We wurisanju „Młodźina trenuje za olympiju“ maja koparki Serbskeho gymnazija Budyšin (SGB) w zwjazkowym finalu w předkole skupiny C nětko w Berlinje ze Schickhardtowym gymnazijom Stuttgart, z Carla von Weinbergowej šulu Frankfurt nad Mahonom a z Landrata Lucasowym gymnazijom Leverkusen mocy měrić.

Za dźewjeć šulerkow SGB započnje so drje najwuznamniši sportowy podawk w šulskim žiwjenju njedźelu, 17. septembra. Wone podadźa so tón dźeń na zwjazkowe koparske finale w starobnej skupinje II holcow do Berlinje. Hižo dźensa słuša šulerkam-koparkam 8. do 10. lětnika SGB za kwalifikaciju wulke připóznaće, wšako su wone w stawiznach serbskeho kubłanišća prěnje, kotrež tajki grandiozny wuspěch docpěchu.