Wučerjo-volleyballisća Serbskeho gymnazija Budyšin (SGB) zahajichu jubilejnu 50. sezonu wokrjesnych mišterstwow při wysokim saku z dobyćomaj. Woni nawjeduja nětko tabulku šěsć startowacych šulow hač k druhemu hrajnemu dnjej w měrcu 2017 w Lubiju.

Před 49 lětami běštaj direktor Dobrušanskeje šule Rainer Laveatz a sportowy wučer tehdyšeje Budyskeje Wuchodneje šule (nětko Mättigowa) Wolfgang Schumacher ideju zrodźiłoj, mjezsobne wubědźowanje wučerjow we volleyballu přewjesć. A štož bě so z wurisanjom mjez šulomaj w meji 1968 započało, wuwi so k woblubowanej formje wólnočasneho sportowanja. W sydomdźesatych lětach přidružichu so dalše šule, mjez nimi tež Budyskej Serbski wučerski wustaw a Serbska rozšěrjena wyša šula. Tučasnje wojuje šěsć wučerskich cyłkow wo titul wokrjesneho mištra.