Znate sportowe hesło rěka: „Po sezonje je do sezony.“ Prjedy pak hač so hrajna doba 2019/2020 za prěnje kaž tež druhe mustwo Hrajneho zjednoćenstwa Pančicy-Worklecy započnje, chcyštej so žonjacej wolejbulowej cyłkaj na to přihotować. Prěnje mustwo wostanje we wobwodnej lize, nowowutworjene druhe zastupnistwo započnje we wobwodnej klasy.
Hrajne zjednoćenstwo Pančicy-Worklecy ma tuchwilu dosć wolejbulistkow k dispoziciji, a tak móžachu rezerwu bjez wobmyslenjow wutworić. Za optimalny přihot stej teamaj zhromadne kónctydźenske treningowe lěhwo we Łužicy přewjedłoj. Zazběh tworješe prěni trening pjatk wječor w Pančičanskej ćěłozwučowarni. W srjedźišću steješe wospjetowanje a skrućenje techniki a taktiki.