Łužiske hospodarstwo a třěšny dźěłaćerski zwjazk DGB tłóča na spěšne wobzamknjenje jězbneho plana za kónc wudobywanja brunicy. Wuslědki strukturneje komisije njeměli změnić.
Choćebuz (SN/at/BŠe). Do zjawneho słyšenja wo naćisku zakonja wo kóncu wudobywanja brunicy, kotrež wotměje hospodarski wuběrk zwjazkoweho sejma dźensa w Berlinje, su komory a zwjazki swoje žadanje za spěšnym schwalenjom toho zakonja kaž tež zakonja wo sylnjenju struktury w brunicowych regionach wospjetowali. „Dalše dlijenje njeje akceptabelne“, w tym su sej Łužiska hospodarska iniciatiwa, Choćebuska rjemjeslniska kaž tež tamniša industrijna a wikowanska komora a Předewzaćelski zwjazk Braniborska-Berlin přezjedne.
Komuny wobydlerjow, přemysło a industriju z ćopłotu zastaruja. Kak móhli nowe koncepty wuwić a ćopłotne systemy dale zaručić bě tema zwjazkoweho wubědźowanja, na kotrymž je so tež město Wojerecy wobdźěliło.
Wojerecy (AK/SN). Město Wojerecy je so wuspěšnje na zwjazkowym wubědźowanju „Komunalna ćopłotna změna“ wobdźěliło, ke kotremuž běštej agentura za wobnowjomne energije kaž tež Fraunhoferski institut za energijowe hospodarstwo a energijowe systemy namołwjałoj a do přichoda sahace ideje pytałoj. Mjez něhdźe 50 požadarjemi dobychu Wojerecy w Sakskej, Hoya nad rěku Weser (Delnja Sakska) a Regensburg (Bayerska).
Sprjejcy (JoS/SN). Blisko saksko-braniborskeje krajneje mjezy je Łužiska a srjedźoněmska towaršnosć hórnistwoweho zarjadnistwa (LMBV) projekt nastorčiła, zo by poćeženje ze zerzawcom w Sprjewi a w Małej Sprjewi pomjeńšiła. To je na dobro přewšo poćeženeju wotrězkow Sprjewje wot Rulec młyna hač k předzawěrje Grodkowskeje rěčneje zawěry a Małeje Sprjewje mjez Bórkhamorom a wuliwom do Sprjewje pola Sprjejc. Tak tworja zdobom dalše wěstoty tež za Błóta. Zwoprawdźejo koncept haćenja chcedźa mnóstwo w Sprjejčanskej rynje wotsadźeneho zerzawca krok po krok pomjeńšić.
Wot 9. meje je w Błótach zaso dowolene čołmować. Je to prěni krok, wožiwić turizm, do kotrehož chce Braniborska zajutřišim, 15. meje, startować. Krajni radźa wokrjesow Sprjewja-Nysa (SPD), Hornje Błóta-Łužica (OSL) a Dubja-Błóta (LDS) mjenuja to w času koronapandemije „wažny měznik za regiony“.
Borkowy/Raduš/Lubnjow (SN/at). Padlowych čołmow bě minjeny kónc tydźenja hižo tójšto na błótowskich groblach po puću. Čołmy sy lědma wuhladał. „Překrótkodobnje smy zhonili, zo směmy čołmowanje zaso poskićeć. Tak njejsmy organizować móhli, štož nam Błótowski turistiski zwjazk nastupajo škitne naprawy poruča“, rozłožuje Bernd Lehmann z Čołmownje při Lindobarskej (Leineweber) w Bórkowach. Wón je spokojom, zo móža zaso dźěłać, zo je čas krótkodźěła nimo. Bjez korony bychu sezonu 1. apryla zahajili. „Smy pak tež w měrcu hižo dwě njedźeli zhubili. Rozmach čołmowanja hakle budźe, hdyž hotele zaso wočinja“, skedźbnja Lehmann na to, zo w Błótach jedne z tamnym wusko zwisuje.
Spočatk měrca bě ratarski swět hišće w porjadku. We februaru je so dosć dešćowało a rostliny tuž derje stejachu. Tež koronapandemija bě hišće daloko preč. Jenož dwaj měsacaj pozdźišo pak je nětko wšitko hinak. Ratarske wiki su so w běhu mało tydźenjow dospołnje změnili.
Koronakriza wšitke hospodarske wobłuki masiwnje poćežuje. Tež ratarjo pod wuskutkami pandemije ćerpja. Wot spočatka apryla su płaćizny za mloko spadnyli, a zemja na wikach je njepřestawajcy ržała. Dodawaćelske rjećazy w Europje mjeztym žane wjace njewobsteja, a hišće njeje wotwidźeć, hdy so zaso wutworja. Mlokowa kriza dopokazuje, zo njejsu předźěłanska industrija a wiki na tajku wosebitu situaciju pandemije přihotowane. Ratarjo so tuž nadźijeja, zo njetrjebaja pozdźišo sami za straty płaćić.
Tuchwilne połoženje brizantne
Koronapandemija dźěła na strukturnej změnje za dobu po kóncu wudobywanja a zmilinjenje brunicy njezadźerži. W Běłej Wodźe stara so nětko wotnožka Zwjazkoweho zarjada za hospodarstwo a wuwoznu kontrolu wo centralne programy za škit klimy.
Běła Woda (SN/at). Wotnožku Zwjazkoweho zarjada za hospodarstwo a wuwoznu kontrolu (BAFA) w Běłej Wodźe su zwjazkowy hospodarski minister Peter Altmaier, sakski ministerski prezident Michael Kretschmer (wobaj CDU) a prezident BAFA Torsten Safarik wčera we wobłuku widejoweje nowinarskeje konferency wotewrěli. Na nowym stejnišću dźěłaja na centralnych programach zwyšenja energijoweje eficiency, mjez druhim na tajkim k wuměnje starych tepjenskich připrawow. W prěnim kwartalu 2020 dóšłych nimale 47 500 próstwow wotpowěduje stopnjowanju 164 procentow porno samsnej dobje lěta 2019.