Lětuši srjedźostawski dźeń Zwjazkoweho zjednoćenstwa srjedźostawskeho hospodarstwa (BVMW) w Drježdźanskim hospodarskim regionje budźe 1. septembra. Budźe to 20. podawk, kotryž je bywši regionalny zwjazk BVMW Hornja Łužica iniciěrował.
Budyšin (SN/at). Na zetkanju ze skrótšenku „MiTag“ na Biskopičanskej Butrowej horje chcedźa so předewzaćeljo z tym zaběrać, kak móža „Přichod do přitomnosće dóstać“. Tradicionalnje dźe wo to, nastorki přiwzać, nowe styki nawjazać a wobstejace dale wudźeržować. „Wuwića sčasom spóznać a z toho prawe konkluzije sćahnyć je za předewzaćela dźeń a wažniše. 20. MiTag tajke wuwića a wužadanja pokaza“, rozłožuje Sirko Rosenberg z Budyskeho běrowa BVMW.
We Wojerowskim Powołanskošulskim centrumje „Konrad Zuse“ mějachu lětsa njezwučeny pruwowanski čas. Šulerjo su pak swoje wukubłanje zakónčili a su nětko wosobinsce zrali za powołanske žiwjenje. Poprawom chcyše kubłanišćo nětko w lěću 25. róčnicu wobstaća woswjećić, dyrbješe pak swjedźeń koronapandemije dla wotprajić.
Hižo dlěje hač dwaj lětdźesatkaj je Wojerowski powołanskošulski centrum wobšěrnje nastajeny. Tak maja tam fachowu šulu, powołanski gymnazij, fachowu wyšu šulu, powołansku fachowu šulu, powołansku šulu kaž tež powołanske zakładne kubłanske lěto hač k poskitkam přihota na powołanje.
Zły Komorow (AK/SN). Braniborska techniska uniwersita (BTU) Choćebuz-Zły Komorow a energijowy koncern LEAG chcetej přichodnje wušo hromadźe dźěłać. Tak matej wědomosć a slědźenje z praksu energijoweho hospodarstwa bóle splećenej być. To wuchadźa z kooperaciskeho zrěčenja, kotrež su 22. julija wotzamknyli. Podpisali su je dr. Christiane Hipp jako amtěrowaca prezidentka BTU, dr. Helmar Rendez jako nawoda předsydstwa LEAG a Jörg Waniek jako nawoda personalneho wotrjada w energijowym koncernje.
„W dojednanju smy zakótwili, zo studenća fachoweho wusměrjenja zawodoweho hospodarstwa (BWL) aktiwnje dalše móžnosće hospodarjenja koncerna přepytuja“, rozłožuje Thoralf Schirmer, nowinski rěčnik LEAG. „Zo bychmy tónle zaměr docpěli, chcemy zhromadny praksowy seminar poskićeć. W nim mamy praksy bliske ideje studowacych we wuskim zhromadnym dźěle z wobłukom předewzaćelskeho wuwića LEAG zdźěłać a w najlěpšim padźe tak daloko wuwić, zo su zwoprawdźomne.“
Budyšin (CS/SN). Serbske šwalče, předewšěm te, kotrež narodnu drastu šija, so wjesela, zo ma Nerlichec modowy wobchod na Budyskej Karla Marxowej 6 přeco hišće poskitk najwšelakorišich płatow. Tam dóstawaja mjeztym cyłe 70 lět płaty, kotrež so derje za šiće narodneje drasty hodźa.
Nürnberg (dpa/SN). Ćežke časy za powołanskich započatkarjow a bjezdźěłnych: Ličba swobodnych dźěłowych městnow w Němskej je w druhim kwartalu wo poł miliona woteběrała. Kaž Nürnbergski institut za přeslědźenje dźěłowych a powołanskich wikow (IAB) zdźěli, spadny wona wo 36 procentow na 893 000. Dokelž je ličba bjezdźěłnych w samsnym času rozrostła, přińdźe na třoch bjezdźěłnych jenož hišće jedne swobodne dźěłowe městno. Koronapandemija tak wuwiće pospěša, kotrež bě so hižo do wudyrjenja wirusa zahajiło. Najbóle potrjechena je industrija. Zawody su ličbu swobodnych městnow přirunujo z lětom 2019 wo wjace hač połojcu wot 151 000 na nětko 66 000 pomjeńšili. Podobne wuwiće pokazuje so pola zawodam bliskich posłužbowych předewzaćow a w gastronomiji. Porno tomu maja w zjawnym zarjadnistwje a w zawěsćernjach něšto wjace swobodnych městnow.
W meji bě 6,7 milionow ludźi w krótkodźěle. To je rekordna ličba w stawiznach Němskeje. Zawody njesmědźa za čas krótkodźěła žanych nowych dźěławych přistajić.
Za město jako hospodarsce sylne a žiwjenjahódne stejnišćo wabić je zaměr widejoklipa, kotryž tuchwilu w Budyšinje nastawa. Nazymu ma produkcija přistupna być.
Budyšin (SN/bn). Wotrjad za spěchowanje hospodarstwa Budyskeho zarjadnistwa chce z tuchwilu nastawacym widejoklipom dalšich inwestorow a předewzaćelow do sprjewineho města wabić. Wo zwoprawdźenje produkcije stara so filmowy team Drježdźanskeje agentury DDV Media, po swójskim podaću najwjetšeho na marketing specializowaneho zwičnjerja Sakskeje. Klip „nima klasiski imageowy film być. Chcemy pokazać, zo je Budyšin hospodarsce sylne město. Někotre z tudyšich předewzaćow słušeja w swojim wobłuku samo k načolnikam branše. Kak je k tajkemu wuspěchej dóšło, to ma widejo wuswětleć“, w zdźělence Budyskeho zarjada za hospodarstwo, kulturu a zjawnostne dźěło rěka.
Drježdźanscy fachowcy produkuja film po zjawnym wupisanju w nadawku sprjewineho města. Směrnicam wotpowědnje běchu so Budyscy zamołwići po wobšěrnych rozmołwach z wjacorymi kandidatami za nich rozsudźili.
Po dwěmaj lětomaj je wobchadny zaměrowy zwjazk Hornje Łobjo (VVO) swoje tarify 1. awgusta wo přerěznje 3,9 procenty zwyšił. Hač do klětušeho pak měli płaćizny najprjedy raz stabilne wostać.
Budyšin (SN/mwe). Wobchadny zaměrowy zwjazk VVO widźi přičiny zwyšenja swojich tarifow wot 1. awgustej 2020 hłownje w stupacych kóštach za energiju kaž tež w płaćenju wyšich mzdow swojim sobudźěłaćerjam. Potrjechene wot přiměrjenja tarifow za jězdźenki su wosebje ći, kotřiž su w městach z nadróžnej a z busom po puću. Płaćizna za jednu jězbu w jednym tarifowym pasmje je na přikład we Wojerecach a Budyšinje wo dźesać centow na 2,50 eurow rozrostła. Za dlěše jězby přez wjacore tarifowe pasma postupi płaćizna na jednu jězbu samo wo 20 hač do 40 centow. Dnjowe karty za jedne tarifowe pasmo su po pjeć lětach prěni króć wo 50 centow dróše. Za dlěše čary kaž tež za swójby a małe skupiny stupaja płaćizny hač do dwaj euraj. Tydźenske jězdźenki wostanu stabilne, měsačne karty pak su nětko wo přerěznje 3,3 procenty dróše.