Awtorka dźensa

Halena Jancyna

„Kotry formular mam wužiwać?“ – „Prašej so našeho prezidenta!“ „Kelko přinoška mam scyła płaćić abo sym jón hižo płaćił?“ – „Prašej so našeho prezidenta!“ „Kotre terminy su za nas čłonow wažne?“ – „Prašej so našeho prezi­denta!“

Tajkich a hinašich prašenjow je w sportowych zjednoćenstwach přeco dosć a nadosć, ale často je wotmołwa: Prašej so prezidenta, wón tla wšitko wě. Kotry wuznam a kotre konsekwency tale wotmołwa ma, je Sportowe towarstwo Marijina hwězda dožiwiło. Přeco, hdyž njeje dale šło abo hdyž dyrbješe so něšto wažne organizować, steješe Smječkečan Pětr Batr na prěnim městnje a je kóždy nadawk zmištrował. Z jeho smjerću bě towarstwo bjez prezidenta. Kotre wužadanje to za předsydstwo!