Choćebuz (SN/at). Wo spěšnych ćahach ICE móža w Delnjej a Hornjej Łužicy tuchwilu jeno sonić. Strukturneje změny po kóncu zmilinjenja brunicy dla ma so to změnić. Nic jenož wobchadnje, ale tež infrastrukturnje. Łužica trjeba nowe dźěłowe městna; nowa porjedźernja železnicow w Choćebuzu ma k tomu přinošować. Z wulkoprojektom na tradicionalnym městnje chce Němska železnica (DB) 1 100 nowych dźěłowych a 110 wukubłanskich městnow wu­tworić. Plany za to su wicekancler a zwjazkowy financny minister Olaf Scholz (SPD), zwjazkowy wobchadny minister Andreas Scheuer (CSU) a předstejićer DB Roland Pofalla wčera w Choćebuzu rozłožili.

Hamor (dpa/SN). Hamorska milinarnja ma so stać ze stejnišćom za karbonowe niće. Wotpowědne wozjewjenje wotpohlada su hórniske předewzaće LEAG, sakske ministerstwo za regionalne wuwiće kaž tež wjacore wědomostne zarjadnišća wčera podpisali. Po słowach ministra Thomasa Schmidta (CDU) „so za Hamorske stejnišćo nětko puć do noweje industrijneje doby wotwěra“.

W Hamorje chcedźa přichodnje projekt „InnoCarbEnergy“ zwoprawdźić. Tu dźe wo to wuwić lochkotwarske struktury, kotrež hodźa so mjez druhim w mobilnych nałožowanjach za awtomobilo- a łódźotwar kaž tež za lětarstwo a swětnišćowe lětarstwo zasadźić. W prěnim kroku je předwidźane, natwarić pilotowu liniju zhotowjenja karbonowych nićow, zo móža nowe zhotowjenske technologije testować. „Hižo dźensa móžemy z kombinaciju materialijow, wosebje z karbonowymi nićemi, bytostne lěpšiny wahi wot 30 do 50 procentow porno klasiskim twarskim dźělam docpěć, kotrež su jeničce z aluminija abo wocla“, rjekny Lothar Kroll, nawoda instituta za strukturny lochkotwar Kamjeničanskeje TU.

Wuhibki do přichoda su wčera w Hamorje a dźensa – kaž powěsćernje runje rozprawjeja – w Choćebuzu stajili: Tam, hdźež tuchwilu hišće brunicu Wochožanskeje a Rychwałdskeje jamy zmilinjeja, ma jako wuslědk strukturneje změny slědźerske stejnišćo za karbonowe niće nastać. To je naročny projekt. Přetož karbon dale a wažnišu rólu hraje, zo bychu twarske dźěle na waze zhubili. Lěpšinu z toho změja w awtomobilo- a łódźotwarje: Su-li awta abo łódźe lóše, trjebaja mjenje energije so pohibować. A njerěču ani wo lětarstwje abo swětnišćowym lětarstwje, hdźež je kóždežkuli zalutowaneje swójskeje wahi tež na dobro wjetšeje wukonliwosće bjeztoho zo wjace ćěriwa přetrjebaja. Wuznam snano hišće wjetšeho rozměra ma za Choćebusku porjedźenju železnicow wotpohladana inwesticija, hdźež ma 1 200 přidatnych dźěłowych městnow nastać. Pomału so zdawa, zo slěduja dotalnym připowědźenjam woprawdźe prěnje konkretne skutki. Axel Arlt

Zašły tydźeń tomu tak daloko bě. Dóstach po dlěšich prócowanjach zastupny lisćik jako komparsa za probowy dźeń na nowym lětanišću BER w Berlinje-Schönefeldźe.

Dyrbjał-li BER 31. oktobra dźěłać započeć, maja wšitke wotběhi za pasažěra, ­zo by swój cil z lětadłom docpěł, wjacekróć wupruwowane być. Tak přewjeduja na nowym lětanišću Berlin-Schönefeld tuchwilu wšědnje treningi z njeličomnymi dobrowólnikami. Tak dyrbja sobudźěłaćerjo słabosće spóznać a wotstronić. Posledni dźeń oktobra dźě chcedźa sej potom zamołwići ze Zwjazka, z Braniborskeje a Berlinskeho senata mjez sobu zbožo přeć.

Běch jako normalny pasažěr přeprošeny. Ze swojeho bydlenja w Althohenschönhausenje trjebach połsta minutow, zo bych so z tramwajku a měšćanskej železnicu na lětanišćo dóstał. Wosobinsce „lećach“ do Düsseldorfa, a přichodny lět wjedźeše mje na zažnym popołdnju do Dubrovnika. To sta so wězo wšitko jenož teoretisce.