Rio de Janeiro. Němske olympiske mustwo čaka tež po třećim wubědźowanskim dnju dale na prěnju medalju. Před štyrjomi lětami w Londonje bě tesakowarka Britta Heidemann na třećim dnju olympiskich wurisanjow požadany medaljowy dešć za Němsku zahajiła.
Najsnadnišo misnychu podestne městno wčera synchronowa dwójka Patrick Hausding a Sascha Klein při skakanju z dźesaćmetrowskeje wěže. Rutinjejej, kotrajž běštaj sej lěta 2008 w Pekingu slěbro wubědźiłoj, ležeštaj dołhi čas na třećim městnje. Skónčnje dyrbještaj je Wulkobritaničanomaj Tomej Daleyjej a Danielej Goodfellowej, kotrajž měještaj jeničce 6,03 dypki wjac, přewostajić. Tež płuwar Paul Biedermann njezamó w finalu na 200 metrow wólny stil do boja wo medalju zapřimnyć. Dobył je Chinjan Sun Yanga. Hallečan pak płuwaše jeničce na šeste městno.
