K přinoškej „Chaos a njedokónčene wólby“ a ke krótkokomentarej „Mój wid“ we wudaću SN 16. januara piše dr. Hartmut Leipner z Choćebuza, městopředsyda Domowiny:

Serbske Nowiny su rozprawjeli, zo je so wuzwolenje sakskich serbskich čłonow rady Załožby za serbski lud w chaosu skónčiło. Tomu tak było njeje. W čestnohamtskim dźěle móže so stać, zo so hišće raz prašeja, hač je cyłe postupowanje prawje było. Tajke prašenja a slědowace zjawne diskusije njejsu chaos, ale wobstatk demokratije. Naposledk je zwjazkowe předsydstwo za wuslědk měło, zo pjeć wot 25 wotedatych hłosow wjetšina njeje, štož hižo ze šulskeje matematiki wěmy.

„Domowina postaji prosće přidatne zadźěwki za nowych čłonow załožboweje rady“, pišu kandidatka a kandidataj Serbskeho sejma Marlis Pjacec, dr. Hagen Domaška a dr. Měrćin Krawc po wólbje čłonow załožboweje rady minjeny pjatk, 13. januara. Tak njebu jedne městno zastupowaceho čłona najebać dosć kandidowacych wobsadźene:

Smy so na wólbach wobdźělili, dokelž chcemy so na centralnym městnje rozdźělenja srědkow na dobro serbskeho ludu angažować. Runočasnje smy so z tym, najebać naše kritiske nastajenje napřećo aktualnej politiskej strukturje w Serbach, tež jako akt podaća ruki a podpěry Domowinje k dispoziciji stajili, wšako je so w prěnjej dobje požadanja přemało kandidatow přizjewiło. To smy w swěrnej ­wěrje nastupajo płaćiwy wólbny porjad činili. Tele wólby maja wysoki demokratiski narok, dźe we wolenym gremiju tola wo wužiwanje wysokich sumow zjawnych srědkow, potajkim wo wyšnostny nadawk.

Hinc Cuška z Budyšina wo aktualnym wusyłanju magacina „Wuhladko“ piše:

Ze zajimom sćěhowach přinošk wo rozsudźe předsydy Domowiny Dawida Statnika, w Budyskim wo­krjesnym sejmiku za namjet AfD hłosować. Chětro so dźiwach, zo rjad profilowanych serbskich wosobow wotpokaza, so zjawnje k tomu zwuraznić. Měnju, zo smě tež předsyda Domowiny po swojim přeswědčenju stronje přisłušeć, zo njesměł so pak we wšěm stronskej disciplinje kłonić.

Elwira Hančo ze Slepoho wupraja so k přinoškej wo „Slepjanskim dźěćetku“ na Wjacławskich wikach w Budyšinje (SN 23. decembra 2022). Wona je čłonka towarstwa „Kólesko“ a awtorka knihi „Gładźarnica“, w kotrejž wopisuje drastu dźěćetkow.

Njepřemyslena akcija, kotruž drje su organizatorojo za dobru ideju měli, je w Slepjanskej wosadźe wulki hněw zbudźiła: jako su na hodownych wikach w Budyšinje dźěćetko našeje wosady napodobnili, a to hišće do 1. adwenta! Tuta groteskna scenerija „Slepjanskeho dźěćetka“ ze swojimi přewodźerkami běše mi hrózbny napohlad, přetož ze Slepjanskej drastu so woprawdźe wuznaju. Njewěm ani, što je mje bóle mjerzało: hač wopak a njerodnje zdrasćene holcy abo zo bě tónle wustup w Budyšinje wot poprawneho nałožka dospołnje wotrěznjeny.