To a tamne (05.10.23)

štwórtk, 05. oktobera 2023 spisane wot:

Powaleny płachtak na Złokomorowskim jězoru je zasadźenje policije zawinował. Swědcy běchu na hłowje stejacy čołm wuhladali a policiju wołali. Na to zasadźichu nurjakow, kotřiž pak nikoho njenamakachu. Po dwěmaj hodźinomaj akciju skónčichu, po tym zo běchu so płachtakowarjo přizjewili. Wšitcy běchu so nje­zranjeni na pobrjóh wuchowali, po tym zo bě sylny wichor wutoru wječor čołm powalił. Při tym běchu wšitke mobilne telefony do wody padnyli.

Klimowi aktiwisća su w Londonje předstajenje musicala „Les Misérables“ mylili. Policija je pjeć demonstrantow zajała. Předstajenje dyrbjachu na to skónčić a ludźi domoj pósłać. Aktiwisća žadachu sej z transparentami a chorhojemi na jewišću kónc wudobywanja zemskeho wolija a płuna. Wopytowarjo předstajenja aktiwistow wuhwizdachu.

To a tamne (04.10.23)

srjeda, 04. oktobera 2023 spisane wot:

Z paradu 75 w Francoskej přeco hišće wulce česćenych historiskich wosobowych awtow Citroën 2CV su w Parisu minjenu sobotu 75. róčnicu předstajenja kultowe jězdźidła na Pariskim awtomobilowym salonje 7. oktobra 1948 wopominali. Jako awto za jednory lud naćisnjeny wóz symbolizuje hač do dźensnišeho žiwjenske začuće ludźi w Francoskej. Hač do 1990 su wjace hač pjeć milionow „kačkow“ twarili.

Profesionalnje wuhotowany wopačny policist je w Frankfurće nad Mohanomw při wobchadnej kontroli nadpadnył. Zastojnicy wuhladachu na pódlanskim sedle módroswěcu a policajsku čapku we awće 19lětneho. Na to sej muža bliže wobhladachu a zwěsćichu, zo je technisce lěpje wuhotowany hač zastojnicy sami. Muž je policije mjeztym derje znaty a dóstanje nětko skóržbu.

To a tamne (02.10.23)

póndźela, 02. oktobera 2023 spisane wot:

Pasanća zazwonichu zawčerawšim policiju w Hannoveru, dokelž běchu wutřěle słyšeli. Prawdźepodobnje běchu je wobdźělnicy kwasneho korsa zawinowali a tuž zastojnicy ćah z awtami zadźeržachu. Cyłkownje wosom awtow policisća dokładnje přepytachu. Tež njewjesta dyrbješe z awta wulězć. Kaž policija zdźěli, pak njejsu ani jeničke brónje namakali.

Šok poćerpi 62lětny muž w Olbernhauje, jako sej zastojnicy minjeny štwórtk žadachu, zo ma so na zemju lehnyć. Po­licisća pytachu mjenujcy za njeznatym strašnym mužom a běchu přeswědčeni, zo su jeho našli. Tola po přepruwowanju 62lětneho so wukopa, zo tomu tak njeje. Dokelž je so muž při akciji zranił, pad nětko kriminalna inspekcija pře­pytuje.

To a tamne (29.09.23)

pjatk, 29. septembera 2023 spisane wot:

Krokodil w měšćanskim parku je w braniborskim Elsterwerdźe zasadźenje policije zawinował. Policija bě dźensa rano wotpowědny telefonat wobydlerja dóstała, kiž bě krokodila wuhladał a na to nuzowe čisło wolił. Prjedy hač zastojnicy přijědźechu, pěšcy zwěsćichu – po tym zo běchu so krokodilej zmužiće bližili – zo jedna so wo hrajku z kumštneje maćizny. Na to so policisća ze swojim awtom runje tak kaž sobudźěłaćerjo měšćanskeho zarjadnistwa zawróćichu.

Młode kóčki z palaceje so bróžnje wuchowali su wohnjowi wobornicy w Erzenhausenje pola Kaiserslauterna. Tam palachu so w bróžni walčki syna. Při hašenju wohnjowi wobornicy micki w synje wuhladachu a před płomjenjemi wuchowachu. Přičina wohenja jeje znata. W bróžni składowachu sta walčkow syna. Škodu trochuja na wjacore sta tysac eurow.

To a tamne (28.09.23)

štwórtk, 28. septembera 2023 spisane wot:

Po dołhim tam a sem smě bywši britiski premierminister Boris Johnson (59) na swojej ležownosći nětko tola płuwanski basenk twarić, najebać wobmyslenja ­škitarjow zwěrjatow. Twarski zarjad je twarskim dźěłam přizwolił. Při tym ma Johnson na to dźiwać, zo tam bydlacym mološam (Molche) njezeškodźi. Johnson bě pod škitom pomnikow stejace twarjenje njedaloko Oxforda za swoju swójbu kupił a chce sej tam nětko pool natwarić.

Njeplanowane rjepotanje wosrjedź rańšich powěsćow je rěčnica powěsćow ­„Tagesschau“ Susanne Daubner rozkładła. Zasadnje so wona wjeseli, zo je ataku poněčim zaso kontrolować móhła. Po připowědźenju wobeju moderatorow rańšeho wusyłanja dyrbješe so Daubner naraz smjeć, štož traješe po jeje měnjenju „wěčnje“. Wothłós w socialnych medijach pak je jednohłósnje pozitiwny.

To a tamne (27.09.23)

srjeda, 27. septembera 2023 spisane wot:

Tójšto nowych skazankow wunjesł je wopyt britiskeho krala Charlesa III. młodej francoskej winicarce. „Kak mamy tole zdokonjeć“, rjekny Noèmie Tanneau francoskim rozhłosownikam. Minjeny pjatk bě Charles na swojim wopyće w Bordeauxskej kónčinje na namjet zwjazka winicarjow młodu winicarku wopytał. Po tym zo bě telewizija wo tym rozprawjała, dožiwi winicarka njewočakowany nawal skazankow jeje wina.

Kuna w lěkarskej praksy je w Krefeldźe zasadźenje wohnjoweje wobory zawinowała. Sobudźěłaćerjo praksy běchu so na smjerć stróžili, jako zwěrjo wuhladachu a ćeknychu do susodneje stwy. Jako wohnjowa wobora dojědźe, bě zwěrjo preč. Potom pak „w röntgenowym nastroju klepotaše“. Wohnjowi wobornicy móžachu mordarja z kijom do transportneje tyzy tyknyć a pozdźišo w lěsu pušćić.

To a tamne (26.09.23)

wutora, 26. septembera 2023 spisane wot:

Hejateho kołpja přeswědčił je fachowc za kołpje Olaf Nieß w Hamburgu a je za to wjele připóznaća žnjał. Zwěrjo bě na dwórnišću měšćanskeje podzemskeje železnicy U 1 pod wagon zalězło a so spjećowaše, so zaso zminyć. Na to dyrbjachu železnisku čaru zawrěć a busy a taksije zasadźić. Přiwołanemu fachowcej so skónčnje poradźi, „kołpja přeswědčić“. Železnicarjo dźakuja so tež zwěrjeću za kooperaciju na dobro jěducych.

Rjedźenje Braniborskich wrotow po nadpadźe z barbu ze stron škitarjow klimy drje dołho traje a budźe dróše hač myslene. Na wjacorych městnach, kotrež běchu aktiwisća tydźenja z barbu popryskali, su minjene dny wšelake techniki rjedźenja wuspytali. Wuslědki chcychu sej fachowcy dźensa wobhladać. Najwjetši problem je struktura pěskowca, do kotrehož je so barba zadobyła. Horca woda abo wysoki ćišć wody móhli škody načinić. Dotal planowane kóšty 35 000 eurow za rjedźenje drje njedosahaja.

To a tamne (25.09.23)

póndźela, 25. septembera 2023 spisane wot:

„Lěsny mops čo. 20“ ma wot jutřišeho zaso w Brandenburgu nad Habolu, w ródnym měsće karikaturista a kabaretista Loriota stać. Před lětom běchu skulpturu mopsa pokradnyli. Město bě je narunać dało. Kult wokoło małeho brjuchateho psa – kotrež Loriot wosebje lubowaše – bě wuměłc sam nastorčił: „Žiwjenje bjez mopsa je móžne, ale bjez zmysła.“ Po měsće rozdźělenych steji 27 bronzowych figurow „lěsneho mopsa“. Loriot by 12. nowembra swoje stoćiny woswjećił.

Přećiwo zdźěla chaotiskim poměram na rěkach a kanalach Berlina su čołmarjo a wjesłowarjo wčera protestowali. „Je dale a strašniše za wodowy sport“, rjeknychu zamołwići Treptowskeho wjesłowarskeho zjednoćenstwa. Hłowny problem su wulke motorowe čołmy, kotrež móžeš bjez jězbneje dowolnosće wužiwać. Tute „partyjowe čołmy“ druhich wohrožuja.

To a tamne (22.09.23)

pjatk, 22. septembera 2023 spisane wot:

Njewšědnu akciju wuchowanja ze 56 metrow wysokeje cyrkwinskeje wěže je Mnichowska wohnjowa wobora zdokonjała. 72lětna žona bě ze znatymi na sławnu wěžu cyrkwje swj. Pětra zalězła, zo by jim rjany wuhlad na město pokazała. Na wěži dósta wona strowotniske problemy. Přichwatani wohnjowi wobornicy zwěsćichu, zo njeje transport žony po schodach móžny. Tuž ju na nošadle ležo z powjazami z wěže pušćichu. Turistam bě tole witana atrakcija, za kotruž so wobornikam z přikleskom dźakowachu.

Kołp na kolijach je železniski wobchad britiskeje stolicy Londona znowa haćił. Ćahi so we wčerawšim rańšim powołanskim wobchadźe zapozdźichu. Hižo srjedu bě kołp na kolijach wažnu měšćansku železnisku čaru Elizabeth Line chětro mylił. Hač jedna so wo samsne zwěrjo, zamołwići dotal hišće njewědźa.

To a tamne (21.09.23)

štwórtk, 21. septembera 2023 spisane wot:

Z kolesom na awtodróze po puću była je 30lětna žona w Delnjej Sakskej, dokelž bě jeje nawigaciska app tutu čaru doporučiła. Policist, kiž bě runje po puću na dźěło, žonu w strašnym połoženju wuhlada a zadźerža. Ze sylzami we wočomaj kolesowarka jemu zdźěli, zo je po puću na ­parkowanišćo, z kotrehož wotjědźe bus do Nižozemskeje. Policist ju tam dowjeze, jeho kolegojo starachu so wo koleso.

Hišće tójšto ludźi wo sebi přeswědčić dyrbi Julian Nagelsmann, chce-li so ze trenarjom němskeje narodneje koparskeje wubranki stać. W reprezentatiwnym woprašowanju slědźenskeho instituta YouGov jenož 33 procentow ludźi tomu přihłosuje, zo přewozmje Nagelsmann zastojnstwo Hansija Flicka. 18 procentow woprašanych Nagelsmanna jako trenarja wotpokazuje. Koparski zwjazk bě Flicka 10. septembra wuwjazał.

Serbska debata

nowostki LND