Wodźizny za přichod wuwić

póndźela, 23. julija 2018 spisane wot:

Zaměrowy zwjazk Łužiska jězorina masterskej planaj schwalił

Nowa Wjes (AK/SN). Zaměrowy zwjazk Łužiska jězorina chce Kóšynski nasyp mjez Złokomorowskim a Lejnjanskim jězorom kaž tež Hórnikečanski jězor zaměrnje za přichod wutwarić. Tomu su so radźićeljo zwjazka na swojim minjenym zeńdźenju zawjazali, přihłosujo jednotnje masterskimaj planomaj. W nimaj su za Kóšynski nasyp a za Hórnikečanski jězor­ zawjazowace zaměry zakótwjene. „Nam stej wobaj planaj nadawk jednać. Chcemy zaručić, zo zaměry woprawdźe docpějemy“, rjekny Daniel Just, jednaćel zaměroweho zwjazka. Předewšěm Łazowska gmejna je dospołneho zawrjenja Hórnikečanskeho jězora a hórniskotechniskeho saněrowanja dla hač do lěta 2021 bolostnje potrjechena. Wokoło jězora ma kolesowarska šćežka nastać. Próstwu wo spěchowanske srědki z programa Paragraf 4 je gmejna hižo zapodała. Su to srědki za polěpšenje žiwjenskeho standarda w něhdyšich hórniskich kónčinach. Hórnikečanski jězor ma so zaso z přirodnym měrnym wotpočnišćom stać.

Rozšěrja „Serbske impresije“

wutora, 17. julija 2018 spisane wot:

Regionalny zwjazk Hornja łužica-Delnja Šleska z nowym planom

Budyšin (AK/SN). Při zdźěłanju regio­nalneho plana Hornja Łužica-Delnja Šleska je so přichodna rozsudna faza zahajiła, po tym zo běchu minjeny čas wot­powědne stejišća wšelakich zamołwitych wotwažowali. „Smy wšitke změny zadźěłali, a regionalny plan nětko jako naćisk předleži.“ To zdźěli Jörg Weichler, nawoda fachoweho wobłuka za regionalne planowanje w Regionalnym planowanskim zwjazku Hornja Łužica-Delnja Šleska, na minjenym posedźenju zwjazka. Dotal wotewrjene je prašenje „wětroweje energije“. Tam njeje planowanje móžnych stej­nišćow hišće wotzamknjene. To samsne płaći za wšelake přirodoškitne prašenja. Planowanski zwjazk, tak Jörg Weichler wuzběhny, by sej wjace pod­pěry ze stron sakskeho ministerstwa za wobswět a ratarstwo přał, wšako je runje tu hišće tójšto wotewrjenych prašenjow. Dotal njemóža ani termin dozhotowjenja mjenować, dokelž ma so kóždy jednotliwy wětrnik hladajo na přirodoškit pruwować, nawoda fachoweho wobłuka podšmórny.

Chcedźa kanal klětu wotewrěć

pjatk, 13. julija 2018 spisane wot:

Nowa Wjes (AK/SN). Borboriny kanal jako­ zwisk mjez Lejnjanskim a Parcowskim jězorom chcedźa klětu za łódźnistwo wotewrěć. To rjekny jednaćel zaměroweho zwjazka Łužiska jězorina Daniel Just wčera na zhromadźiznje zwjazka w Nowej Wsy. „Wot nalěta hač do septem­bra Łužiska a srjedźoněmska towaršnosć hórnistwoweho zarjadnistwa (LMBV) trěbne twarske naprawy zwoprawdźa. K techniskemu a wobchadnemu wuhoto­wanju kanala słušeja mjez druhim móžnosće zastawanja a čakanja za łódźe“, jednaćel wujasni. Hakle po twarskich naprawach móže Drježdźanska krajna direkcija jako zamołwity zarjad kanal za wodoprawniske za wužiwanje přizwolić.

Bywšu jamu zaměrnje renaturěruja

pjatk, 13. julija 2018 spisane wot:
Bywšu kaolinowu jamu w Kamjenej pola Rakec zaměrnje renaturěruja. Kaž Kamjenjanski kaolinowy zawod informuje, ma tam nastać hódnotny žiwjenski rum za najwšelakorišu floru a fawnu. Dale maja tež wosebite městna wopytowarjow wabić. Sobu­dźěłaćerce Wuchodosakskeje posłužboweje a serwisoweje tzwr Petra Heidrich a Roswitha Konys (wotlěwa) nowu krajinu sobu zapołožatej. Kaž na foće widźimy, nasta­wa za nimaj ruina twjerdźizny, kotraž budźe pozdźišo jako wuhladnišćo słužić. Nastać ma tohorunja amfiteater za najwšelakoriše zarjadowanja. Wobšěrnje zawod tež na taflach wo projekće informuje, a to zdźěla dwurěčnje. Foto: SN/Maćij Bulank

Ma stajnje dobru naladu wuprudźeć

pjatk, 13. julija 2018 spisane wot:

Wikowar howjadow Jens Schindler wudźeržuje styki z něhdźe 270 burami a ratarskimi zawodami po cyłej Němskej

Jens Schindler z Łuha wikuje z howjadami. Jako wukubłany rěznik ma za to najlěpše wuměnjenja. Tež w rostlinarstwje so 44lětny ­jara derje wuznawa. Jedyn dźeń smědźach Schindlera w jeho ­běrowje na „štyrjoch kolesach“ přewodźeć a dosć wotměnjawy dźěłowy dźeń dožiwić.

Jako Jens Schindler rano po mnje přijědźe, ma swój dźěłowy dźeń hižo dokładnje planowany. To je tež wažne, wšako wjele wot wukona wotwisuje. Jeli dźensa dosć skoćatow njeorganizuje, njemóže zawod Hausner tzwr žane dale sposrědkować. Schindler je potajkim na spočatku rjećaza za to zamołwity, zo móže firma přežiwić. Naju prěnja stacija je blisko Zhorjelca ratarski zawod w Kralowskim haju (Königshain).

Serbske zajimy konkretnje zapřijate

štwórtk, 12. julija 2018 spisane wot:

Kak chcedźa regionalny plan za Hornju Łužicu a Delnju Šlesku dale wjesć, to su wčera w Budyšinje rozjimali. Jedyn cyły kapitl plana wěnuje so jeničce serbskim naležnosćam.

Budyšin (AK/SN). Ze swójskim kapitlom pod dypkom 7 „serbski sydlenski rum“ wěnuje so regionalny plan Hornja Łu­žica-Delnja Šleska zaměram a zajimam Serbow. „Najwažniše dypki su zapřijate. Wone pak dawaja komunam swobodu a swobodu za spěchowanske móžnosće“, podšmórny referent Domowiny za hospodarske a infrastrukturne naležnosće Pětr Brězan po wčerawšej zhromadźiznje regionalneho zwjazka w Budyšinje. Tam su naćisk druheho dalepisanja plana předstajili a rozjimali.

Rěčicy/Wuskidź (JoS/SN). Plan, přepo­łožić železnisku čaru Choćebuz–Zhorjelc, su zamołwići Němskeje železnicy (DB) a energijoweho koncerna LEAG wčera w Rěčicach rozłožili. Wudobywanja brunicy w Rychwałdskej jamje dla je trjeba čaru přepołožić. „Tema njeje nowa“, rje­kny nawoda projekta DB za nowu čaru Uwe Berger. „Přepołoženje bě hižo 1994 do brunicoweho plana zapisane“. Wot to­ho­ časa njeje naprawa wjele lět nikoho zajimowała, tež Rěčičanskich a Wuskidźanskich gmejnskich radźićelow nic. Mjeztym pak so něšto hiba, wšako chcedźa projekt hač do lěta 2026 zwoprawdźić, a to dźě hižo wjac tak dołho njeje. Po lońšim zahajenju planowanjow je DB jako wobsedźerka čary mjeztym hižo w fazy, twar předplanować.

Planowane dotal je, najprjedy jednu čaru po cyłkownje 13 kilometrach pře­połožić. „Hižo nětko pak mamy zaměr, cyłu čaru mjez Choćebuzom a Zhorjelcom na dwě čarje wutwarić a elektrifi­kować, zo móža ćahi ze spěšnosću hač do 160 kilometrow na hodźinu jězdźić. Dwójce twarić nochcemy“, Uwe Berger rjekny. Na mjenowanych planach wusměrja tež warianće za Rěčicy a Wuskidź.

Zwjazkaj nětko zjednoćenej

srjeda, 11. julija 2018 spisane wot:

Lěšće (JoS/SN). Sakski turistiski zwjazk Łužiska jězorina a braniborski turistiski zwjazk Delnja Łužica stej so jako dowolowy region łužiska jězorina pod nowym mjenom turistiski zwjazk Łužiska jězo­rina z.t. zjednoćiłoj. Towarstwu předsyduje Budyski krajny rada Michael Harig (CDU). Do předsydstwa wuzwoleny bu mjez druhim 1. přirjadnik krajneho rady wokrjesa Sprjewja-Nysa Olaf Lalk, za jed­naćelku powołachu Kathrin Winkler. Sydło a běrow noweho zwjazka je w Złym Komorowje, kaž zdźělichu zamołwići wčera w měšćanskim dźělu Grodka Lěšćach (Hornow).

Twarcam nětko wjace płaća

srjeda, 11. julija 2018 spisane wot:

Budyšin (SN/JaW). Twarscy dźěłaćerjo dóstanu wjac pjenjez. Wo tym informuje wobwodny zwjazk dźěłarnistwa IG twarstwo. Kaž z wčerawšeje zdźělenki wuchadźa, „stupaja mzdy twarskich dźěłaćerjow wróćo sahajo wot meje wo 6,6 procentow. Wukubłany muler abo dróhotwarc dó­sta­wa nětko na měsac 209 eurow wjac“. Zwyšenje mzdow za twarskich dźěłaćerjow je wu­slědk minjenych tarifowych jednanjow IG twarstwo z dźěłodawarjemi. Wjaco­re razy běchu te nimale zwrěšćili, a branša steješe před stawkami. Skónčnje pak dóńdźe k wujednanju.

Předsyda Budyskeho wobwodneho zwjazka twarskeho dźěłarnistwa Peter Schubert rěči wo „hoberskej kročeli“ za tysacy přistajenych branše w regionje. „Twarska branša dožiwja boom. Nadawkowe knihi su połne, mnozy njemóža hižo­ dodźěłać. Skónčnje dóstanu tež ći fairny podźěl, kotřiž so wšědnje na twarnišćach poća“, Schubert potwjerdźa.

Klětu mzdy twarskich dźěłaćerjow dale­ stupaja. Zdobom płaća jim jón­krótnu přiražku 250 eurow. Tohorunja zawjedu hač do lěta 2020 tak mjenowanu 13. měsačnu mzdu po wšej Němskej.

Wulkej sumjek dispoziciji

póndźela, 09. julija 2018 spisane wot:

Wjesne kónčiny maja wulki potencial a su spěchowanjahódne. Hižo mnohe lěta program Leader najwšelakoriše projekty podpěruje. Nětko regionalnej managementaj Leaderoweju kónčin Hornjołužiska hola a haty a Łužiska jězo­rina znowa namołwjatej, wo spěchowanske srědki so požadać.

nawěšk

  • Spěchowanski kruh za serbsku ludowu kulturu je 16. a 17. měrca mjeztym 28. serbske jutrowne wiki w Budyskim Serbskim domje wuhotował. Wiki běchu jara wuspěšne, tež nastupajo ličbu wopytowarstwa. Tule smy wam někotre fotowe impresije z wikow zestajeli

nowostki LND