Wobličo pokazać!

wutora, 09. apryla 2019 spisane wot:
Wjele Budyšanow sej kóžde lěto hłójčku łama, kak móhli wopytowarjow města k jutram překwapić. Tak zrodźi cityjowa managerka Gunhild Mimuß ideju, jednotny pyšny wobraz nutřkowneho města wopytowarjam pokazać. Z pomocu Steglichec zahrodnistwa přihotuja mnozy čestnohamtscy pomocnicy něhdźe 3 000 syrotkow, kotrež we wobchodach abo při pućach nastaja. Hrónčka na připinjenych chorhojčkach maja hosći do města witać. Minjene lěta wšak njejsu wopytowarjo z wulkej prócu přihotowanu pychu zwjetša dožiwili, dokelž bě so prosće zhubiła. Pozdźišo běchu rostliny na rowach abo na balkonach bydlenjow widźeć. Škoda, zo wobydlerjo šansu zapasu, Budyšin hosćom raz na přećelne a wote­wrjene wašnje spřistupnić. Wšako negatiwne powěsće wo měsće w medijach přewažuja. Runje k jutram, hdyž tysacy wopytowarjow přińdu, móhli wobličo pokazać a dobry hosćićel być. Bianka Šeferowa

W Radušu hotuja so na sezonu

wutora, 09. apryla 2019 spisane wot:
Wjace hač sto lět stary bobrowc (Magnolie) při Radušanskim młynje pokazuje so tele dny w najrjeńšej nalětnjej pyše. Tež w ponowjenym młynje zahaja nowu sezonu. Mějićel Frank Petzold chce prěni króć přizjewjene skupiny po młynje wodźić a jim starosławne młynske rjemjesło rozkłasć. K tomu poskići kofej a tykanc. Přichodnej wjerškaj stej Bože spěće a dźeń młynow swjatki póndźelu, hdyž budźe 1771 natwarjeny młyn wšitkim wopytowarjam přistupny. Foto: Peter Becker

Pančicy-Kukow (SN/mwe). „Klóšterska stwička“ w Pančicach-Kukowje – na klóšterskim dworje – je dale zawrjena. Wotnajerjo běchu woblubowany hosćenc z „klóšterskej pincu“ a dalšej hóstnej rumnosću kónc lěta 2018 začinili a zrěčenje z wobsedźerjom domu, klóštrom ­Marijinej hwězdu, wupowědźili. W interneće pak pod „Klóšter Marijina hwězda – na wopyće – Klóšterska stwička“ wčera přeco hišće mylnje steješe: wot 11 do 14 hodź. wotewrjene.

Na naprašowanje našeho wječornika, hač je so hižo naslědnik namakał, klóšterska sotra ­Tadeja zdźěli: „Konkretnych požadarjow bohužel hišće nimamy. Dotal su sej ­‚Klóštersku stwičku‘ jenož ludźo wobhladali, kotřiž w datym padźe po­družnikow posrědkuja.“ Kaž z klóšterskeho běrowa dale rěka, „njeje pytanje za wotnajerjom momentanje lochke“. Wšako tež druhdźe dźeń a wjace korčmarjow swoje hosćency zawěra, dokelž prosće personal kaž kucharjow a pinčnikow njenamakaja, ­dokelž do restawranta wšědnje lědma štó, kaž kolesowarjo a pućowacy, załoža.

Dotal třećina idejow k žiwej dwurěčnosći

póndźela, 08. apryla 2019 spisane wot:

Wot 15. měrca hač do 15. apryla traje wubědźowanje „Sakskeho fondsa Čiń sobu“, z kotrymž chce knježerstwo ludnosć motiwować, wot deleka k strukturnej změnje přinošować. Tež serbska kategorija je pódla.

Znowa jednali

pjatk, 05. apryla 2019 spisane wot:

Kamjenc (SN/BŠe). W Kamjenskim předewzaću accumotive, hdźež zhotowjeja baterije za awta koncerna Daimler, jedna IG metal tuchwilu ze zastupjerjemi dźěłodawarja. Zaměr je, w Sakskej płaćiwe tarifowe zrěčenje metalo- a elektroindustrije přesadźić. Kaž prěni społnomócnjeny dźěłarnistwa we wuchodnej Sakskej Jan Otto zdźěli, su jednanja konstruktiwne. Hladajo na rozsudnu temu, mzdu, su so hižo na ramik dojednali. „Přiwšěm wostawaja nahlady nastupajo dalše wažne dypki chětro rozdźělne“, Jan Otto wuzběhny.

Hakle zawčerawšim stej wobě stronje w Kamjencu wuradźowałoj a móžne zaměry postajiłoj. Na přichodnym terminje póńdźe wo dźěłowe wuměnjenja, za čož su zhromadne wodźenja po zawodźe předwidźane. Tema měło tohorunja přechodne rjadowanje nowych mzdow być, kaž z dźěłarnistwa rěka.

Kamjenski zawod accumotive je so w minjenymaj lětomaj chětro rozšěrił. Nětko maja tam wjac hač 1 300 sobudźěłaćerjow. Kónc decembra bě IG metal mějićela zawoda koncern Daimler k tarifowym jednanjam namołwiła. Mjez druhim žadaja sej tam 35 dźěłowych hodźin wob tydźeń, štož je wosebitostka.

16. łužiske wubědźowanje załožićelow firmow (LEX) započa so wčera w Choćebuzu. Wot lěta 2004 zliči zarjadowaca Łužiska hospodarska iniciatiwa (WiL) wjace hač 1 200 wobdźělnikow.

Choćebuz (AK/SN). „Ze zapodatych 733 wobchodniskich planow smy wjace hač 300 wuspěšnych załoženjow firmow, rozšěrjenjow wobchodniskich polow a naslědnistwow w předewzaćach zwěsćili. Tak nasta we Łužicy wjace hač 1 000 dźěłowych městnow“, podšmórny dr. Michael von Bronk, předsyda nawodnistwa Łužiskeje hospodarskeje iniciatiwy, składnostnje zahajenja lětušeho wuri­sanja wčera w Choćebuzu. LEX, tak wón wuzběhny, předewzaćelow we Łužicy zaměrnje spěchuje. „Při tajkim wubě­dźowanju maš jenož dobyćerjow. Samo tón, kiž žane myto njedóstanje, móže ­tójšto přiwuknyć“, von Bronk wujasni. Wšako dóstanje kóždy wobdźělnik wot dweju jurorow posudk swojeho wobchodniskeho koncepta a mnohe fachowe pokiwy. Jury přisłušeja zastupjerjo předewzaćow, Industrijneje a wikowanskeje komory, rjemjeslniskeje komory kaž tež krajneju a inwesticiskeju bankow.

Hněwaja so z prawom

štwórtk, 04. apryla 2019 spisane wot:
Po lońšej suchoće, pod kotrejž běchu wosebje ratarjo ćerpjeli, su jim politikarjo spěšnu a njekomplikowanu pomoc přilubili. Wěm pak so hišće derje na dlijenje dopomnić, prjedy hač so skónčnje wo tym doro­zumichu, zo ma nimo krajow tež Zwjazk potrjechenych pjenježnje podpěrać. Po dokładnych kriterijach su ratarjo na to swoje próstwy ratarskim ministerstwam zwjazkowych krajow zapodali. Jeničce w Sakskej je wjac hač 33 milionow eurow pomocnych srědkow trěbnych. Hač do kónca decembra su zamołwići trochu wjac hač wosom milionow eurow wupłaćili. Wot toho časa njedóstachu próstwarjo ani jeničkeho centa. Ze stron ministerstwa jenož rěkaše, zo njeje dalše přizwolenje prawniskich přičin etata dla móžne, štož je mnohich ratarjow wězo hněwało. A to z pra­wom, wšako su na spěšnu pomoc pokazani. W politice matej słowje „spěšnje a njekomplikowanje“ po wšěm zdaću hinaši woznam. Bianka Šeferowa

Budyšin/Hodźij (SN/BŠe). „Europske dny wuměłskeho rjemjesła su stajnje přiležnosć, rukopis regionalneje kreatiwneje sceny sej spřistupnić“, zwurazni hłowny jednaćel Drježdźanskeje rjemjeslniskeje komory Andreas Brzezinski. Mjez lětu­šimi wobdźělnikami zarjadowanja, kotrež budźe wot 5. do 7. apryla, staj mandźelskaj Sandy a Frank Löschau ze Ži­čenja pola Hodźija, kotrajž chcetaj za­jimcam swoju dźěłarnju wotewrěć. Hižo w zahrodce wotbłyšćuje so jeju lubosć k hornčerskim wudźěłkam. Wšako mał­ke­ figury hrjadki pyša. Tajke móža sej ludźo­ tež w přijomnje zarjadowanym Löschau­wec wobchodźe kupić.

Přichilnosć swójbam wuznamjenili

póndźela, 01. apryla 2019 spisane wot:

Rań (AK/SN). Hosćency, hotele a pensije kaž tež wólnočasne a kulturne zarjad­nišća we łužiskej jězorinje měli so bóle na swójby z dźěćimi nastajić. K tomu namołwi jednaćelka mjezy přesahowaceho turistiskeho zwjazka Łužiska jězorina Kathrin Winkler na druhim turistiskim dnju, na kotryž běchu organizatorojo tónkróć do Ranja (Großräschen) přeprosyli.

Prěni raz je zwjazk šěsnaće swójbam přichilenych zawodow wuznamjenił, kotrež přeswědčeja ze swojej kreatiwitu, wobsahowej kwalitu a dobrym serwisom. Krajny rada wokrjesa Hornje Błóta-Łužica Siegurd Heinze (CDU) a zastupowacy předsyda turistiskeho zwjazka Marcus Heberle staj wopisma a plakety přepodałoj. Do toho bě dźěłowa skupina někotre měsacy z pomocu kriterijoweho kataloga turistiske zarjadnišća přepruwowała. „Jeno štóž so na swójby nastaja, móže so wo překwapjace wokomiki starać. To móža hižo z mało dźěłom a mjeńšimi akcijemi a serwisom docpěć“, su prěnje dopóznaća Marcusa Heberla. „Swójbam přichilena atmosfera, přede­wšěm dobre začuće, jako swójba witana być, je rozsudna.“

Nalěto dźěło zaso přiběra

pjatk, 29. měrca 2019 spisane wot:

Budyšin (SN/at). We wuchodnej Sakskej bě w měrcu 19 468 bjezdźěłnych, 798 mjenje hač w februaru a 2 044 mjenje hač před lětom. Bjezdźěłnostna kwota wučinješe 6,9 procentow, kaž Budyska wotnožka agentury za dźěło dźensa informuje. Wuwiće zwisuje z nalětnim woži­wjenjom na tudyšich dźěłowych wikach.­ „Ličba přistajenjow, tež we wot wjedra­ wotwisnych powołanjach, je při­bě­rała. Bjezdźěłnosć so porno předměsacej kaž tež předlětu čujomnje pomjeńši. Sym optimistiska, zo dźěłowe wiki dale robustne wostanu“, wuzběhny Ilona Winge-Paul, operatiwna jednaćelka Budyskeje agentury za dźěło. Jeje sobudźěłaćerjo pak budu so zhromadnje z předewzaćemi hišće bóle wo to starać, personal zdobywać.

Posrědkowarjam dźěła je tuchwilu 4 574 socialneho zawěsćenja winowatostnych městnow k dispoziciji, 158 wjace hač w februaru a 204 wjace hač loni w měrcu. Agentura je so w nalětniku wo 6 458 bjezdźěłnych starała. Komunalnej jobcenteraj wokrjesow Budyšin a Zhorjelc stej 13 010 bjezdźěłnych w zakładnym zawěsćenju registrowałoj.

nawěšk

  • Sernjany su swoju róčnicu prěnjeho naspomnjenja wsy před 600 lětami z wosebitym wjesnym swjedźenjom wuspěšnje woswjećili. Tule nańdźeće někotre fotowe impresije wo tym:
Zerna feierte unlängst die Ersterwähnung des Ortes vor 600 Jahren mit einem beson

nowostki LND