Awtor dźensa
Tadej Cyž
Zo słuša namóc bohužel k fanowej kulturje w sporće, hižo dlěši čas wěmy. Přeco zaso mamy konflikty mjez jednotliwymi skupinami přiwisnikow. W stadionach je namóc prezentna. Nětko pak je tež teror sport a wosebje kopańcu dosćahnył. To je nowa situacija za wšitkich, kotřiž so za sport horja. Wšojedne, hač su to aktiwni, pomocnicy abo fanojo, wšitcy dyrbja so z nowej dimensiju namocy rozestajeć.
Zašły hrajny dźeń w koparskich klasach wotmě so bohudźak bjez wulkich konfliktow. Kak pak najlěpje ze strachom w stadionach wobchadźamy? Na to mamy zawěsće najwšelakoriše wotmołwy. Přiwisnicy kopańcy su minjeny kónc tydźenja prawu reakciju pokazali. Nimale wšitke stadiony w prěnjej a druhej zwjazkowej lize běchu wupředate a atmosfera bě přijomna. Respekt před namocu haj, ale žadyn strach! Jeli lubowarjo sporta swój hobby spušća, su terorisća swój zaměr hižo docpěli.
