Budyšin/Smochćicy (SN/BŠe). Ratarjo w Němskej su hladajo na mało spadkow a wysoke temperatury minjenych mě­sacow mało žnjowych wunoškow měli. Dołho wojowachu burske zjednoćenstwa a zwjazkowe kraje wo financnu podpěru potrjechenym. W awgusće je zwjazkowe knježerstwo potom připowědźiło, 170 milionow eurow pomocy přewostajić. Samsnu sumu měło šěsnaće zwjazkowych krajow nałožić. Cyłkownje 340 milionow eurow ma so potajkim nětko po­trje­chenym ratarjam rozdźělić. Zo nje­bu­dźe to lochko, móže sej kóždy před­stajić, wšako běchu ratarske zawody w jed­notliwych regionach wšelako po­trjeche­ne. Nadźija na spěšnu, njeběrokratisku a efek­tiwnu pomoc bě wulka.

Rozmołwy z MGO planowane

srjeda, 24. oktobera 2018 spisane wot:

17. łužiske rybowe tydźenje so nachileja. Tež hdyž su hosćencarjo a turistikarjo z lětušim wotběhom jara spokojom, zhladuja woni starosćiwje do přichoda. Hač drje móža klětu zarjadowanje w zwučenym ramiku zaso přewjesć, dotal­ jasne njeje.

Budyšin (SN/BŠe). W přichodnymaj dwěmaj tydźenjomaj su hišće wjacore poskitki we wobłuku 17. łužiskich rybowych tydźenjow předwidźane. Tak při­hotuja na Ramnowskim hrodźe wosebite barokne předstajenje – kulinariski wječork na temu rybu. We Wichowje pola Wósporka poskića přichodnu njedźelu swojim hosćom rybowy bifej. Na reformaciskim swjedźenju přeproša hatarstwo Hóznica (Petershain) na wułójenje rybow. Nimo zarjadowanjow pak maja turistikarjo a hatarstwa dalše zarjado­wanja a wodźenja předwidźane. „Lětsa mamy 35 wobdźělnikow z najwšelako­rišimi poskitkami“, wuswětla projektna managerka Marketingoweje towaršnosće Hornja Łužica-Delnja Šleska (MGO) Antje Lehmann. Ličba je minjene lěta konstantna a dopokazuje wulki wuznam a připóznaće, kajkež su sej rybowe tydźenje mjez ludźimi zdobyli.

„Cholowy so zuć“

srjeda, 24. oktobera 2018 spisane wot:
Připowědźeny pomocny program ratarskim zawodam, kotrež su pod lětušej dołhej suchotu ćerpjeli, je skónčnje zestajany. A kaž burja hižo z nazhonjenjow wědźa, maja za njón wjele formularow wupjelnić. Hłowy budu so tuž chětro kurić, a tón abo tamny potrjecheny drje wótku prawdźepodobnje do žita ćisnje. Najpozdźišo hač do 16. nowembra maja podłožki sakskemu ministerstwu za ratarstwo, wobswět a geologiju w Drježdźanach předležeć. Zo su formulary wobšěrne a komplikowane, zwěsćichu tež ratarjo w Smochćicach, kotrymž běchu fachowcy zawčerawšim kriterije pomocneho programa rozłožili. Nimo wunoškow minjenych třoch lět maja ratarjo wšo swoje priwatne zamóženje, wšitke inwesticije a kredity podać a so takrjec „cholowy zuć“. Pawšalne rozrisanje by jednanje wolóžiło. Ale čehodla měło so w Němskej něšto zjednorić, kotraž je mišter běrokratije a ćežkich jednanjow? Bianka Šeferowa

Biokarpy dale njehospodarske

wutora, 23. oktobera 2018 spisane wot:

Jedne z centralnych zarjadowanjow we wobłuku łužiskich rybowych tydźenjow bě minjenu sobotu při Ballackec haće w Złyčinje. Ryby a rjane wjedro postarachu so tam wo hotowy wopytowarski magnet.

Złyčin (JoS/SN). Słónčne a měrne nazymske wjedro, apetit na rybu a dobra swójbna nalada – takle prezentowaše so rybarski swjedźeń hatarstwa Karstena Ring­pfeila minjenu sobotu při Złyčinskim Ballackec haće. Lědma štó mysleše hišće na horce lěćne dny z mało wodu, a tak móžachu tež rybarjo swoje tehdyše starosće do wěsteje měry zabyć. Něhdźe wosom tonow ryby su sobotu z hata wułójili. Zwjetša běchu to karpy, mnohe hač do tři kilogramy ćežke. Dale mějachu šćuki, liny a sandaki w syći. Hižo při prěnim łójenju bě wulki sum pódla, kotrehož dyrbjachu třo rybarjo pod kontrolu přinjesć. Jeho pušćichu do wosebiteho bazenka, hdźež móžachu sej jeho wopytowarjo bliže wobhladać. Přičinu dosć dobreho wunoška z Ballackec hata widźi Karsten Ring­pfeil w tym, zo Mała Sprjewja hat sobu z wodu zastaruje a zo so lětuša horcota tule tak jara wuskutkowała njeje.

Premjerne prěnje myto do Wojerec

póndźela, 22. oktobera 2018 spisane wot:

Prěni raz mytuje Łužiska hospodarska iniciatiwa lětsa we wobłuku Łužiskeho wubědźowanja załožerjow firmow (LEX) businessowe plany šulerjow. Premjer­na dobyćerka je šulerska tzwr „Help4U“ Wojerowskeho Léona Foucaul­toweho gymnazija.

Choćebuz/Wojerecy (SN/at). Wojerowska šulerska firma „Help4U“ posrědkuje dopomocnu wučbu. Na tajke wašnje přinjesu jednaćelka Marija Skvoznikova, Lisa-­Marie König, Alanis Stewart, Benjamin Körner a wothladowanski wučer Gerald Jonack z Foucaultoweho gymnazija dopomocy potrěbnych šulerjow z wu­čerjemi hromadźe, kotřiž jich podpěruja swoju wědu wudospołnjeć. A tući do­pomocni wučerjo su sami hišće šulerjo. Wosebitosć wuknjenskeje posłužby je jury­ sobu přeswědčiła, Wojerowskich šulerjow z prěnim mytom wuznamjenić.

Pod titlom „MineLife“ su wčera we Wo­cho­žanskim parku błudźenkow pućowansku wustajeńcu wo stawiznach, wuwiću a perspektiwje hórnistwa w namjeznym regionje wotewrili.

Wochozy (AK/SN). „Sym połna nadźije, zo sposrědkujemy z pućowanskej ekspoziciju inspiraciju k rozmyslowanju. Njech je to zakład dalšeho zhromadneho skutkowanja“, dr. Miranda Ptak, wiceprezidentka Wrócławskeho hórniskeho za­rjada na wotewrjenskim zarjadowanju podšmórny. Wochožanski park błudźenkow je hač do 15. nowembra prěnja stacija wustajeńcy. Přehladka nasta jako zhromadny projekt Sakskeho wyšeho hórnistwoweho zarjada, wobwodneho hórnistwoweho zarjada Wrócław, wyšeho hórni­stwoweho zarjada Katowice a maršaloweho zarjada delnjošleskeho wójwodstwa. Financowanje bě so přez spěchowanski program „Ziel 3. Interreg Pólska-Sakska“ zmóžniło. Hač do kónca lěta 2020 projekt traje.

Hołdowanje wuhla

pjatk, 19. oktobera 2018 spisane wot:
We Wochožanskim parku błudźenkow su wčera pućowansku wustajeńcu „MineLife“ wotewrili. Zestawa ekspozicije słuša k spěchowanskemu projektej, hdźež dźe wo partnerstwo a zhromadne dźěło hórnistwowych zarjadow w Němskej a Pólskej. Wosebje chcedźa wopytowarjam parka stawizny a wuwiće hórnistwa w na­mjez­nym regionje spřistupnić. Tež bro­šuru k temje wopytowarskich šćežkow a podkopkow chcedźa wudać. Prašam so, je to hołdowanje wudo­by­wa­nja brunicy? A to runje w času, hdyž nam politika skónčnje praji, što je to swětej do škody načiniło a što nas z teje při­činy nastupajo změny klimy wočakuje. Čehodla njepokaza wustajeńca hrěšniwosć, hdźež su serbske wjeski wotbagrowali a našu identitu skóncowali. Wěm, zo chcedźa turistow do něhdyšich jamow wabić a pućowanja po nich­ zwičnić. Na Serbow su pozdaću zabyli, wšako so naše słowa we wustajeńcy lědma jewja. Měrćin Weclich

Pólne dźěło je prochojta naležnosć

štwórtk, 18. oktobera 2018 spisane wot:
Na zahonje mjez Wjerbnom a Rubynom w Delnjej Łužicy je tónle wobraz nastał. Ale hač tam abo w srjedźnej a Hornjej Łužicy, wšudźe su nazymske pólne dźěła tuchwilu z tójšto prochom zwjazane. Łužiscy ratarjo čakaja žedźiwje na dešć, dyrbja pak so z trajacej suchotu wotnamakać. Najebać to wukonjeja wšě dźěła, kotrež su nazymu trěbne. To wobkrući Holger Schulz, za plahowanje rostlin zamołwity w Kulowskej towaršnosći MKH. Najbóle wohrožuje pobrachowacy dešć wusywany rěpik. Tón trjeba mokrotu, zo by schadźał, hewak symješka zeschnyja. Foto: Michael Helbig

Z Rusami wo kooperaciji rěčeć

srjeda, 17. oktobera 2018 spisane wot:

Čorna Pumpa (SN/at). Ruski wopyt přijmje jutře, štwórtk, hospodarska spěchowanska towaršnosć ASG Grodk w Čornej Pumpje. W oblasće Kursk skutkowace předewzaće UltraMol 000 je nowu technologiju za recycling starych wobručow wuwiło a pyta nětko za móžnosćemi, ju na němskich wikach nałožować. Zastupjerjo ruskeje firmy chcedźa łužiskim zajim­cam technologiju zbližić.

Wuslědk recyclinga je jara drobny gumi­jowy granulat najwšelakorišeje zor­nito­sće, a tón hodźi so na přikład w zhotowjenju wobručow dale předźěłać. Pola ASG Grodk hižo wědźa, zo zepěra so mlěće­ granulata na termiske procesy. To je­ nowe porno dotal znatej kryogenej technologiji a ma lěpšinu, zo nastawacy gumijowy granulat swoje prěnjotne kajkosće kaž elastiskosć wobchowa.

Lěpšina sakskej firmje

srjeda, 17. oktobera 2018 spisane wot:
Wo bolostnym spadźe eksportowych wunoškow wuchodoněmskich firmow po­wšitkownje a wosebje sakskich z Ruskeje přeco zaso słyšimy. To je sćěh sankcijow Europskeje unije na přirjadowanje połkupy Krim Ruskej. Tudyšim předewzaćam wurosće z toho ćežke brěmjo. Te pak njewoznamjenja, zo so wone hospodarskich stykow z ruskimi partnerami wzdadźa. Cyle nawopak, kaž přikład z Čorneje Pumpy pokaza. Towaršnosć ASG Grodk je styki z ruskej firmu w Kurskim oblasće nawjazała, kotraž chce, zo swoju nowu tech­nologiju recyclowanja starych wobručow tež w Němskej nałožuja. Jutře wočakuja ruskich zastupjerjow w Čornej Pumpje. Za tudyšu stronu je směr jasny: Chcedźa zhromadny projekt nastorčić, štož Łužicu z Kurskim oblastom hospodarsce wušo zwjaza. Iniciatiwa je wjelelubjaca, dokelž su hibićiwi Grodkowčenjo nimo toho sak­ske­ předewzaće zdobyli, kotrež chce po nowej technologiji dźěłać. Axel Arlt

nawěšk

nowostki LND