Radebeulski BC

– SJ Chrósćicy 1:1 (0:0)

Zestawa hosći: Králíček – Pöpel, Cyž, Sentivan, Šafář, M. Zahrodnik, Schulze, Domaška (67. Bětnar), Runt (90. J. Bogusz), Henčl (85. Młynk), Věchet

Po tym zo běchu Chróšćanscy koparjo tydźeń do toho jasneho faworita z Mužakowa mjerzali, chcychu sobotu tež Radebeulskemu towarstwu dočasne mišterstwo a postup skazyć. Wone dyrbješe dobyć, zo by jemu dypkowy předskok za mišterstwo dosahał. Chróšćenjo pak wot wšeho spočatka na wukon minjenych hrow nawjazachu. Z kompaktneje a derje organizowaneje defensiwy měrjachu so ze spěšnym přešaltowanjom do ofensiwy. Prěnju móžnosć hry wšak klepny Tom Henčl słabje snadnje wyše łaty. Na tamnej stronje poskići so domjacemu Willijej Richterej hnydom dwójna šansa na nawjedowanje. Prěnju pak zhłójčkowa Petrej Králíčekej do rukow, druhu zamó Fabian Pöpel w poslednjej sekundźe k róžkej znješkódnić. Hačrunjež Radebeulčenjo tróšku wjace do ofensiwy inwestowachu, mějachu jich hosćo dosć derje pod kontrolu a jim jenož mało dowolichu. Tak wosta po sylnym prěnim połčasu při njerozsudnym 0:0.