Spokojacy start za blidotenistow

wutora, 17. oktobera 2017
artikl hódnoćić
(0 )
Dorostowe mustwo wotrjada blidotenis Viktorije Worklecy. Stejo wotlěwa Jerome Wićaz, Marija Rječkec, Benjamin Grutka a Jurij Čornak.  Foto: Marcel Rjelka Dorostowe mustwo wotrjada blidotenis Viktorije Worklecy. Stejo wotlěwa Jerome Wićaz, Marija Rječkec, Benjamin Grutka a Jurij Čornak. Foto: Marcel Rjelka

Nowa hrajna doba je za dorost Viktorije Worklecy kaž mały nowozapočatk, dokelž dyrbjachu so hnydom třo nowi hrajerjo do mustwa integrować. Šulskich a hinašich přičin dla su třo młodźi blidotenisća mjenujcy bičk načasnje nabok połožili. Čim rjeńšo je widźeć, kak hižo nazhonjeni hrajerjo nowačkam pomhaja so w treningu a w hrě dale wukmanjeć.

Prěnjej hrě přećiwo TTV 97 Kamjenc a přećiwo druhemu zastupnistwu SZ Módro-běli Njeswačidło skónčištej so ze sprawnym 7:7. Nazhonjeni zajacy Benjamin Grutka, Jurij Čornak a Jerome Wićaz wudobychu sej kaž wočakowane dypki a zawěsćichu za Viktoriju porjadny start do noweje sezony. Za nowačkow Titusa Kubicu, Laurenca Wićaza a Mariju Rječkec, kotřiž hakle lěto trenuja, rěka w prěnich hrach wosebje wjeselo měć, so wuspytać a toho jednoho abo druheho přećiwnika prosće mjerzać. Dotal so hišće nikomu njeje poradźiło sej dypk za mustwo wudobyć, za to pak su prěnje sadźby za sebje rozsudźić móhli. Tež nazwučowarjo přećiwnikow su to hižo z chwalbu mytowali.

wozjewjene w: Sport
Prošu přizjewće so, chceće-li komentar podać

Serbska debata

nowostki LND