskim Husumje nad Sewjernym morjom nalěćo witało. Tradicionalny swjedźeń barbičkow z koncertami a rjemjeslniskimi wikami su tam mjeztym 26. króć přewjedli. Po přeswědčenju zamołwitych maja w Husumje najwjetši wobstatk krokusow sewjerneje Europy.

To a tamne (18.03.24)

póndźela, 18. měrca 2024 spisane wot:

Přewjele kriminalkow a přewjele mordarstwow w telewiziji kritizuje dźiwadźelnik Max von Pufendorf. „Mortwy w bahnje, mortwy w lěsu, mortwy na horje, mortwy w Błótach – wón je sej toho wěsty, zo maja samo ći, kotřiž kriminalki lubuja, toho mjeztym dosć. Přiwšěm pěstuja tute filmy žadosć ludźi, so do złóstnistwa zanurić, mordarja wuslědźić a zajeć. „Na kóncu je swět zaso w porjadku.“

Swójski rekord jasnje přetrjechiła je Frankfurtska wuměłča pomjatka Susanne Hippauf při naličenju cyfrow kružneje ličby Pi za komu: Na mišterstwje w Emdenje je Hippauf na wšěch 18 026 cyfrow z hłowy naličiła a je swójski rekord wo wjace hač 2 500 cyfrow polěpšiła. Organizatorojo rěča wo „njesłyšanym wuslědku“. Hippauf trjebaše tři hodźiny a pjeć mjeńšinow. Při naličenju podawa so wona dušinje na pućowanje po swěće.

To a tamne (15.03.24)

pjatk, 15. měrca 2024 spisane wot:

Hobersku malenu su w Awstralskej do Guinnessoweje knihi rekordow zapisali. 20,4 gramow ćežki a módry eksemplar je wulki kaž tenisowy bul. Dotalna rekordna malena z lěta 2020 bě 16,2 gramaj ­ćežka. Malena słuša k nowej družinje Eterna, kotruž bě ratarske předewzaće wuwiło, dokelž so ludźo pječa stajnje zaso za wulkimi płodami prašeja. Što ma so z rekordnej malenu stać, hišće njewědźa. Na brěčku předźěłać ju nochcedźa.

Tematiski tydźeń „mafia“ na gymnaziju w schleswigsko-holsteinskim Kronshagenje je bjezmała wulkozasadźenje specielneje jednotki policije zawinił. Swědk bě dźiwnje zdrasćeneho młodostneho z třělbu w ruce po puću do šule wobkedźbował. Jako přiwołani policisća widźachu, zo je cyła rjadownja „wobrónjena“, so změ­rowachu. Direktorej rjeknychu, zo njebě hesło tydźenja jara zbožowne.

Serbska debata

nowostki LND