Drohotka Ramnow – ST 1922 Radwor 4:1 (2:1)

Zestawa hosći: Jendrewski – Henka, Reineke, Šołta, Nuk, Wjeńka, Omran, Kral, Glücklich (45. Jatzwauk), Zähr, Pečak (45. Bauer)

Jako Radworčenjo do Ramnowa dojědźechu, bě zwotprědka jasne, zo su koparjo hosćićela jasny faworit, wšako hraja tući technisce dobru a wuspěšnu kopańcu a njesteja bjez přičiny w hornjej třećinje tabulki. Domjacy cyłk hnydom po starće do duela hru dominowaše. Hižo po dźewjeć mjeńšinach klinkaše we wrotach Juliusa Jendrewskeho, dokelž zaspachu hosćo z Radworja start kompletnje. Hakle po wrotach dopomnichu so Ra­d­worscy koparjo, zo móža tež tróšku kopańcu hrać a zo maja tež wuspěch, hdyž spytaja z kombinacijemi před wrota přećiwnika přińć. Tak trjechi Stephan Reineke w 33. mjeńšinje po přihrawce Mateja Wjeńki z něhdźe 16 metrow do kuta. Tola tuta kombinacija bě tež hižo jenički highlight Radworskich w prěnim połčasu. Hižo štyri mjeńšiny pozdźišo smědźachu zaso domjacy wyskać, jako trjechichu k 2:1. Z tutym mjezyrezultatom podaštej so cyłkaj do přestawki.

Awtor dźensa

Jan Hrjehor

Punt sykaneho Pětra, nyšpor jutrońčku w Kulowje, kliny za skakanje a zababjeny běhar w Pěskečanskim lěsu – to su štyri hesła, kotrež su mje w zašłymaj tydźenjomaj zaběrali, a kotrež maja wšitke poćah k sportej a tuž tež k dźensnišej sportowej kolumnje.

„Jano! Sym ze Siegmarom, ty tla wěš, Wätzlichom, hišće před měsacom rěčał, a to je wón mi prajił, zo je sej wón duel Rakecy – Porchow we wokrjesnej wyšej lize wobhladał. ‚Cyle špatny niwow‘ je wón mi dźeń po tym na kromje hrajnišća při partiji Ramnow – Ralbicy prajił, a nětko je wón hižo zemrěty“, rozprawješe mi do jutrow Róžeńčan Stanij Suchi, kiž bě z Wätzlichom spřećeleny. Njetraješe dołho, to namakam w swojim mejlowym kašćiku powěsć sportoweho přećela Heinza Noacka z Wulkeje Dubrawy, kotryž so mi wuskorži, zo je něhdyša legenda Drohotki Ramnow a Dynama Drježdźany poprawom hišće raz z puntom sykaneho Pětra do Wulkeje Dubrawy na interview přijěć chcyła. Zeleny štwórtk pak je Siegmar Wätzlich na prawdu Božu wotešoł.

Wotewrjenje zeleneje sezony

Njedźelu zahaja w Kulowje na tamnišim jěchanišću nowu sezonu pod hołym njebjom, a to mjez 10 a 16 hodź. Kulowske jěchanske sportowe towarstwo wo­čakuje něhdźe 60 jěcharkow a jěcharjow ze swojimi konjemi. Štyrinohače a jěcharjo maja so na turněry zwučić a swoju aktualnu formu testować. Sćěhowace pruwowanja steja na programje: pře­křižne-parcours-skakanje do 18 lět, małe skakanje z kałanjom, srjedźne skaka­nje z kałanjom a wulke skakanje z kałanjom.

Dumpery startuja w Adelsdorfje

Njedźelu w dwěmaj zaklinči startowy signal za prěnje wurisanje Němskich dumperowych mišterstwow 2019, a to w Adelsdorfje. To wosebite lětsa budźe, zo pojědu dumpersportowcy hnydom dwójce w Hornjej Łužicy, 13. julija w Baćonju a 29. septembra w Hórkach.

Chróšćenjo před wažnej hru

32. běh wo hórskeju kralow na wjeršk­ Mnišonca

Kaž kóžde lěto w aprylu wotmě so, mjeztym hižo 32. raz, tradicionalne wubě­dźowanje běharkow a běharjow wo hórskeju kralow na znatu horu Mnišonc. Cil na­ horje přeprěči lětsa 116 atletow (z nich 27 žónskich), štož je nowy rekord. Ze sylneho pola starterow je sej Marco Friedrich z Budyšina w spěšnych 13:20 min titul hórskeho krala zawěsćił a jeničce 41 sekundow za nim docpě mjeztym hižo 40lětny něhdyši wuspěšny triatlet němskeho narodneho mustwa Maik Petzold­, tež nětko zaso Budyšan, jako druhi cil (14:01 min). Serbski lubowar běhow,­ wosebje na dołhich čarach, Jan Krawc z Hrubjelčic (sk 45) wubědźi sej prima cyłkowne 27. městno w spěšnych 18:13 min. Wusahowałoj běštaj wosebje tež wukonaj staršeju starterow z Budy­šina: Silvio Schade (sk 50) wubědźi sej cyłkowne 10. městno (16:27 min) a nan Maika Petzolda, Reinhard Petzold (sk 65!) wuběrne 30. městno (18:24 min).

Pola žonow bě, kaž hižo tójšto króć, 34lětna Franziska Kranich ze Zhorjelca hórska kralowna (16:09 min). Serbskej starterce zmištrowaštej tule ćežku čaru z brawuru: Katja Žurowa z Budyšina 7. městno (19:45 min) a Katarina Bejmakowa z Radworja 17. městno (22:54 min).