Wočaknu rozsud sudnistwow

pjatk, 11. septembera 2015 spisane wot:

Rychbach (SN/JK). Regionalny planowanski zwjazk Hornja Łužica-Delnja Šleska je so wčera na swojej 90. zwjazkowej zhromadźinje w Rychbachu pola Zhorjelca schadźował.

Gremiji wuradźowaše mjez druhim wo hospodarskim planje přichodneho lěta. Doskónčnje so čłonojo zwjazka hišće na wšitke nadrobnosće dojednać njemóžachu. Tak budu naćisk plana na přichodnej zhromadźiznje kónc oktobra w Zhorjelcu dale rozjimać. W dalšim dypku zabrachu čłonojo zwjazka stejišćo k namjetej dźělneho plana­ wužiwanja płonin za produkowanje wětroweje energije, štož ma regionalne planowanske zhromadźenstwo Łužica-Błóta planowane. Wotpohladej, stejnišćo za wětrniki planować, je planowanski zwjazk wčera přihłosował.

Prěnju namołwu móža wudać

srjeda, 09. septembera 2015 spisane wot:

Rakecy (SN/JK). Zdźělenka wo přizwolenju srědkow za prěni schodźenk spěchowanja je dźensa dóšła. To zdźěli regionalny manager Leaderoweje kónčiny Hornjołužiska hola a haty Rudolf Rychtar na naprašowanje Serbskich Nowin. Ručež móžno chcedźa ju na internetnej stronje wozjewić a zdobom wšitkim, kotřiž su dotal projekty zapodali, zdźělić, zo smědźa spěchowansku próstwu stajić. Wotpowědna namołwa k přizjewjenju slěduje. Hač do kónca oktobra maja so próstwy za prěnju spěchowansku namołwu w regionalnym běrowje w Rakecach zapodać. Rozsudźacy gremij potom wo přidźělenju srědkow na swojim zetkanju 30. nowembra rozsudźi.

Za prěnju spěchowansku dobu je 850 000 eurow k dispoziciji. Z nimi maja so projekty k wuwiću a zachowanju wjesnych strukturow a wosebitosćow w dwurěčnym regionje Hornjeje Łužicy podpěrać. Projekty, kotrež so w prěnim kole njewobkedźbuja, hodźa so po přichodnej namołwje znowa zapodać.

Z komisiju rěčeć

wutora, 08. septembera 2015 spisane wot:

Stara Darbnja/Brüssel (SN). Ze składowanjom błóta ze železowym hydroksidom w Starodarbnjanskim jězoru budźe so nětko tež Europska unija zaběrać.

Zastupjerjo wobydlerskeje iniciatiwy Starodarbnjanski jězor a zapósłancy Krajneho sejma Braniborskeje Dieter Dombrowski (CDU), Roswitha Schier (CDU) a Heide Schinowsky (Zeleni) chcedźa so jutře w Brüsselu z generalnej direkciju Europskeje unije za wobswět wo problemje błóta rozmołwjeć. Na naprašowanje frakcije CDU w braniborskim sejmje w aprylu je komisija EU zdźěliła, zo ma starosće wobydlerjow hladajo na wuskutki składowanja železoweho hydroksida w Starodarbnjanskim jězoru za woprawnjene. W Brüsselu chcedźa wotmołwy namakać na prašenja wobydlerjow, kotrež su w katalogu zjimali. Z rozmołwu ze zamołwitymi EU spjelni Dieter Dombrowski přilubjenje z měrca, naležnosć wobydlerskeje iniciatiwy komisiji EU přednjesć.

Přećiwo planowanemu składowanju błóta w jězoru hiba so hižo dlěši čas protest. Peticiju wobydlerskeje iniciatiwy je mjeztym 6 000 podpěrarjow podpisało.

Łužicu dotal wuspěšnje saněrowali

póndźela, 07. septembera 2015 spisane wot:

Zły Komorow (SN/JK). Mócnje klinčeše minjeny pjatk hórniska hymna po swjedźenskim stanje w Złym Komorowje. Znamjo to, zo bě so swjatočny dźěl zarjadowanje składnostnje 20lětneho wobstaća Łužiskeje a srjedźoněmskeje towaršnosće hórnistwoweho zarjadnistwa (LMBV) skónčił a zawodny swjedźeń nimale 700 přistajenych předewzaća zahajił.

W swojich postrownych słowach hódnoćachu do toho ministerskaj prezidentaj Braniborskeje Dietmar Woidke (SPD) a Sakskeje Stanisław Tilich (CDU) kaž tež zastupjer zwjazkoweho knježerstwa, parlamentariski statny sekretar Jens Spahn (CDU) wuspěchi wuchodoněmskeho předewzaća za rekultiwowanje a saněrowanje hórniskeje naslědneje krajiny.

„We Łužicy je so telko na dobro kraja změniło, wo čimž njejsmy spočatnje žane prawe předstawy měli“, wopisowaše Dietmar Woidke změny we Łužicy. Wón wupraji so za dalše wuwiće brunicoweho hórnistwa a wuzběhny, zo wostanje energijowe hospodarstwo dale žro Łužicy. Wšo druhe by po jeho słowach wopak było. Za to­ žněješe wón sylny přiklesk a mócne přihłosowanje přitomnych.

Młodaj Serbaj nětko rjemjeslnikaj

póndźela, 07. septembera 2015 spisane wot:

Budyšin (SN/MiR). Mjez 59 wučomnikami – rěznikami, pjekarjemi, předawarkami, blidarjemi, frizerami, mulerjemi, běrowowymi překupcami kaž tež molerjemi a lakěrarjemi –, kotřiž su lětsa swoje rjemjeslniske pruwowanje wuspěšnje wobstali, staj młodaj Serbaj. Marcel Kral z Ralbic a Florian Šołta z Hórkow staj nětko moler a lakěrar. Před třomi lětami, jako běštaj wukubłanje započałoj, bě jich 18 wučomnikow. Sobotu pak steještaj jako jeničkaj w swojim powołanju z kónčnym wopismom na jewišću wulkeje žurle w Budyskim Dźiwadle na hrodźe. Druzy běchu wukubłanje přetorhnyli abo njeběchu pruwowanje wobstali. Młodaj Serbaj staj mjeztym w swojimaj wukubłanskimaj zawodomaj přistajenaj jako moler a lakěrar.

Wjacore pućiki wjedu na 499 metrow wysoki Wulki Pichow. Najsławniša je pućowanska šćežka Němskeje jednoty, kotraž wjedźe 1 080 kilometrow wot Zhorjelca hač do Aachena tež po tutej horje. Hač ma rozsud Němskeho pućowanskeho zwjazka z powěsću wo nastaću mjena hory činić? Jako w dawnych časach pralěs horu pokrywaše, zasydlichu so w dole Wendojo. Jednoho dnja zalězechu někotři z nich na wjeršk hory. Prěni, kiž bě nahi dypk docpěł, zawoła: „Běch jow!“ Tónle wukřik je horje mjeno dał, steji na tafli.

Na horje samej je wšitko, štož słyšiš, ničo – nimo fifolenja ptačkow. Runje to wšak wabi mějićelku tamnišeje hórskeje bawdy Annett Grundmann wšědnje na Wulkim Pichowje přebywać. „Měr je to, štož mje cyłe žiwjenje přewodźa“, Annett Grundmann potwjerdźa. Čas žiwjenja wona na horje bydli a nochce nihdźe druhdźe być. Hižo jeje staršej běštaj wot lěta 1965 hač do 2003 hosćenc wobhospodariłoj. Po smjerći nana přewza jón dźowka Annett. Mjeztym 49lětna steji dźensa na čole małeho mustwa.

Bjezdźěłnosć dale woteběrała

wutora, 01. septembera 2015 spisane wot:

Budyšin (CK/SN). W awgusće bě w Hornjej Łužicy 26 476 bjezdźěłnych. To je 264 mjenje hač w juliju a dohromady 1 771 mjenje hač před lětom. W nimale wšěch wotnožkach Budyskeje agentury za dźěło woteběraše ličba tych, kotřiž su bjez dźěłoweho městna registrowani. Wuwzaće je Kamjenska, hdźež bě so ličba snadnušce wo pjeć wosobow powjetšiła.

Bjezdźěłnosć je po słowach Thomasa Berndta słabšo woteběrała hač w předměsacach. To pak je typiske za měsac awgust, zwěsći dźensa šef Budyskeje agentury za dźěło. Jedna přičina je, zo njejsu wšitcy wučomnicy po zakónčenju zawodneho abo šulskeho wukubłanja hnydom dźěłowe městno našli.

Kwota bjezdźěłnosće wučinja 9,1 procent­. Wona chabła mjez 5,0 procentami w Radebergu a 5,2 w Kamjencu kaž tež 13,7 procentami w Zhorjelcu.

Dźěłodawarjo su posrědkowarjam w dźěłodawarskim serwisu minjeny měsac 1 207 nowych dźěłowych městnow přizjewili. Naprašowanje za personalom wosta dale na wysokim niwowje.

Hórska korčma na Oybinje w Žitawskich horinach je we wjacorych nastupanjach něšto cyle wosebite. Sprěnja móžeš ju jenož pěši docpěć, wšako słuša wona k daloko znatej pomnikoškitanej hórskej klóšterskej ruinje. Z teje přičiny wšak maš při zachodźe twjerdźizny tež zastup płaćić. A jeje wotewrjenske časy płaća zdobom za korčmu.

Pod hesłom „sej tak prawje lubić dać“ ma so jeje wobhospodarjer Hans-Jürgen Brüx po tym, kak běchu ći rubježni ryćerjo něhdy žiwi byli. Woni njeběchu so jenož po dobytych bojach prawdźepodobnje tak prawje do žranja dali. Tak bě to samo hižo w 14. lětstotku, jako na Oybinje twjerdźiznu natwarichu. Po słowach Brüxa měli sej tuž tež dźensa popřeć, štož bě něhdyšim rjekam lube: za wulkim dubowym blidom sedźo so tak porjadnje nasyćić, kaž to jeno z filmow wo srjedźowěku znajemy.

Dokumentacija změny Łužicy wotewrjena

wutora, 25. awgusta 2015 spisane wot:

Wčera je tradiciske towarstwo „Čorna Pumpa“ přepodało přehladku wo 60lětnym wuwiću kombinata a industrijoweho parka Čorna Pumpa. Tak dokumentuja wuwiće energijoweho regiona.

Čorna Pumpa (JoS/SN). Na wulkej žurli centralneje kuchnje maja hosćo a přistajeni Čornopumpskeho industrijoweho parka wot wčerawšeho móžnosć, sej wobhladać wustajeńcu „60 lět industrijowy park Čorna Pumpa“.

Wukubłuja we wysokej kwaliće

póndźela, 24. awgusta 2015 spisane wot:

Štyrjom młodym ludźom su minjeny pjatk na Grodkowskim hrodźe wuswědčenja wobstatych pruwowanjow po powołanskim wukubłanju w papjercowni w Čornej Pumpje přepodali. Runočasnje dósta wosom nowych wučomnikow swoje zrěčenje.

Grodk (JoS/SN). Runje tak tradicionalne kaž swjatočne zarjadowanje k rozžohnowanju wučomnikow papjercownje Hamburger Rieger tzwr a Dunapack wotmě so minjeny pjatk na Grodkowskim hrodźe. Přišli běchu tohorunja jich wukubłarjo a starši kaž tež ći nowi, kotřiž su dźensa swoje wukubłanje zahajili. Personalna nawodnica za wšitke wotnožki Hamburger Rieger dr. Doreen Wächtler rjekny, zo su fachowe kmanosće dorosta prašane a zo je dobre wukubłanje powołanski fundament kóždeho čłowjeka. „Poskićamy jara naročne wukubłanje dźakowano angažowanym wukubłarjam a dźakowano partneram towaršnosće wu- a dalekubłanja (GAF) we Wojerecach a Němskej železnicy w Choćebuzu. Zo móhli we wubědźowanju wobstać, trjebamy młodych fachowcow. Za přichod su jim wšitke durje wotewrjene.“

nawěšk

  • Jara awtentiske běchu poskićenja ansambla Zabava z Ruskeje.
  • Na zahajenju festiwala štwórtk w Budyskim NSLDź počesćichu přitomni Juraja Kubánku (3. wotprawa) z trójnej serbskej sławu.
  • Hosćo z Peruwa zbudźichu ze swojimi přewšo pisanymi kostimami tójšto zajima.
  • Pólski cyłk z Bolesławieca na štwórtkownym swjedźenskim ćahu k zahajenju festiwala "Łužica 2019" po Budyšinje
  • Algeričenjo na jewišću NSLDź
  • Rejwarjo z Boliwiskeje
  • XIII. mjezynarodny folklorny festiwal "Łužica 2019" je zahajeny. Tule namakaće impresije z prěnich wustupow wobdźělenych skupin. Tule předstajichu skupiny štwórtk dopołdnja w Němsko-Serbskim ludowym dźiwadle hižo raz dźěćom swoje poskićenja, na wobra
  • Rejwarki a rejwarjo Serbskeho folklorneho ansambla Wudowor su zdobom hosćićeljo festiwala.
  • Rejwarki a rejwarjo z pólskeho Bolesławieca
  • Zajim zbudźi tež skupina ze Sewjerneje Makedonskeje
  • Dalši hosćićeljo łužiskeho mjezynarodneho festiwala: Serbska rejwanska skupina Smjerdźaca z hudźbnikami folklorneje skupiny Sprjewjan
  • Překwapjenka běchu mnohim wuměłcy z Peruwa.
  • Prěni raz spožčichu lětsa zarjadowarjo mjezynarodneho folklorneho festiwala wosebite myto a diplom za wurjadny wuměłski wukon. Jón dósta słowakski ansambl Bobańovci za swoju přirodnosć, awtentiskosć a originalitu.
  • Rejwarjo algeriskeho cyłka Couleurs d‘ Algerie
  • Boliwiscy rejwarjo a rejwarki w kostimach na jewišću
  • Boliwičenjo "in action"
  • Sobotu wječor běchu po Chrósćicach mnozy nadróžni muzikanća po puću.
  • Pólski młodźinski orchester z Leśnicy zahaji sobotny wječor na farskim dworje.
  • Tójšto ludźi zhromadźi so na programy na jewišću při gmejnskim zarjedźe ...
  • ... a wobhlada sej poskićenja skupin.
  • Na Koklic statoku předstajichu so tež čłonojo skupiny Wotała. Wšitcy z nich su bywši rejwarjo Smjerdźečanskeje rejwanskeje skupiny.
  • Smjerdźečanscy rewjarjo na jewišću pola Koklic
  • Pohlad z jewišća na dwór Wjeselic statoka
  • Na Zahrodnikec-Grutekc statoku pokaza mjez druhim tež Slepjanski folklorny ansambl dźěle swojeho programa.
  • Tež Slepjanscy wuměłcy hižo zahe na dorost mysla.
  • Wšitcy sobuskutkowacy słowakskeho ansambla Bobańovci zamóža znajmjeńša jedyn instrument piskać, spěwać a rejwać.
  • Na Kralec statoku knježeše čiła atmosfera.
  • Schow před krótkim dešćom pytachu sej tež hosćo na Kilankec statoku pod wulkimi předešćnikami.
  • Pólscy hosćo z pokazku ze swojeho programa na Kilankec statoku
  • Wo tym, zo bě sej na lětuši festiwal sobotu a njedźelu do Chrósćic wjac hosći dojěło hač hewak, swědčachu kopate połne parkowanišća.
  • Kultura zwjazuje, kaž tule Smjerdźečanskej rejwarce a algeriskeho rejwarja.
  • Sčasami nimale přepjelnjeny bě Koklic statok.
  • Wudworscy při poslednich přihotach na sobotny wustup na farskim dworje.
  • Wudworscy na farskim dworje
  • Jewišćo při gmejnje bě stajnje derje wopytane.
  • Rjanolinki-rejwarki Smjerdźečanskeje rejwanskeje skupiny
  • Serbska reja je jewišću při gmejnje tójšto pasantow do rejki prosyła.
  • Lóze hólcy wječor na jewišću Zahrodnikec-Grutkec statoka
  • Kabaretna skupina Lózy hólcy pokazachu přitomnym we wobłuku programa "Chróšćan special" na Zahrodnikec-Grutkec statoku, zo njejsu w běhu lět ničo zabyli
  • Na Wjeselic statoku zahudźi skupina NIMO ...
  • ... band wokoło Brězanec bratrow Józefa a Jana.
  • Tež němska skupina Slapstickers pokaza, što zamóže.

nowostki LND