12. nócny žabjacy běh w Běłej
Na rjanym pózdnim wječoru w Běłej (Biehla) za Kamjencom je so minjeny pjatk na mjeztym hižo 12. nócnym žabjacym běhu po tamnišej krasnej idyliskej hatnej krajinje 958 běharkow a běharjow a 144 lubowarjow walkinga na distancomaj 2 km abo 9,6 km wubědźowało. Aktiwni běchu z wjacorych zwjazkowych krajow Němskeje. Mjez nimi je tež nimale dwaceći serbskich entuziastow swoju spěšnosć a wutrajnosć měriło, a to dosć wuspěšnje.
Njeposrědnje po chowanju słónca w 21.24 hodź. startowaše tradicionalne wubědźowanje na 9,6 km (691 w cilu, z nich 239 žónskich) wo pokalej žabjaceho krala a žabjaceje kralowny. Wubědźiłoj staj sej jej Marc Schulze z Drježdźan (29:28 min.) a Romy Stotz z Drježdźan (38:10 min.). Najwuspěšnišej serbskej starteraj běštaj Jakub Čórlich z Němcow (sk 20 /4. městno / cyłkowne 6. městno / 34:10 min.) a Klawdija Hejdušcyna z Hory (sk 40 / 2. městno / cyłkowne 8. městno / 39:41 min.).