Lěšće (AK/SN). Łužiska žónska syć za předewzaćelki chce zaměrnje dale swoje nazhonjenja a ideje wuměnjeć. Tole podšmórnje załožerka syće Romy Hoppe. Njedawno zetkachu so předewzaćelki w Lěšćoch (Hornow), hdźež zaběrachu so z „Šokolodowym wuměłstwom we Łužicy“. Wobsahowe ćežišćo zarjadowanja su byli žony w rjemjesle. Wjace hač 65 žonow z cyłeje Łužicy je přeprošenju sćěhowało a do manufaktury Confiserie Felicitas w Lěšćoch přišło.
Na spočatku pokazachu iniciatorki dokumentariski krótkofilm. W nim sposrědkowachu so wšelake kročele produkcije šokolody w manufakturje. Zodbom dóstachu žony dohlad do molowanja na šokolodu a tamnišeje dźěłarnje. Jednaćelka manufaktury Goedele Matthyssen rysowaše po tym swój puć z Belgiskeje přez Nigeriju do Łužicy. „Ze zahoritosću rěčeše wona wo rjemjesle, regionje a skedźbni přitomne žony na předewzaćelske wužadanja, mězniki kaž tež strategije a plany do přichoda“, Romy Hoppe wuswětla. „Tak su sej žony syće wuwědomili, kotru zamołwitosć maja předewzaćelki za swoje zawody, swojich přistajenych a region.“
Wotpadki w Janšojcach w přichodźe njespala, dokelž koncern Łužiska energija a milinarnje (LEAG) je planowanja za nowu připrawu zastajił. Powěsć mjenowaše akciski zwjazk přećiwo projektej „hoberski wuspěch“.
Choćebuz (SN/at). LEAG so dale „konsekwentnje na přetwar energijoweho stejnišća Janšojce“ wusměrja. To pak bjez twara wotpohladaneje spalernje wotpadkow. Předewzaće „so w přichodźe na inowatiwne zelene energijowe technologije koncentruje. Při tym steja składowanska milinarnja Janšojce, wutwar wobnowjomnych energijow w susodnej pohórnistwowej krajinje kaž tež wudźeržliwe zastaranje z ćopłotu w srjedźišću.“
Hačrunjež předležeše dowolnosć w dwěmaj kónčinomaj Budyskeho wokrjesa „wubrać“ wjelki, kotrež běchu wospjet wowče stadła nadpadnyli, njeje so ani jedne rubježne zwěrjo zatřěliło.
Budyšin (SN/BŠe). Donětka njejsu w dwěmaj kónčinomaj Hornjeje Łužicy žanoho wjelka zatřělili. Kaž krajnoradny zarjad Budyskeho wokrjesa wčera zdźěli, běchu wotpowědne dowolnosće na čas wjazane. Doba je mjeztym skónčena a tuž njeje hižo móžne wjelki w kónčinomaj třělić. Předewšěm dołhodobne dokumentacije su po słowach krajneho rady wokrjesa Uda Wićaza (CDU) přičina, zo njeje so naprawa zwoprawdźiła. Wón žada sej w přichodźe pragmatiske postupowanje. „Jelizo tydźenje na trěbne podłožki ze zamołwiteho sakskeho ministerstwa a zarjadnistwow čakamy, njeje třělenje hižo zmysłapołne abo naprawa zwoprawdźomna“, wón wuzběhny.
Mjez nadpadami wjelkow na skót a móžnym zatřělenjom rubježnych zwěrjatow je spěšne postupowanje trěbne. Tak njesmědźa zarjadnistwa telko časa brojić.
Změna strukturow we Łužicy rěkaše tema słyšenja wčera w hospodarskim wuběrku zwjazkoweho sejma w Berlinje. Při tym wujasnichu přeprošeni wěcywustojni z Braniborskeje, zo je bóle hač dotal trěbne, so ze zdobywanjom dźěłowych mocow ze zdalenišich kónčin, z polěpšenjom kubłanskeje infrastruktury jako wuměnjenje wuspěšneho připućowanja a ze zaručenjom zakładow wšědneho žiwjenja zaběrać.
Berlin (SN/at). Naroki změny strukturow po kóncu wudobywanja brunicy we Łužicy njehodźa so z potencialom dźěłowych mocow z regiona samoho abo ze susodneju krajow Pólskeje a Čěskeje zmištrować. Prof. dr. Stefan Zundel z Braniborskeje techniskeje uniwersity Choćebuz- Zły Komorow (BTU) mjenowaše za Braniborsku 60 000 a za Saksku 40 000 fachowcow, kotřiž hač do zakonsce postajeneho kónca brunicu 2038 pobrachuja. „Njemóžemy so efektiwneje politiki přiwabjenja wzdać“, bě rezimej wědomostnika. Akcija „Krasse Lausitz“, w kotrejež srjedźišću zdobywanje fachowych mocow steji, drje za to njedosaha.
„Kubłanje je wuměnjenje za dobre žiwjenje“, tak rěkaše w namołwje wubědźowanja towarstwa za wuwiće Hornjołužiskeje hole a haty (OHTL). Nětko su 18 zapodatych projektow w Radworju wuznamjenili.
Radwor (SN/BŠe). Zaměr wubědźowanja OHTL „Za spěchowanje regionalnych kubłanskich projektow“ bě regionalnje relewantne temy přichoda přez dołhodobnje skutkowace kubłanske projekty spóznać a na nje nawjazać. Cyłkownje 18 projektow su iniciatorojo wubědźowanja nětko w Radworju wuznamjenili. Cyłkownje steješe za to 25 000 eurow k dispoziciji.
Budyšin (SN/at). Šěre blaki nastupajo zastaranje ze spěšnym internetom chce Budyski wokrjes dale zaměrnje wotstronić. Zakład za to twori wobzamknjenje wokrjesneho sejmika wot 4. decembra, trěbne wupisanje po cyłej Europje přihotować a wotměć. We wobłuku programa Zwjazka „šěre blaki“ je wokrjes pjeć dalšich clusterow definował, kotrež měrja so na wobłuki Wojerecy, Kamjenc, Biskopicy, Budyšin a pjeć komunow z wulkej potrjebu nachwatanja škleńčnonićowych přizamkow. Po analyzy wuměnjenjow matej clusteraj 12 (Kamjenc) ze 4 074 adresami a 15 (mjez druhim z Njedźichowom a Halštrowskej Holu) z 3 662 adresami najwyšu prioritu. W krajnoradnym zarjedźe z toho wuchadźeja, zo dóstanu za wonej clusteraj spěchowanske srědki.
Za wutwar spěšneho interneta wot lěta 2025 by to konkretnje rěkało, zo zwoprawdźeja w komunach sćěhowace ličby adresow: Porchow 358, Chrósćicy 204, Halštrow 47, Kamjenc 530, Njebjelčicy 395, Njeswačidło 492, Pančicy-Kukow 324, Bóšicy 82, Worklecy 243, Ralbicy-Róžant 146, Njedźichow 1 072 a Halštrowska Hola 1 171.
W Choćebuskim měšćanskim domje su fachowcy wčera wosebitu studiju wo móžnosćach natwara wodźikoweje syće we łužiskim hospodarskim regionje předstajili.
Choćebuz (SN/MiP). Wodźikowa studija je wobstatk kooperaciskeho projekta wokrjesow Sprjewja-Nysa, Hornje Błóta-Łužica, Łobjo-Halštrow kaž tež města Choćebuza. Nadźěłała běše jón firma INFRACON w kooperaciji z Institutom za škit klimy, energiju a mobilitu z.t. Wažny zaměr kooperaciskich partnerow je: Energijowu změnu we Łužicy z wulkim podźělom na wodźikowych technologijach zmištrować a za to trěbne wuměnjenja stworić. Na zarjadowanje přichwatachu krajny rada wokrjesa Sprjewja-Nysa dr. Harald Altekrüger (CDU), kotryž poradźuje tež Braniborske knježerstwo nastupajo hospodarstwo we Łužicy, hospodarski minister Braniborskeje prof. dr. Jörg Steinbach (SPD), jednaćel hospodarskeho regiona Łužica (WRL) Heiko Jahn kaž tež dalši hospodarscy akterojo we Łužicy.