ST Nadrózna Hrabowka

– Sokoł Ralbicy/Hórki II 1:1 (1:1)

Zestawa hosći: Cyž – M. Matka, Materna, Šnajder, Čornak, Bogusz, Čórlich, Kobalc, J. Matka, Kurjat, T. Matka

Z jenož jědnaće hrajerjemi nastupi koparska rezerwa Sokoła Ralbicy/Hórki k poslednjej hrě prěnjeje połserije. Běše tuž jasne, zo ma kóždy přez cyły čas hrać. Domjacy hrajachu z wětřikom w chribjeće, a to tež hnydom wužichu. Ralbičenjo w natwarje bul zhubichu a hosćićel startowaše konter. Naposledk docpě Toni Schönach 1:0 (4.). Wotmołwa Sokołow wšak njeje dołho na so čakać dała. Po wólnym kopje Symana Bogusza Jurij Matka z hłowu wuruna (18.). Nimale by Markus Kobalc z hłowu dalše wrota docpěł, pospyt pak běše přecentralny. Domjacy mějachu wjetše hrajne podźěle. Z hižo mjenowanym wětřikom w chribjeće spytachu woni z dołhimi třělwami k wuspěchej dóńć. Škit hosći pak derje steješe a ničo njedowoli. Nawopak wuhra sej Sokoł dalšu dobru składnosć, jako docpě flanka Měrćina Kurjata. Z 13 metrow pak běše jeho kop njeprecizny (35.).