To a tamne (10.03.21)
Z dźěćaceje čumpjele wuswobodźiła je wohnjowa wobora 18lětnu w Drježdźanach. Młoda žona bě so na hrajkanišću na čumpjel sydnyła, ale w njej tčacy wostała. Přiwołani pomocnicy dyrbjachu sydło rozšrubować, zo bychu ju z dilemy wuswobodźili. Zranił so při tym na zbožo nichtó njeje.
Domjace tofle Winstona Churchilla su za 37 000 eurow přesadźowali, kaž awkciski dom Bellmans w hrabinstwje West Sussex zdźěli. Somoćane tofle něhdyšeho premierministra z toho złoćanymi inicialemi wunjesechu tak dwójce telko dobytka kaž poprawom wočakowane. Palencowa škleńca Churchilla ma za 17 500 eurow noweho wobsedźerja. Churchill (1874–1965) bě we Wulkej Britaniskej za čas Druheje swětoweje wójny a w 1950tych lětach knježił a je premierministrej Borisej Johnsonej z wulkim přikładom.
To a tamne (09.03.21)
Na wšě 83 900 eurow namakała je policija w ručnym fašku wosoboweho awta na awtodróze A 61 pola sewjerorynsko-westfalskeho Nettetala. Kontrolujo awto njedaloko nižozemskeje mjezy nańdźechu zastojnicy pjenjezy w listowej wobalce. 58lětny šofer dawaše „spřećiwjace so informacije“ wo tym, zwotkel pjenjezy pochadźeja. Mnóstwa wjace hač 10 000 eurow dyrbja na namjeznych přechodach do Němskeje přizjewjene być.
Jědnaćelětneho paducha awta je policija w delnjosakskim Gifhornje lepiła. Šofer bě awto skrótka wopušćił, zo by sej při kiosku něšto k jědźi kupił. Klučik drje bě tčacy wostajił. Jědnaćelětny z 13lětnym towaršom to wuži a wotjědźe. 31lětny wóz z druhim awtom přesćěhowaše. Mjeńšiny pozdźišo pokradnjene jězdźidło na křižowanišću do dalšeho awta zrazy. Škoda: 12 000 eurow.
To a tamne (08.03.21)
Njewšědnje dołhe objektiwy fotoaparatow su njedaloko lětanišća w Frankfurće n. M. zasadźenje policije zawinowali, dokelž bě je nimo jěduca žona za mašinske třělby měła. Alarmowani policisća zetkachu štyrjoch fotografow, kotřiž chcychu lětadła zwobraznić. Za to wužiwachu wosebite objektiwy. Policija přiwšěm potwjerdźi, zo je žona prawje jednała.
Najćeše wubědźowanje sankowych psow swěta w Alasce je so pod wuměnjenjemi koronapandemije zahajiło. „Iditarod“ pak njepowjedźe kaž hewak z Anchoragea, najwjetšeho města zwjazkoweho stata USA, do 1 600 kilometrow zdaleneho Nome nad Beringskim morjom. Město toho so 47 přizjewjenych zapřahow lětsa po połojcy čary zawróći. Přenocować njebudu na wsach podłu čary, ale w stanowych lěhwach zwonka sydlišćow. Wobdźělnikow chcedźa wospjet testować.
To a tamne (05.03.21)
Z jězbnej dowolnosću swojeho bratra je 26lětny na policajskim rewěrje w delnjosakskim měsće Celle spytał, so chłostanju jězdźenja bjez jězbneje dowolnosće dla wuwinyć. Zo je muž na foće dokumenta wo wjele šwižniši, wón z tym wopodstatni, zo bě wobmjezowanjow korony dla tójšto přibył. Při kontroli do toho wšak twjerdźeše, zo bě papjery doma zabył. Nazajta přijědźe z wopačnym dokumentom na stražu. Tam so skónčnje wukopa, zo scyła žanu jězbnu dowolnosć nima.
Dorost pola kenguruwow maja wot najnowšeho w Kamjeničanskim zwěrjencu. Dokelž su młodźata při porodźe přewšo móličke, hladarjo spočatnje ani njepytnychu, zo maja tam tři nowonarodźene, kotrež so w měšku při maćernym brjuše chowaja. Tak njemóža ani rjec, kak stare młodźata su. Hakle po poł lěće wone měšk maćerje prěni króć wopušća.
To a tamne (04.03.21)
Dźěle chódnika pytaja w jendźelskim městačku Storringtonje. Dwanatki chódnikowych platow běchu so přez nóc zhubili. Mjeztym je tamniše měšćanske zarjadnistwo wobkrućiło, zo na padustwo tukaja. Z pomocu nahrawanja wobstražowanskich widejowych kamerow spytaja skućićelow nětko wuslědźić.
Baćony wróća so ze zymskeho přebytka do Braniborskeje. We wjacorych wokrjesach su je hižo wuhladali, byrnjež jenož jednotliwe. Někotre z nich wšak budu nětko samolutke tydźenje na swojich partnerow čakać dyrbjeć. Kaž fachowcy měnja, klimowa změna baćony zamyla a swójbne planowanje wobwliwuje. Přerěznje měješe 1 206 porikow w Braniborskej loni 1,8 młodźatow. Za zachowanje wobstatka baćonow pak stej znajmjeńša dwě młodźeći na hnězdo trěbnej.
To a tamne (03.03.21)
Dwaj lětdźesatkaj zhubjenu mólbu, kotraž měješe poprawom we wustajeńcy New-Yorkskeho Metropolitan-muzeja wisać, su w bydlenju njedaloko muzeja namakali. Chorobna sotra, kotraž bě wo zhubjenej mólbje čitała, je zhromadnje ze synom na sćěnje wisacy wobraz bliže přepytowała. A to bě jedna z 30 mólbow afroameriskeho wuměłca Jacoba Lawrencea ze serije „Struggle (bój)“. Za pjeć wobrazami serije hižo wjele lět pytaja. Žona njewědźeše, zo ma wuměłsku drohoćinku w bydlenju.
Proch srěbacy roboter je w Erfuće zasadźenje policije zawinił. 29lětna bě w nocy spodźiwneje hary w swojim bydlenju dla wotućiła. Tukajo na paduchow so wona w spanskej stwě zamkny a alarmowaše policiju. Zastojnicy přičinu hary spěšnje wotkrychu: Elektroniski pomocnik-roboter bě so wosrjedź nocy do dźěła dał a při tym zas a zaso wo meble storkał.
To a tamne (02.03.21)
Wopity wodźer nakładneho awta je w Porynsko-Pfalcy na stražu awtodróhoweje policije přišoł, zo by sej tam swoju jězbnu dowolnosć zaso wotewzał. Tu su jemu zastojnicy dźeń do toho sćazali, po tym zo běchu jeho na parkowanišću z třomi promilemi lepili. Dokelž běše muž přeco hišće alkoholizowany, přewjedźechu dalši test, kiž wunjese znowa wjac hač promil. Kaž so wukopa, bě šofer ze swojim Lkw-jom z 30 kilometrow zdaleneho parkowanišća na stražu přijěł.
Wospjetneje nócneje hary dla dyrbi muž w Londonje wjace hač 3 000 eurow pokuty płaćić. To je sudnistwo wukazało. Muž bě swojim susodam lěta dołho z nócnym karaoke-spěwanjom a rjemjeslniskimi dźěłami spar rubił. Wjace hač 150 skóržbow so tak nakopi. Namołwy zarjadow a samo sudniski termin wón prosće ignorowaše.
To a tamne (01.03.21)
Na wšě 35 kilogramow stareje wołmy su wowcy wottřihali, kotraž žiworješe lěta dołho w awstralskich lěsach. Sobudźěłaćerjo zwěrjatownje běchu dospołnje zanjechane skoćo spočatk februara namakali. Mnóstwo wołmy wowcu tak poćežowaše, zo móžeše so lědma hišće pohibować a žrać. Mjeztym to Baarack zaso móže, kaž internetny widejo dopokazuje, kotryž su sej ludźo mjeztym 2,7 milionow króć wobhladali.
Zo chcył bamž Franciskus wotstupić, priwatny sekretar emeritowaneho bamža Benedikta XVI. Georg Gänswein jako ryzy spekulacije wotpokazuje. Přiwšěm tajka móžnosć wot starodawna wobsteji, rjekny 64lětny w Romje. W rozmołwje z argentinskimi nowinarjemi bě Franciskus rjekł, zo wočakuje swoju smjerć pak w zastojnstwje pak jako emeritowany bamž w Romje. To je spekulacije zbudźiło.
To a tamne (26.02.21)
Domjacy porod telefonisce přewodźała je wohnjowa wobora w Münsteru, dokelž nochcyše mała Luisa dlěje čakać. Staršej wołaštaj w 2 hodź. nuzowu słužbu, dokelž so porod bližeše. Nuzowy lěkar bě po puću a do chorownje bychu dwanaće mjeńšin trjebali. Luisa pak bě spěšniša. Wohnjowy wobornik staršimaj tuž telefonisce radźeše, što měłoj činić. Mać a dźowčička stej wšitko derje přetrałoj. Wobornicy na to twitterowachu: „Wšo dobre, Luisa“.
Wołanje wo pomoc je w Regensburgu policiju alarmowało. Pěšcy běchu wołanje słyšeli a wobsadku nimo jěduceho policajskeho awta na to skedźbnili. Zastojnikaj wołaštaj dalšich policistow na pomoc a móžachu skónčnje zubnolěkarsku praksu jako žórło žałosćenja zwěsćić. Chutnje wohroženy pak nichtó njebě: Wo pomoc wołało bě šulske dźěćo, kotrež so zubneho lěkarja boješe.
To a tamne (25.02.21)
Rozhłosowy sćelak za žony chcedźa srjedź lěta po wšej Němskej na runinje DAB+ zarjadować. Ideju za to měješe Lipšćanska firma Teutocast. Statistisce je dopokazane, zo žony časćišo a dlěje rozhłós słuchaja, zdźěli jednaćel firmy. Chcedźa tuž z wosebitym programom žonam „medialnu domiznu“ skićić. Program ma tež internetnje přistupny być. Nawodnicu za njón hišće pytaja.
Tři tydźenje za swojim awtom pytał je muž w Osnabrücku. 62lětny z wjesneje kónčiny bě 3. februara termina dla do města přijěł a awto chwatnje w jednym z parkowanskich domow wotstajił. Pozdźišo pak wjace njewědźeše, hdźe. Zhromadnje z dźowku je wjacore razy do Osnabrücka jěł, zo byštaj wšitke parkowanske domy w bliskosći – cyłkownje 15 – přepytałoj. Hakle po namołwje w nowinje su awto našli.
