To a tamne (05.05.21)
Model Würzburgskeje katedrale natwarił je muž w bayerskim Kitzingenje – a to z 2,5 milionami lego-klockow. 72lětny Reinhold Dukat je poł lěta wšědnje dźesać hodźin na nim dźěłał, tež njedźelu. Dohromady je to 1 800 dźěłowych hodźin. Planował bě Dukat swoje předewzaće cyłe lěto. Tak je stajnje zaso ke katedrali jězdźił a wšitke nadrobnosće dokumentował. Nastała je tři metry dołha a tři metry šěroka podobizna cyrkwje.
Dospołnje ze złoćanej foliju polěpjene sportowe awto je policija w Drježdźanach sćazała. Po měnjenju fachowcow njebě folije dla wobchadna wěstota hižo zaručena, dokelž móhli druzy šoferojo chětro slepjeni być. Nimo toho běchu wšitke wokna a swětłomjetaki z čornej foliju zakryte, štož je zakazane. 29lětny šofer dyrbi nětko kóšty wotwlečenja, posudka kaž tež pjenježnu pokutu płaćić.
To a tamne (04.05.21)
Partnerku za wosamoćeneho kołpja pytaja w městačku Holzgerlingen pola Stuttgarta. Za to su tam samo nawěšk wozjewili, byrnjež tón cyle chutnje měnjeny njebył, město zdźěli. Štyri lěta stary kołp Hänsel Jr. na haće parka zdawa so samotny być. Mjeztym maja wjacore naprašowanja ludźi. Njeznaći su w nocy na 1. meju najprjedy raz gumijoweho kołpja do wody sadźili.
Z wukazom zajeća pytaneho zasudźeneho paducha je policija na awtodróze A 11 krótko po Berlinje lepiła. 45lětneho bě sudnistwo w Frankfurće nad Wódru loni padustwa we wosebje ćežkim padźe dla k 14 měsacam jastwa zasudźiło. Muž pak njebě jatbu nastupił. Tuž jeho wot toho časa pytachu. Wón bě zastojnikam nětko při wobchadnej kontroli napadnył. Zastojnicy dowjezechu muža do jastwa w braniborskim Wriezenje.
To a tamne (03.05.21)
Gigantisku hromadu tuka z kanalizacije wotstronić dyrbja w britiskim Birminghamje. Namakany kolos je tysac metrow dołhi a waži něhdźe 300 tonow, telko kaž 250 wosobowych awtow. Sobudźěłaćerjo měšćanskeho zawoda hižo z wotmachom dźěłaja a budu drje to hišće hač do junija. We Wulkej Britaniskej zas a zaso tajke „monstery“ namakaja, dokelž ludźo mjez druhim horcy tuk po fritěrowanju do nuznika kidaja.
Namolowana cebrasmuha jako přechod za pěškow před busowym zastanišćom w Bonerathu pola Triera njesmě tam wostać. „Ideja wšak njeje špatna“, rjekny wjesnjanostka Gabriele Terres. Měry pak njewotpowěduja předpisam. Nimo toho hrozy strach, zo so pěšcy na wěstotu přechoda spušćeja, šoferojo pak njetrjebaja zastać. Njeznaći běchu w nocy na 1. meju cebrasmuhu namolowali.
To a tamne (30.04.21)
Z kolesom spěšnišo hač awta po puću bě młody muž w Mnichowje – a to hišće pod wliwom drogow. Policistomaj w měšćanskim dźělu Schwabing bě napadnyło, zo je muž wjele spěšniši hač awta. Tak 21lětneho zadźeržeštaj, na čož staj zwěsćiłoj, zo bě jeho elektrokoleso tak manipulowane, zo docpěwa wone hač do 100 km/h. Za to by muž jězbnu dowolnosć a zawěsćenje trjebał. Woboje pak njeměješe, za to drogi w urinje.
Swójski porst přihozdźikował je sej ćěsla w badensko-württembergskim Oberndorfje. 36lětny twarješe tam drjewjany dom a wužiwaše za to pneumatiski hozdźikowak. Při tym třěli sej hózdź do porsta a jón tak k drjewu přibi. Wohnjowa wobora dyrbješe muža z njepřihódneho połoženja wuswobodźić. Dowjezechu jeho do chorownje, wón pak smědźeše samsny dźeń zaso domoj.
To a tamne (29.04.21)
Dwanaćelětny hólc je w južnej Hessenskej twochnjene małe dźěćo pola toho wowki wotedał. Štyrilětny vietnamski pachoł bě w Viernheimje pola Mannheima z bydlenja twochnył, na čož mać hnydom policiju alarmowaše. Po dwaceći mjeńšinach móžachu alarm zaso zběhnyć. Dwanaćelětny bě płakaceho hólčka za radnicu města wuhladał. Po tym zo bě jemu adresu wowki mjenował, jeho dwanaćelětny tam woteda.
Dospołnje njetrjebawši je wohnjowa wobora 700 schodźenkow katedrale w Münsteru běžała, zo by přičinu pozdatneho kura na 140 metrow wysokej wěži wuslědźiła. Swědcy běchu wčera wo mróčeli kura rozprawjeli. Na městnje pak njemóžachu ničo zwěsćić. Tež trut ze specialnej kameru njemóžeše pomhać. Po dwěmaj hodźinomaj bě zasadźenje nimo.
To a tamne (28.04.21)
Sobu najwoblubowaniše zarjadowanje oldtimerow, Anklamske zetkanje Trabantow, dyrbi tež lětsa koronapandemije dla wupadnyć, kaž rěčnik organizaciskeho mustwa zdźěli. Zetkanje měješe so wot 12. do 16. meje na Anklamskim lětanišću wotměć. Nětko nadźijeja so na klětu. Loni běchu zetkanje přepozdźe wotprajili a dyrbjachu zrěčensku pokutu 60 000 eurow zapłaćić. Před lětomaj witachu w Anklamje něhdźe 800 jězdźidłow, předewšěm Trabijow.
Swój před wosom lětami pokradnjeny moped Simson je wobsedźer w braniborskim Kyritzu nětko zaso namakał. Wot lěta 2013 bě wón stajnje zaso w interneće za swojej „łastojčku“ hladał. Před dnjemi wuhlada ju 38lětny nadobo jako poskitk w socialnej syći. Policija přepytuje nětko přećiwo poskićowarjej a mužej, kiž bě jemu moped předał.
To a tamne (27.04.21)
Do Skandinawiskeje pěši po puću je Michael Rott z Kamjenicy, zo by tam nowe žiwjenje započał. Před tydźenjomaj bě so na puć nastajił, nětko je w Saksko-Anhaltskej. Wšědnje běži dźesać do 20 kilometrow. Štož za wšědne žiwjenje trjeba, ma 36lětny we wozyčku, na přikład warjak, matracu, spanski měch a „mału płokansku mašinu“– jednory bow. Hižo dlěje hač dwě lěće nosy so z mysličku wupućować. Jeho swójba je mjeztym rozpadnyła, pandemije dla je bjezdźěłny. Politika knježerstwa korony dla jeho „dospołnje přesłapja. Tónle kraj mje wjace njewidźi.“
Nawjerćenje agentoweho filma za internet je policija w Kaiserslauternje přetorhnyła. Žona bě zastojnikow alarmowała, po tym zo bě we wjaceswójbnym domje muža z pistolu w ruce widźała. Na zemi ležeše nóž. Policija na to třoch muži w starobje 21 do 29 lět nachwilnje zaja. Za nahrawanje filma pak mějachu dowolnosć. Brónje wukopachu so jako atrapa. Hač dyrbi trójka policajske zasadźenje zapłaćić, nětko pruwuja.
To a tamne (26.04.21)
Dwě hodźinje trajace zawrjenje tunla je skupina motorskich w Porynsko-Pfalcy zawiniła. Wotpłuny mašinow běchu awtomatisku wohnjoškitnu připrawu njedaloko městačka Bernkastel-Kues aktiwizowali, na čož so wrota tunla zawrěchu. Wohnjowa wobora dyrbješe za nadróžny wobchad wobjězdku zarjadować.
Jedyn z prěnich eksemplarow twjerdych dolarow z lěta 1794 su na awkciji w USA za nimale 700 000 eurow přesadźowali. Rědki koporowy pjenjez je prototyp pozdźišeho slěborneho dolara, kaž awkciski dom Heritage Auctions w texaskim Dallasu informuje. Hódnotu twjerdeho pjenjeza z priwatneje zběrki předewzaćela běchu fachowcy na połojcu wuzbytkowaneje sumy trochowali. Je to jedyn z prěnich eksemplarow tehdy noweje pjenjezarnje USA w Philadelphiji.
To a tamne (23.04.21)
Dźesać paletow čriji spakosćili su paduši na parkowanišću při awtodróze A 13 njedaloko Drježdźan z připowěšaka Lkw-ja. 46lětny šofer bě swoje nakładne awto na parkowanišću Finkenberg w Mišnjanskim wokrjesu wotstajił a so spać lehnył. Narano pak wón zwěsći, zo su njeznaći planu awta rozrězali a palety črijow w cyłkownej hódnoće 20 000 eurow pokradnyli.
Hižo zaso su wopicy ze zwěrjenca w badensko-württembergskim Löffingenje twochnyli. Sobudźěłaćerjo móžachu tři ze štyrjoch wopicow na bliskej zwjazkowej dróze popadnyć. Prawdźepodobnje běchu zwěrjata wokoło twarnišća w zwěrjencu móžnosć namakali so zminyć. Hakle před tydźenjomaj bě wjace hač 20 berberskich wopicow z mjenowaneho coowa ćeknyło. Wone su spłóšiwe a bojazliwe. Móža pak agresiwnje reagować, čuja-li so wohrožene.
To a tamne (22.04.21)
Wokno kupjele přerazyło je wobchadne znamjo w Bielefeldźe. Do toho bě šofer w nocy na nimale 50 metrow zdalenej wobchadnej kupje do njeho zrazył. Přez wotmach zražki so wobchadna tafla pušći a zleća do 47 metrow zdaleneho wokna. Při tym so tež kamor w kupjeli wobškodźi. Wobydlerka domu tam na zbožo runje njebě. Cyłkowna škoda wučinja něhdźe 1 500 eurow.
Widejokonferenca na nakromnej čarje awtodróhi w Porynsko-Pfalcy je 27lětnemu mužej mjerzanje z policiju wunjesła. Zastojnikam bě njedaloko Bad Kreuznacha awto napadnyło, kotrež měješe prawdźepodobnje panu. Wóz pak steješe tam bjez warnowaceho třiróžka a zabłyskowaceje swěcy. W awće wuhladachu policisća muža, a tón bě z mobilnym telefonom na online-konferency wobdźěleny. Nětko hrozy jemu skóržba.
