To a tamne (24.01.24)
Na wšěch 60 chłostajomnych njeskutkow nahromadźił je paduch, kotrehož su tele dny we Werdauwje pola Šwikawy lepili. Sudnik je jeho mjeztym do jastwa pósłał. 24lětny bě so na padustwa specializował a měješe dosć šěroki spektrum: Wón kradnješe wótřerěčaki, słuchatka a druhe elektroniske wěcy runje tak kaž kofej, palenc a žiwidła. Nimo toho je wospjet spytał, z falšowanymi pjenjezami zapłaćić. Policija móže jemu z nahrawanjemi kamerow tójšto padustwow dopokazać.
Hara a škrě elektriskeje piły su paducha kolesow w Berlinje-Friedrichshainje přeradźili. Wobydler Krachtoweje bě w nocy na wutoru w zadnim dworje stareho wjaceswójbneho domu haru słyšał a paducha wobkedźbował, kiž z aku-piłu runje rjećazowy zamk kolesa přerěza, při čimž škrě zalětowachu. Přiwołana policija móžeše paducha zajeć a koleso sćazać.
To a tamne (23.01.24)
Tigra – nic w tanku, ale w awće – měješe muž we Vietnamje, jako jeho policija zadźerža. Wjace hač 200 kilogramow ćežke rubježne zwěrjo bě w přewšo wuskej groćanej klětce w transporteru zawrjene a njemóžeše so tam scyła wjace hibać. 43lětny muž bě so podhladnje zadźeržał a spytaše ćeknyć, jako so policisća jeho dohladachu. Tigra bě wón za sto eurow kupił. We Vietnamje wužiwaja dźěle dźiwich zwěrjatow, kaž kosće, přeco hišće za tradicionalnu medicinu.
Na wšěch 22 tonow kokaina je policija w Ecuadorje sćazała. Drogi běchu w podzemskim składźe kriminelneje cwólby schowane a běchu za transport do wšeho swěta přihotowane. Na někotrych zapakowanych blokach, tak wulke kaž cyhel, běchu znački lětarskich předewzaćow hižo nalěpjene. Namakali su w składźe tež brónje, municiju a škričkowe nastroje.
To a tamne (22.01.24)
Hoberski nawal cikadow wočakuja wědomostnicy w nalěću na srjedźnym zapadźe a na juhowuchodźe USA. Lehnidle XIII a XIX runočasnje w 16 zwjazkowych krajach wudyritej, cyłkownje něhdźe bilion cyrčakow. Populacija wotpočuje najdlěši čas pod zemju a so hakle po 17 lětach na powjerch wudrapa. Potom so črjódy insektow z njesměrnej haru na přirodu wala. Za čłowjeka su cikady njestrašne. Ptačkam su bohata pica a po smjerći ratarjam witane hnojidło.
Grat za namócne łamanje do trezorow a domow su paducham stajnje zaso witana rubizna – z awtow wohnjoweje wobory. Wosebje požadane su wulke hydrawliske nožicy, z kotrymiž rubježne cwólby pjenježne transportery a bankowe trezory wočinja. Loni su w Berlinje 26 ćežkich padustwow z awtow wohnjoweje wobory zličili: Policija nima žanych skućićelow.
To a tamne (19.01.24)
Swój dener z filmowymi pjenjezami zapłaćić chcył je muž w sewjerobraniborskim Kyritzu. Jako jeho sobudźěłaćer wopačnych pjenjez dla narěča, chcyše muž ćeknyć. Do toho chcyše wón z bankowku dźesać eurow zapłaćić, štož pak běchu tak mjenowane movie-pjenjezy. Wopačne pjenjezy wužiwaja při filmowych a dźiwadłowych produkcijach jako rekwizitu. Policija pad přepytuje.
Titul „najstaršeho psa swěta“ su loni w pozdatnej starobje 31 lět zemrětemu pastwinemu psej Bobijej w Portugalskej sćazali. Fachowcy Guinnessoweje knihi rekordow dwěluja, zo je psyk woprawdźe tak stary był. Naprašowanje pola portugalskeho registra domjacych zwěrjatow bě wunjesło, zo su Bobija tam w juniju 2022 zapisali. Tehdy bě wobsedźer twjerdźił, zo je so pos 1992 narodźił. Wotpowědne podłožki pak njenamakaja.
To a tamne (18.01.24)
To a tamne (17.01.24)
To a tamne (16.01.24)
Bjez jězbneje dowolnosće je policist w Jendźelskej na dźěło jěł. Tež w běhu někotrych zasadźenjow je wón policajske awto wodźił. Kaž so wukopa, su mužej z města Kidderminster loni w meji někotrych wobchadnych přeńdźenjow dla jězbnu dowolnosć sćazali. Před někotrymi tydźenjemi je 26lětny muž swoju słužbu pola policije zakónčił. Nětko je jeho sudnik wospjetnych přeńdźenjow dla z dwanaće tydźenjemi jastwa pochłostał. Tohorunja ma wón hakle za połdra lět swoju jězbnu dowolnosć wróćo dóstać
Italske knježerstwo wabi tuchwilu za „cucina italiana“ – italsku kuchnju. Tak sej politikarjo přeja, zo maja so italske chłóšćenki z imaterielnym swětowym kulturnym herbstwom stać. Za to nětko intensiwnje wabja, mjez druhim z wosebitej akciju. Astronawća na mjezynarodnej swětnišćowej staciji maja nětko italske nudle dóstać.
To a tamne (15.01.24)
Swoju sławnu mólbu „Ćehnjemy do měra“ chce rockowy spěwar Udo Lindenberg (77) – za wjele pjenjez – přesadźować. Mólba je tuchwilu w Zwjazkowej radźe w Berlinje wustajena. Najwjace pjenjez skićacemu kupcej chce Lindenberg 1,50 króć 2 metraj wulki wobraz wosobinsce přepodać. Termin njeje hišće znaty. W srjedźišću wot hudźbnika molowaneho wobraza steji znamjo Peace, wobstejace z mjezwočow. Widźeć su tež typiske figury spěwarja. Mólba ma wjace hač 30 000 eurow za dobry skutk wunjesć.
Na Dnju nadróžnych dźěrow su we Wulkej Britaniskej dźensa na přiběracy problem w kraju skedźbnili. Minjene lěto je ličba nuzowych padow dźěrow dla wo 16 procentow rozrostła. Wobškodźene a zezhibowane kolesa su nimo złamanych pjerow a wóskow wulki problem, kiž zaběra mjeztym wšón kraj.
To a tamne (12.01.24)
Digitalny kaminowy woheń je w badensko-württembergskim Bad Säckingenje zasadźenje wohnjoweje wobory zawinowało. Woheń kamina bě na wobrazowce telewizora nastajeny, policija zdźěla. Wohnjowu woboru su wołali, dokelž běchu „płomjenja“ hač na dróhu widźeć. Tež policija je k městnu wohenja přijěła.
Twochnjeneho cebru popadnyć dyrbjała je policija w hessenskim Bad Homburgu. Žona bě zastojnikow alarmowała a dwělowacym policistam potwjerdźiła, zo „móže tola hišće konja wot cebry rozeznawać“. Na to bě wobsadka policajskeho awta zwólniwa za „safari w swójskim rewěrje“. Skónčnje so z pomocu wobsedźerja poradźi, z pastwy ćeknjene zwěrjo popadnyć. W Němskej je pod wěstymi wuměnjenjemi dowolene, cebry dźeržeć.
To a tamne (11.01.24)
Z kradnjenymi wěcami na sankach je policija dweju muži na němsko-čěskim pomjeznym přechodźe w rudnohórskim Oberwiesenthalu lepiła. Při kontroli sankow namakachu zastojnicy sněhakowarske škórnje, motorowu piłu, laptop a powětrowku. Wěcy běchu samsny dźeń z jednoswójbneho domu pokradnyli, policija zwěsći. Policija nětko pruwuje, hač staj mužej w starobje 33 a 35 lět za dalše padustwa w Oberwiesenthalu a wokolinje zamołwitaj.
Do rěki Seine skočić chce Pariska měšćanostka Anne Hidalgo. Po tutym puću chce wona dopokazać, zo je so kwalita wody w rěce minjene lěta zasadnje polěpšiła. Kupanje w Seine je hižo sto lět zakazane, dokelž je rěka wopłóčkow dla zanjerodźena. W přihotach na Olympiske hry su wjele pjenjez nałožili, zo bychu kwalitu wody tež za wubědźowanja zwyšili.
