Wjac hač stolětna tradicija so kónči
Grodk (JoS/SN). Hižo dlěši čas we wukładnym woknje Kießigec pjekarnje w Grodku připowědźeja ju předać. Mjeztym wšak je tež pjekarski mišter w 4. generaciji Scharfec rodźiny Reiner Kießig 64 lět a nosy so hižo dlěje z mysličku so na wuměnk podać. Patoržicu tam tuž pěc hasnu – najprjedy raz!
Załožił je tradicisku pjekarnju Carl Scharf wokoło 1910. Jeho syn Erich wjedźeše ju wot lěta 1931 do 1957, stajnje na samsnym městnje na Georgenowej hasy. Wot 1958 do 1993 bě přichodny syn Martin Kießig třeći w rjedźe načolnikow pjekarnje a 1994 přewza ju syn Reiner. Tón ma ju nětko zawrěć, njebudźe-li naslědnika. Cyle poslednje słowo w naležnosći drje hišće prajene njeje, wěste pak je, „žiwy adwentny kalender“ města Grodka w pjekarni pod režiju Reinera Kießiga wotmě so minjeny tydźeń posledni króć. Na akciji je so wón wot wšeho spočatka wobdźělał. Hosćo běchu stajnje ći najmjeńši ze Zelezničanskeje (Sellessen) pěstowarnje z dohodownym programom. Na lětušim posrědkowaše pjekarskemu mištrej nimo toho zastupnica města Grodka Andrea Kupke dźak za dźesaćlětnu swěru.
Na BTU nastanje moderny labor
15 milionow eurow za nowe slědźenišćo w Choćebuzu přizwolenych
Choćebuz (SN). Dalši impuls za strukturne wuwiće Łužicy: Zwjazk je nětko 15 milionow eurow za natwar slědźenskeho labora „3D-lab“ na Braniborskej techniskej uniwersiće Choćebuz-Zły Komorow (BTU) přizwolił. Su to srědki z hnydomneho spěchowanskeho programa za wuhlowe kónčiny. Braniborski ministerski prezident Dietmar Woidke, ministerka za wědomosć Manja Schüle a hospodarski minister Jörg Steinbach (wšitcy SPD) witaja rozsud jako „wažny signal za Łužicu“.
Planowany 3D-lab na BTU zmóžnja slědźenje a dalewuwiće ćišćanych dźěłowych maćiznow. W laborje móža přichodnje wšitke procesowe kročele 3D-ćišća přeslědźić, zo móhli na přikład ultralochke dźěle za lětarstwo abo narunanske dźěle za wšelake industrijne wotnožki zhotowjeć. 3D-lab je jako multitechnologiska platforma koncipowany a dowola ze wšelakich zhotowjenskich procesow te formy zestajeć, kotrež so najlěpje hromadu hodźa. Z laborom chce delnjołužiska uniwersita kooperaciju z předewzaćemi sylnić a wědomostny transfer skrućić.
Z ćahom spěšnišo do Wrócławja
Pólska nadawk spjelniła
Koncern hišće njerozsudźił
Nadźija na nowu twornju chemijoweho předewzaća w Carnym Gozdźe
Budyšin (SN/BŠe). Wšelake medije su wčera rozprawjeli, zo chce koncern BASF na swojim stejnišću w Carnym Gozdźe (Schwarzheide) fabriku za zhotowjenje baterijow twarić. Cyłkownje 500 milinow eurow chcyli tam inwestować, kaž měnještej Berliner Zeitung a Bild. Po wšěm zdaću běchu to nowinarjo z internych kruhow zhonili.
Rěčnica BASF wšak mjeztym zdźěli, zo chcedźa hakle klětu wo nowej tworni rozsudźić. Tež wot medijow mjenowanu sumu nochcyše wona wobkrućić. Chemijowe předewzaće w Carnym Gozdźe pak ma dobre šansy nowy zawod dóstać, wšako je koncern Tesla hakle njedawno připowědźił w Braniborskej tajki twarić. Wobaj móhłoj w bjezposrědnjej bliskosći derje hromadźe dźěłać a sej po krótkich pućach materialije dodawać. Braniborski ministerski prezident Dietmar Woidke (SPD) so jara nadźija, zo so za łužiske stejnišćo rozsudźa. „Tam dźě wšitko je, štož trjebaja“, wón podšmórny.
Milina budźe klětu dróša
Wojerecy (AK/SN). Płaćizna miliny Wojerowskeho zastaraćelskeho zawoda VBH klětu wo tři procenty postupi. To wotpowěduje přerěznemu přidatnemu měsačnemu poćežowanju 2,42 eurow. „Přičiny su přiběrace statne popłatki, mjez druhim za wobnowjomne energije a stupace kóšty za wobstaranje miliny na bursy. Jeničce płaćizna miliny na bursy je wot lěta 2016 wo 50 procentow rozrostła“, rjekny jednaćel VBH Wolf-Thomas Hendrich we Wojerecach.
Najebać podróšenje leži VBH pod płaćiznu druhich poskićerjow w Sakskej. Njezměnjena wostanje płaćizna płuna, kotraž je mjeztym wot lěta 2015 stabilna. Dale tunja je tež dalnoćopłota z milinarnje w Čornej Pumpje, kotraž je wo 20 procentow tuńša hač płunowe tepjenje, zawod informuje.
Přiběrace płaćizny miliny wuskutkuja so tež na płaćizny wody a wopłóčkow. Wo tym chce VBH ludźi separatnje informować. Předewšěm rumowanje błóta z wodočisćernjow, twarske naprawy a personalne kóšty wyše płaćizny wuskutkuja.
Njedostatk fachowcow wulke riziko
Kóžde štwórte łužiske předewzaće z toho wuchadźa, zo so jeho wobchodnistwo w běhu přichodneho lěta pohubjeńši. To je jedyn wuslědk 9. konjunkturneho naprašowanja Industrijneju a wikowanskeju komorow (IHK) Choćebuz a Drježdźany, předstajeny tele dny w Zhorjelcu.
Zhorjelc (SN/at). 704 předewzaća su so na 9. zhromadnym naprašowanju wobdźělili, kotrež dźěłaja w komorowej wobwodaj přesahowacym hospodarskim rumje Łužica. Wone su z industrije, twarstwa, wulko- a drobnowikowanja, wobchada a posłužboweho přemysła we wokrjesach Budyšin, Zhorjelc, Halštrow-Łobjo, Hornje Błóta-Łužica, SprjewjaNysa a z města Choćebuza.
Po wjeršku předewzaćelskeje nalady nalěto 2018 slěduje z wida łužiskich firmownikow hižo druhe lěto tójšto mjenje optimizma. „Wosebje industrija jako wjelelětna lokomotiwa konjunktury je najebać snadny přirost wobrota tajkemu wuwiću polěkowała. Ćim wažniše za branšu je, kajke budu rozsudy nastupajo přichodne łužiske hospodarske struktury“, podšmórny dr. Detlef Hamann, hłowny jednaćel Drježdźanskeje IHK.
Mzda bórze wyša
Kulow (SN/at). Nastupajo prócu wo lěpšu mzdu w Kulowskej meblowej tworni Maja stej jednaćelstwo a dźěłarnistwo IG metal krok dale. Kaž w zhromadnej nowinskej zdźělence rěka, stej wobě stronje wčera w Kulowje připóznawanske tarifowe zrěčenje podpisałoj. To je předewzaću „jězbny plan“, po kotrymž swoje mzdy niwowej w Sakskej płaćiweho přestrjenjoweho tarifoweho zrěčenja za drjewo předźěłacu industriju přibliža.
Kaž jednaćelstwo a dźěłarnistwo zwěsćatej, woznamjenja po měsacy trajacych intensiwnych jednanjach docpěty wuslědk za jednaćelstwo kaž tež za wjace hač 700 sobudźěłaćerkow a sobudźěłaćerjow zawoda w Kulowje planowansku wěstotu do přichoda. Wot 1. januara 2020 dóstanu přistajeni w krokach wyšu, na tarifowe zrěčenje přiměrjenu mzdu.
