Cyłkownje doběža 414 atletow do cila, kotřiž wubědźowachu so při rjanym Bjerwałdskim jězoru na jednej z pjeć płonych distancow 0,8 km, 3 km, 5 km, 10 km a 21,1 km. Mjez sportowcami wojowaše tež lětsa zaso wuspěšnje dźesatk serbskich běharkow a běharjow.

Na 0,5 km běštaj cyłkownaj dobyćerjej Maria Tanzmann z Korzyma (21:37 min) a Paul Hentschel ze Žitawy (17:46 min). Gymnaziastka Larissa Měrćinkec z Chelna bě dobyćerka w skupinje (sk) U 16 (22:57 min) a jeje mać Corinna běše najspěšniša žónska we walkingu na tejle distancy (35:49 min).

Cyłkownaj dobyćerjej na 10 km běštaj Annett Schrötter z Běłeje Wody (43:17 min) a Marc Überfuhr z Budyšina (34:17 min). Na čarje 10 km wojowaše najwjace serbskich starterow. W sk 30-34 lět wubědźištaj sej slěbornu medalju Manuela Jurkowa z Łupoje (51:31 min) a Syman Žur z Budyšina (44:47 min). Leo Čórlich z Budyšina zawěsći sej w sk U 18 bronzowe městno (49:47 min). Roman Měrćink z Baćonja doběža w sk 20 jako pjaty do cila (46:12 min) a Anja Krawcowa z Hrubjelčic docpě w sk 40 dźewjate městno (1:05:23 h).