Za 14 milionow eurow přetwarjenu Energijowu fabriku w Hórnikecach zjawnosći zaso spřistupnja
Sakski industrijowy muzej Energijowa fabrika Hórnikecy chce so wot 16. oktobra w cyle nowym swětle prezentować. Zjawnosći přistupne budu w něhdyšej briketowni najmoderniše wustajenske swěty ze swěcy, kowa a škleńcy, zwjazane z čerwjenocyhelowej industrijowej kulturu.
„Industrijowy ansambl briketoweje fabriki ze zawodnym sydlišćom Hórnikecy je so wot lěta 1990 na jónkrótnu pomnikowu městnosć we Wojerecach a Łužicy wuwił“, wuswětla Birgit Weber, přirjadnica Budyskeho krajneho rady. „Z projektom ,energijowe dwory‘ chcemy wuspěšny proces nětko rozšěrić, tworjo tak wosebitu městnosć žiweje industrijoweje kultury.“ Za 25 hektarow wulki areal a k tomu słušacy zjawnosći njepřistupny Čaplacy jězor je Budyski wokrjes jako wobsedźer z pomocu spěchowanskich srědkow wot lěta 2017 něhdźe 14 milionow eurow nałožił.
