38. ADAC motocross w Jaworje na Kaponicy

„Sym překwapjeny, kak zamołwići a pomocnicy MC Jawory tu wšo zmištruja, byrnjež wuměnjenja chětro špatne byli. Pječa je to kóžde sedme lěto tak. Štóž pod hołym njebjom sportuje, pak dyrbi z tym ličić, zo je wot wjedra wotwisny.“, rjekny wčera popołdnju na kromje Jaworskeje motocrossoweje čary zapósłanc krajneho sejma Alojs Mikławšk (CDU) z Worklec. Serbski politikar, kiž so hižo dlěši čas za motocross w Jaworje zasadźuje a podpěra, dyrbješe sej tež krute črije wobuć. Nimale wšudźe dominowaše na woběmaj dnjomaj błóto. Sportowało pak je so na Kaponicy tež. Startowe pola we wjacorych běhach pak runjewon wulke njeběchu, dokelž běchu někotři piloća start cofnyli. Nic pak dla wěstoty na čarje. Woni nochcychu sej jich mašiny womazać a po tym dlěši čas rjedźić. Wubědźowali su so jězdźerjo a jězdźerki wo sakske a němske motocrossowe mišterstwa, a to w najwšelakorišich kategorijach. Jenički domoródny a znaty pilot bě předsyda MC Jawory Thomas Zowalla. Wón startowaše sobotu na krajnej runinje w starobnej klasy Ü35.