Wot 26. meje hač do 8. junija přebywaše šuler bywšeho 12. lětnika Budyskeho Serbskeho gymnazija Dawid Mark na hospodarskej ekspediciji w ameriskim swětoznatym tak mjenowanym „Silicon Valleyju“ njedaloko San Francisca w Kaliforniskej. Što je tam dožiwił a kak je so jemu tam zešło, je wón Předźenakej napisał.
Silicon Valley w Americe je znaty za swoje wuspěšne startup-zawody, hightech-firmy a sławne uniwersity, kaž stej to na přikład Stanford University abo University of Califonia, Berkeley. Swětoznate firmy kaž Apple, Intel, Google abo eBay maja swoje hłowne sydło w tymle sławnym dole. Tež wukrajne firmy, mjez nimi SAP z Němskeje, maja wotnožki w tamnišej San Francisco Bay Area, kaž metropolowy region tohorunja mjenuja.
