Rań (SN/BŠe). Přetwar bywšeje centrale mjezynarodneje wustajeńcy za twarstwo (IBA) w Ranju (Großräschen) móže pokročować. Nastać ma tam campus za turizm, dźěło, kubłanje, wědomosć a kulturu. We wobłuku prěnjeho twarskeho wotrězka přetwara IBA-terasow je nowy wopytowarski centrum nastał. Za druhi twarski wotrězk je braniborska ministerka za infrastrukturu a krajne planowanje Kathrin Winkler (SPD) wčera zdźělenku wo dalšim spěchowanju we wobjimje 11,1 milionow eurow Rańskemu měšćanosće Thomasej Zenkerej (SPD) přepodała. Město IBA terasy při Rańskim jězoru wobhospodarja. Pjenjezy su z hornca strukturnych srědkow, kotryž zwjazkowe knježerstwo k dispoziciji staja. Nětko móža twarjenje 1 do 3 na IBA terasach přetwarić.
„Město wuwiwa so k wrotam Łužiskeje jězoriny. Z přistawom, hotelom a z terasami je Rań prěnja adresa za ludźi, kotřiž z wokoliny abo z daloka přichadźeja“, ministerka wuzběhny. Wuspěšne lěta mjezynarodneje twarskeje wustajeńcy wot lěta 2000 do 2010 naslědnje skutkuja. „Regionej běše wustajeńca motor.“
W hosćencu na Biskopičanskej Butrowej horje su zastupjerjo ratarskeho wobłuka minjeny pjatk cyłkownje 25 wučomnikow zelenych powołanjow Budyskeho wokrjesa z wukubłanja wuwjazali.
Stróža (SN/MG). Idyliski je napohlad na wulki srjedźny jězor, při kotrymž powita rybar Karsten Ringpfeil minjeny štwórtk zwjazkoweho ministra za ratarstwo Cema Özdemira (Zeleni) a jeho sakskeho kolegu Wolframa Günthera (CDU).
Hospodarscy juniorojo w Budyskim a Zhorjelskim wokrjesu přihotuja hromadźe 11. forum hornjołužiskich předewzaćelow (UFO). Wědomje su sej Serbski ludowy ansambl (SLA) jako městnosć cyłodnjowskeho zarjadowanja wuzwolili, hdźež 28. septembra hač do 80 wobdźělnikow wočakuja.
Budyšin (SN/at). Tróšku futuristisce klinči němskorěčna skrótšenka UFO za lětuše zarjadowanje z poměrnje młodej tradiciju. Předewzaćelki a předewzaćeljo, załožerki a załožerjo firmow budu so tam z temu „Dźěłowe swěty a fachowe mocy we Łužicy“ zaběrać. Z tym steja wažnemu wužadanju přichodnych lět napřećo, kaž běše wčera we wobłuku nowinskeje rozmołwje w Röhrscheidtowej bašće SLA zhonić. Wot hornjołužiskich hospodarskich juniorow wuhotowany forum předewzaćelow je po słowach nawodnicy projekta Bettiny Richter-Kästner „na dialogi so złožowaca konferenca. Wědomje smy so z formu přednoškow rozžohnowali. Tak chcemy wuměnje polěkować, kotraž steji w srjedźišću zarjadowanja.“
Düsseldorf (dpa/SN). Dowolnicy z bydlenskim mobilom abo bydlenskim připowěšakom su němskemu hospodarstwu loni po wuslědkach přepytowanja wjace hač 18 miliardow eurow wobrota wunjesli. To je 20 procentow wjace hač 2021 a dotalny rekord. Tute ličby je branšowy zwjazk CIVD minjeny pjatk k wotewrjenju Caravanoweho salona w Düsseldorfje wozjewił.
Něhdźe 5,9 miliardow eurow je direktnje w dowolowych kónčinach wostało a bě na dobro regionalneho hospodarstwa. Stanowanišća zličichu wjace hač 52 milinow turistiskich přenocowanjow (plus 11,5 procentow). Ličba přenocowanjow w bydlenskich mobilach zwonka stanowanišćow je wo 10,9 procentow na 17,6 milionow přiběrała. Do jězdźidłow a dalšeje campingoweje techniki su ludźo 6,6 miliardow eurow inwestowali. Jězbne kóšty wučinichu 5,6 miliardow eurow.
Wot wudawkow campingowych dowolnikow njejsu jenož wobhospodarjo campingowanišćow swój wužitk měli, ale tež wobchody, předewzaća a posłužbowarjo w dowolowych kónčinach, zwjazk zdźěla. Dowolnicy chodźa na přikład k pjekarjej po całty, wopytuja wobhladanja hódne twary abo jědźa w hosćencach.
Zły Komorow (SN/AK). Z pomocu nowowuwitych awdijoguidow móža sebi wobydlerjo a turisća Łužisku jězorinu wotkryć. Wo tym informowaše turistiski zwjazk Łužiska jězorina. „Nowe awdijoguidy, na kotrež móžeš bjezpłatnje přez app Hearonymus na šmóratku posłuchać, skića wulkotnu móžnosć, so hłubšo do stawiznow, kultury a wuměłstwa regiona zanurić“, praji Katja Wersch, sobudźěłaćerka za zjawnostne dźěło a marketing zwjazka. „Awdijoguidy buchu specielne za to wuwite, wopytowarjam informatiwny a zajimawy wopyt zmóžnić, dołhož sej łužiske muzeje a města w swójskim tempje wotkrywaja.“
W Gubinje na přikład zaběra so guide na přikład ze stawiznami města na bokomaj Nysy. Tak rozkładuje wón historiske twarjenja, dróhi a naměsta. Runje tak naspomni wón anekdoty a pozadkowe informacije. Tute sahaja ze zašłych lětstotkow hač do dźensnišeho. Start tury w Gubinje je při dwórnišću. Z pomocu integrowaneje karty dóńdu wopytowarjo wšelakim zajimawostkam. Ilustrowane su słuchowe přinoški z fotami.