To a tamne (22.12.21)

srjeda, 22. decembera 2021 spisane wot:

Pjenjezy z awta ćisnyła je dwulětna holčka w hornjej Bayerskej a je tak seriju wobchadnych njezbožow zawiniła. Holca bě sej z titu pjenjez hrajkała, jako nan za wodźidłom sedźeše. Jako dźěćo titu z wjetšej sumu pjenjez z woknom ćisny, nan zasta, zo by pjenjezy zezběrał. Napřećo přijěduce awto dyrbješe chětro borzdźić, na čož přichodne awto do njeho zrazy. Slědowachu dalše zražki. Wěcna škoda wučinja 15 000 eurow.

Na wšě 166 milionow eurow kalkuluje bayerske nutřkowne ministerstwo za wuhotowanje wjerškoweho zetkanja G 7 klětu w juniju na hrodźe Elmau. To je tamniši nutřkowny minister Joachim Herrmann (CDU) etatowemu wuběrkej zdźělił. Najwjace pjenjez planuja za płaćenja policistam. Lěta 2015 bě jich ně­hdźe 20 000 na wjeršku w Garmisch-Partenkirchenje zasadźenych.

To a tamne (21.12.21)

wutora, 21. decembera 2021 spisane wot:

Noweho psa do Běłeho domu přiwzał je prezident USA Joe Biden. Wčera běštej „Commander“ a prezident prěni króć zhromadnje w krótkim wideju na Twitteru widźeć. Swójba Bidena bě 79lětnemu psa dariła, po tym zo bě jedyn z dotal dweju zemrěł. Tamny bě so zas a zaso ze sobudźěłaćerjemi nasadźał a jednoho z Bidenowych stražnikow samo kusnył. Bór­ze tež kóčka do Běłeho domu zaćehnje.

Wobkedźbujo ćahanje ptačkow stej žonje w Mecklenburgskej jězorinje w bahnje tčacy wostałoj. Wohnjowi wobornicy dyrbjachu jej wuswobodźić, po tym zo móžeštej wonej z mobilnym telefonom wo pomoc wołać. Kameradojo wšak dyrbjachu sej pola rybarja čołm wupožčić, zo móhli so k nimaj předrěć. Po wjace hač dwěmaj hodźinomaj – při temperaturje wokoło nule – su žonje skónčnje strowej z bahna wućahnyli.

To a tamne (20.12.21)

póndźela, 20. decembera 2021 spisane wot:

Ćeknjene domjace swinjo je policiju w porynsko-pfalcskim Bobenthalu za nós wodźiło. Po tym zo běchu skoćo bjezposrědnje při dróze widźeli, spytachu je zastojnicy wospjet podarmo popadnyć. Skónčnje skótna lěkarka z narkotiskej sykawu swinjo pohłuši. Dokelž wone na žanym statoku njepobrachuje, liča z tym, zo bě so přez francosku mjezu sem dóstało. „Hildegard“ je nětko w chlěwje Bobenthalskeho bura zaměstnjena a zbožowna.

Swětnišćowej turistaj z Japanskeje staj so ze stacije ISS zaso na zemju wróćiłoj. Kapsla, w kotrejž sedźeštaj japanski miliardar Yusaku Maezawa a toho asistent Yozo ­Hirani, je dźensa rano po planje w stepje centralnoaziskeje republiki Kazachstana přizemiła. Ruski kosmonawt Aleksander Misurkin je swětnišćoweju turistow tam a zaso wróćo na zemju přewodźał.

To a tamne (17.12.21)

pjatk, 17. decembera 2021 spisane wot:

Sam do ćaha skočił je šěsć měsacow sta­ry­ psyk z mjenom Baldur w Münsteru a je bjez swojeho wobsedźerja wotjěł. Poli­cija pak so z pomocu interneta wo to postara, zo běštaj wón a wobsedźer spěšnje zaso zjednoćenaj. Tak twitterowaše z fotom psa, zo za jeho wobsedźerjom pyta. Muž tweet wuhlada a so přizjewi. Swědk bě wobkedźbował, kak pos na dwórnišću do ćaha skoči, a informowaše policiju.

Składowar wačokow je sej w lětadle w in­diskim Mumbaiju wusnył, po tym zo bě kófry zapakował. Lětadło ze slepym pasažěrom wotleća na to do Abu Dhabija. Hakle po přizemjenju w Zjednoćenych arabskich emiratach sobudźěłaćerjo lětanišća muža wuhladachu. Lěkarske přepytowanje wunjese, zo je jeho ćělny staw „stabilny a normalny“. Wón móžeše w samsnej mašinje wróćo lećeć, njesmě pak najprjedy raz swoju słužbu dale wukonjeć.

To a tamne (16.12.21)

štwórtk, 16. decembera 2021 spisane wot:

Zahrodnika za park hrodu Windsor pola Londona pyta britiska kralowna Elizabeth II., kaž z wotpowědneho nawěška kralowskeje swójby wuchadźa. Dźe wo to, so wo zahrodu starać „kotruž tysacy wobdźiwuja“, we wupisanju rěka. Nimo toho měł ­zajimc „zahorjeny za hladanje trawnika“ być. Poskićena mzda pak je wšo druhe hač kralowska: Queen chce jemu runje 22 800 eurow brutto wob lěto dać, ani 2 000 wob měsac, a to w Londonje, hdźež su žiwjenske kóšty wosebje wysoke.

Crystal meth w barbjenčkowych tyzkach abo ecstasy w hodownych kulach: Fantazija pašowarjow drogow na lětanišću Köln/Bonn tež lětsa žane hranicy nje­znaje. Najebać to su cłownicy jenož w nowembrje 600 kilogramow drogow sćazali. Dale namakachu dekoraciju z kokaina a marihuanu w meblowych platach.

To a tamne (15.12.21)

srjeda, 15. decembera 2021 spisane wot:

310 kilogramow ćežki módry safir su na Sri Lance našli. Drohotny kamjeń ma 1,5 milionow karatow, kaž zarjad za drohokamjenje a debjenki zdźěli. Zarjad bě safir přepytował a certifikował. Wobsedźer chce jón muzejej předać, zo by tajki wostał, kaž je. Muž bě safir na priwatnej ležownosći w Ratnapura, sto kilometrow wuchodnje stolicy Colombo namakał a jón „Queen of Asia“ mjenował.

Z čerwjenej barbu su aktiwisća na dobro klimy wčera spytali, žadanja zwjazkowemu kanclerej Olafej Scholzej (SPD) na kanclerski zarjad w Berlinje napisać. Policija pak zakroči a hesło hnydom zaso wotstroni, kaž bě na internetnym portalu Instagram widźeć. Skupina „Zběžk poslednjeje generacije“ bě so po tydźenje trajacym hłodowym stawku do wólbow zwjazkoweho sejma załožiła a žada sej zakoń přećiwo znjewužiwanju žiwidłow.

To a tamne (14.12.21)

wutora, 14. decembera 2021 spisane wot:

Mobilny błyskač z rumpodichom a sobjacym zapřahom wupyšili su njeznaći w eifelskej gmejnje Hürtgenwald. Figura rumpodicha sedźi na nastroju, zapřah steji před nim. Błyskač funguje takrjec jako­ sanje. Štó za originelnej mysličku tči, dotal njewědźa. Minjeny tydźeń běchu dalšej błyskačej z čapku rumpodicha porjeńšili. Zamołwići wšak na to skedźbnjeja, zo błyskače tež z hodownej deko­raciju dale funguja.

Jědojteho hada w hodownym štomje našła je swójba w Južnej Africe. Telewizijny sćelak eNCA pokazuje widejo, w kotrymž jědojta boomslang na štomje mjez hodownymi kulemi swoju wokolinu pře­slě­dźa. Połdra metra dołheho wuža je profesionalny hońtwjer hadow skónčnje popadnył a w přirodźe wusadźił. W Južnej Africe je runje lěćo, štož mnohe hady ze schowa wabi, tež jědojte.

To a tamne (13.12.21)

póndźela, 13. decembera 2021 spisane wot:

W spowědnym stole z wohenjom hrajkał je sej jědnaćelětny pachoł w bayerskim Kissingu. Nimo toho je tam sobotu popołdnju tež stólcy a papjeru zapalił. Woheń na zbožo njewudyri, najebać to nastachu w farskej cyrkwi swj. Bjarnata zesmudźene a sazowe blaki. Policija trochuje škodu na něhdźe tysac eurow. Što je hólca k tomu pohnuło, dotal njewědźa. Staroby dla pak njeje wón hišće chłostajomny.

Swěcy awta zaswěćał je mały psyk w juhozapadnej Pfalcy. Swědk wobkedźbowaše, kak pos w Herschbergu w awće zaskakuje a poněčim wšitke swěcy jězdźidła zaswěća. Policija wobsedźerku psa zwěsći. Ta zastojnikam rozłoži, zo so psyk rady na te wašnje zabawja a tak je nawuknył wšitke swěcy aktiwizować. „Žonje bu tuž doraznje wotradźene psej tež hišće po­kazać, kak ma z awtom jěć“, w nic cyle chutnje měnjenej zdźělence rěka.

To a tamne (10.12.21)

pjatk, 10. decembera 2021 spisane wot:

Z papjercowym čołmom je 22lětny po Neckaru w Stuttgarće jěć chcył, a to naje­bać zymske wjedro jenož w kupanskich cholowach. Tak chcyše so na Youtube hordźić. Z papjercowych tyzow spasleny a z wotpadkowymi titami wobdaty spław je wón wčera do wody pušćił, w poslednim wokomiku pak nastroj radšo zaso wućahnył. Policisća běchu jeho doraznje powučili, „zo tajka jězba scyła žana dobra myslička njeje“.

Z wubědźowanja wo najrjeńšeho kamela w Sawdi-Arabskej su wjacorych wobdźělnikow wuzamknyli. Tući běchu zakazane srědki wužiwali, zo bychu zwěrjata „płaćiwym měritkam rjanosće“ wotpowědowali. Potrjechenych je 43 kamelow. Jim běchu wobsedźerjo botox šćěpili, zo by koža krućiša była. Wubědźowanje je lukratiwne: Dobyćerjej kiwa myto 58 ­milionow eurow.

To a tamne (09.12.21)

štwórtk, 09. decembera 2021 spisane wot:

Dźesać kilogramow ćežki čwak złota su w USA za wjele pjenjez přesadźowali. Tak mjenowany „Alaska centennial gold nugget“ je na wčerawšej awkciji 750 000 dolarow (něhdźe 661 000 eurow) wunjesł, kaž dom Heritage Auctions w texaskim Dallasu zdźěli. Dulu złota běchu 1998 w Alasce našli. Priwatny zběrar ju pozdźišo kupi, a jeho potomnicy přewostajichu złoto nětko awkciskemu domej.

Z Angelu Merkel zaso pućować hić, na to so znaty krosnowar Reinhold Messner jara wjeseli. 77lětny z njej a jeje mužom Joachimom Sauerom mjeztym wjele lět w Južnym Tirolu po horach pućuje. „Nětko njebudźe wona wjace jako šefina knježerstwa po puću ale jako politiska rentnarka“, so Messner wjeseli. Wón je hordy na to, zo je sej Merkel na jeho radu južnotirolske hory wupytała, dokelž móže tam woměrje dowol činić.

Serbska debata

nowostki LND