Kolesowarski sport ma dołhu tradiciju. Tak přewjeduje so na přikład najdlěše a najćeše wubědźowanje Tour de France hižo wot lěta 1903. Na tejle kóždolětnje w juliju wotměwacej so etapowej kołojězbje po Francoskej dyrbja jězdźerjo po runinach, ale tež horinach něhdźe 4 000 kilometrow absolwować, prjedy hač swój kónčny cil Paris docpěja. W zašłosći smy přeco zaso wo dopingowych skandalach słyšeli a čitali. To zajimawe pak je, zo njeje zajim přihlado­warjow za wubědźowanja kaž Tour de France přiwšěm popušćił. Nawopak, na etapowych cilach, wosebje w Alpach, steja ludźo kaž žiwe murje.