Powěsć je kaž bomba zadyriła. Z pjenježnej podpěru w sydomcyfrowym wobłuku chce hightechfirma Neutrino-Energy Němska krótkodobnje k tomu přinošować, zo wróći so FC Energija Choćebuz we wotwidźomnym času zaso do druheje zwjazkoweje koparskeje ligi. Tónle wotmysł překwapi tež prezidenta Energije Michaela Wahlicha, jako dósta wón tele dny njewočakowany telefonat Neutrino-jednaćela Thorstena Schuberta. „Poprawom sonju jenož w nocy, ale to bě wodnjo“, rjekny Wahlich, kiž je hižo 27 lět jako překupc po puću, a je při tajkich poskitkach wězo skeptiski. Wosebje tež tohodla, dokelž sej w swojej skromnosći najprjedy mysleše, snano 20 000 abo 30 000 eurow dóstać. Při poskitku „pjenježna suma ma sydom cyfrow“ pytaše Wahlich za schowanymi kamerami, dokelž sej mysleše, zo ma hłownu rólu w telewizijnym wusyłanju „Schowana ka­mera“. Tež wotrunanje, kotrež Neutrino wot FCE wočakuje, leži w móžnym wobłuku. Neutrino chce rady na trikotach wabić a stadion přemjenować dać. „Sym wězo hnydom wšě portale přehladał, zo bych so wo firmje informował.