FSV Budissa Budyšin – FSV Optik Rathenow 0:4 (0:1)
Zestawa domjacych: Schulz – Patka, Dartsch (60. Schlicht), Weiß (46. Kasiar), Kral, Hoßmang, Wockatz, Ciapa, Schmidt, Treu (69. Krawčik), Bönisch
428 přihladowarjow, kiž běchu sobotu na Młynkec łuku přichwatali, chcychu skónčnje zaso raz dobyće swjećić. Do Budyšina bě k zestupnemu bojej mjenujcy posledni tabulki Optik Rathenow přijěł. Štož pak přiwisnicy domjaceho cyłka w 90 mjeńšinach widźachu, bě cyle jednorje blamabelne. Jenož jedyn cyłk bě spóznał, što zestupny bój woprawdźe rěka, a to běchu hosćo. Hakle před krótkim běchu woni w Neugersdorfje 0:4 přěhrali.
Prěnju šansu hry drje měješe Budyšan Tim Wockatz (6.), potom pak běchu tež hosćo w hrě. Najprjedy wotwobara Christopher Schulz třělwu Cüneyta Erala Topa wuběrnje (17.) a tež wólny kop Canera Özcina bě wěsty popad wrotarja Budissy (21.). Jako ličachu k přestawce wšitcy hižo z 0:0, poradźichu so hosćom wrota. Wólny kop Süleymana Kapana wuži Caner Özcin z njedźeržomnym hłójčkowanym bulom k 0:1 (44.).