TSV Kundraćicy – Viktoria Worklecy 92 2:3 (25:19, 20:25, 25:22, 28:30, 4:15)

Ze sněhběłym lacom třoch dobyćow podachu so volleyballisća Viktorije Worklecy do Kundraćic (Kunnersdorf). Hižo w prěnjej hrě dnja bě hosćićel MSV Budyšin z 3:1 přewinył. Serbskemu cyłkej pobrachowaštaj libero a jedyn wonkowny nadběhowar. Prěnju sadźbu dobychu Kundraćicy chětro jasnje. Zawěsće běchu na poměrnje nisku halu a w njej knježace tropiske temperatury­ lěpje nastajeni. Wosebje w při­jimanju mějachu hosćo wulke ćeže. Hakle­ zaměnjeny rutinjej Clemens Eckert­ přinjese wjace wěstoty do akcijow. Prěnja sadźba pak njehodźeše so hižo zwjertnyć.

W druhim přechodźe pak so hosćo namakachu a móžachu jasne znamjenja sadźeć. Wosebje kwota wuspěšnych nadawkow a prima nadběhi starachu so wo dobyće 20:25 a sadźbowe wurunanje. Mustwo z Kundraćic pak wopokaza so jako twjerdy worjech a doby dalšu sadźbu z 25:22. Při stawje 19:22 mějachu Worklečenjo sadźbowe wurunanje před nosom, Kundraćicy pak k 23:23 wurunachu. Štož nětko sćěhowaše, njebě ničo za słabe čuwy. Worklečenjo wuhrachu sej pjeć sadźbowych bulow. Hakle při stawje 28:30 bě sadźbowy remis w měše.