SJ Njebjelčicy

– TSV Wachau 1:7 (0:2)

Zestawa domjacych: Hahn – Pawlik, Haška­, Hrjehor, Lejnart (85. Janca), Kral, Korjeńk, Hoelzel, Hommel, Šołta, Čornak (68. Zeller)

Najskerje njeběchu Njebjelčanscy koparjo po zakopje tak prawje při wěcy. Hižo w 5. min. steješe 0:1. Lěwy nadběhowar hosći bě škitarjam twochnył a zymnokrejnje přetworił. Domjacy pak so spěšnje zhrabachu. Robert Lejnart bu wot Tommyja Hommela pósłany, třěli pak hrajny nastroj přez wrota. Krótko po tym wotwobara wrotar hosći třělwu Leopolda Hoelzela. Po hrubym foulu domjacych pochłosta sudnik Krystofa Pawlika z čerwjenej kartu. Hosćićelski cyłk pak wojowaše dale wo wurunanje. W 36. min. zwyši hósć po zmylku w srjedźnym polu a po spěšnym konteru na 0:2.

Hnydom po zasozahwizdanju dyrbjachu Njebjelčenjo třeće přećiwniske wrota přijimować (46.) a w 50. min. skrótši Handrij Korjeńk z niskej třělwu na 1:3. Njeposrědnje po tym přetworichu hosćo na 1:4 (63.). Nětko bě wočiwidne, zo je wola domjacych zlemjena. Tola wšitcy wojowachu dale. Do kónca partije přijimachu Njebjelčenjo přiwšěm hišće troje dalše wrota, poslednje po jědnatce.